ຂ່າວຫຼ້າສຸດ

ໂຮງຮຽນ 700 ກວ່າ​ແຫ່ງ ເປີດ​ການ​ຮຽນ​ການ​ສອນ​ໃຫ້​ແກ່​ຊາວ​ປາ​ແລັດ​ສະ​ຕິນ

200 20 ສ.ຫ. 2018 ຂ່າວຕ່າງປະເທດ
ໂຮງຮຽນ 700 ກວ່າ​ແຫ່ງ ເປີດ​ການ​ຮຽນ​ການ​ສອນ​ໃຫ້​ແກ່​ຊາວ​ປາ​ແລັດ​ສະ​ຕິນ

    ສະຫະ​ປະຊາ​ຊາດ (​ສປຊ) ແຈ້ງ​ໃຫ້​ຮູ້ເມື່ອ​ວັນ​ທີ 16 ສິງຫາ​ທີ່​ຜ່ານ​ມາ​ວ່າ ໂຮງຮຽນ​ຂອງ ​ສປຊ ຈຳນວນ​ຫຼາຍ​ຮ້ອຍ​ແຫ່ງ ທີ່​ຈັດ​ສັນ​ໃຫ້​ແກ່​ນັກຮຽນ​ຊາວ​ປາ​ແລັດ​ສະ​ຕິນ ທີ່​ເປັນ​ຜູ້​ລີ້​ໄພ​ນັ້ນ ຈະ​ໄດ້​ເປີດ​ການ​ຮຽນ​ການ​ສອນ​ຖືກຕ້ອງ​ຕາມ​ກຳນົດ ໂດຍ​ບໍ່​ເອົາ​ຫົວຊາ​ຕໍ່​ວິ​ກິດ​ການ​ການ​ເງິນ ຫຼັງ​ຈາກ​ທີ່ ສ ອາ​ເມ​ຣິ​ກາ ກັກ​ບ້ວງ​ເງິນ​ຊ່ວຍເຫຼືອ​ຊາວ​ປາ​ແລັດ​ສະ​ຕິນ.

    ອົງການ​ຊ່ວຍເຫຼືອ​ຜູ້​ລີ້​ໄພ​ຊາວ​ປາ​ແລັດ​ສະ​ຕິນ ຂອງ ​ສປຊ (UNRWA) ໃຫ້​ຮູ້​ວ່າ ໂຮງຮຽນ​ຈຳນວນ 711 ແຫ່ງ ທີ່​ຈັດ​ສັນ​ໃຫ້​ແກ່​ນັກຮຽນ 526.000 ຄົນ ຢູ່​ໃນ​ດິນແດນ​ປາ​ແລັດ​ສະ​ຕິນ ຊອກ​ດາ​ນີ ລີ​ບັງ ແລະ​ ຊີ​ຣີ ຈະ​ໄດ້​ເປີດ​ຮັບ​ນັກຮຽນ​ໃນ​ສົກຮຽນ​ໃໝ່. ຕາມ​ແຜນການ​ແລ້ວ ໂຮງຮຽນ​ແຫ່ງ​ຕ່າງໆ ຈະ​ກັບ​ມາ​ເປີດ​ການ​ຮຽນ​ການ​ສອນ ແຕ່​ວັນ​ທີ  29 ສິງຫາ ຮອດ​ວັນ​ທີ 2 ກັນຍາ​ໜ້າ​ນີ້.

    ທ່ານ ອັນໂຕ​ນີ​ໂອ ກູ​ເຕີ​ເຣ​​ສ ເລຂາທິການ​ໃຫຍ່ ​ສປຊ ແຈ້ງ​ເຕືອນ​ໄວ້​ກ່ອນ​ໜ້າ​ນັ້ນ ວ່າ​ໂຮງຮຽນ​ແຫ່ງ​ຕ່າງໆ​ດັ່ງກ່າວ ຍາກ​ທີ່​ຈະ​ເປີດ​ການ​ຮຽນ​ການ​ສອນ​ໄດ້ ຍ້ອນ​ວ່າ​ຂາດ​ງົບປະມານ ຫຼັງ​ຈາກ​ທີ່​ປະທານາທິບໍດີ ສ ອາ​ເມ​ຣິ​ກາ ໂດ​ນາ​​ລ ທຣຳ ຕົກລົງ​ກັກ​ບ້ວງ​ເງິນ​ຊ່ວຍເຫຼືອ​ໃຫ້​ແກ່​ຊາວ​ປາ​ແລັດ​ສະ​ຕິນ​ເອົາ​ໄວ້.

    ປັດຈຸບັນ​ນີ້ UNRWA ພວມ​ສະໜອງ​ການ​ບໍລິການ​ໃຫ້​ແກ່​ຜູ້​ລີ້​ໄພ​ຊາວ​ປາ​ແລັດ​ສະ​ຕິນ ແລະ ​ຍາດຕິ​ພີ່ນ້ອງ​ຂອງ​ເຂົາເຈົ້າ​ຈຳນວນ 3 ລ້ານ​ກວ່າ​ຄົນ ຢູ່​ໃນ​ທົ່ວ​ເຂດ​ຕາເວັນ​ອອກ​ກາງ ພ້ອມ​ກັນ​ນັ້ນ UNRWA ກໍ​ຮັບ​ສະໝັກ​ແຮງ​ງານ 20.000 ກວ່າ​ຄົນ ໃນ​ນັ້ນ​ສ່ວນ​ໃຫຍ່​ເປັນ​ຊາວ​ປາ​ແລັດ​ສະ​ຕິນ. ເມື່ອ​ເດືອນ​ກ່ອນ UNRWA ແຈ້ງ​ໃຫ້​ຮູ້​ວ່າ​ຈະ​ຕັດ​ຫຼຸດ​ວຽກ​ເຮັດ​ງານ​ທຳ​ລົງ 250 ຕຳແໜ່ງ​ງານ ຢູ່​ໃນ​ດິນແດນ​ປາ​ແລັດ​ສະ​ຕິນ ຍ້ອນ​ວ່າ​ຂາດ​ແຫຼ່ງ​ການ​ເງິນ.

 

ຂ່າວທີ່ກ່ຽວຂ້ອງ