ຂ່າວຫຼ້າສຸດ

ສິງກະໂປ-ມາ​ເລ​ເຊຍ ເຈລະຈາ​ກ່ຽວ​ກັບ​ໂຄງການ​ທາງ​ລົດໄຟ​ຄວາມ​ໄວ​ສູງ

255 20 ສ.ຫ. 2018 ຂ່າວຕ່າງປະເທດ
ສິງກະໂປ-ມາ​ເລ​ເຊຍ ເຈລະຈາ​ກ່ຽວ​ກັບ​ໂຄງການ​ທາງ​ລົດໄຟ​ຄວາມ​ໄວ​ສູງ

    ຂໍ້​ມູນ​ຈາກ​ກະຊວງ​ຄົມມະນາຄົມ ຂົນສົ່ງ ຂອງ​ສິງກະໂປ ໃຫ້​ຮູ້​ວ່າ ບັນດາ​ເຈົ້າ​ໜ້າທີ່​ຂອງ​ສິງກະໂປ ໄດ້​ປຶກສາ​ຫາລື​ກັບ​ຝ່າຍ​ມາ​ເລ​ເຊຍ ກ່ຽວ​ກັບ​ໂຄງການ​ທາງ​ລົດໄຟ​ຄວາມ​ໄວ​ສູງ​ເຊື່ອມ​ຈອດ​ລະຫວ່າງ​ສອງ​ປະເທດ.

    ຂ່າວ​ແຈ້ງວ່າ ການ​ປຶກສາ​ຫາລື​ດັ່ງກ່າວ ມີ​ຂຶ້ນ​ຫຼັງ​ຈາກ​ທີ່​ລັດຖະບານ​ສິງກະໂປ ເລັ່ງ​ຊຸກຍູ້​ໃຫ້​ມາ​ເລ​ເຊຍ ໃຫ້​ຄວາມ​ກະຈ່າງ​ແຈ້ງ ກ່ຽວ​ກັບ​ບັນຫາ​ຕ່າງໆ​ທີ່​ກ່ຽວຂ້ອງ​ເຖິງ​ໂຄງການ​ທາງ​ລົດໄຟ​ດັ່ງກ່າວ ຊຶ່ງ​ມີ​ມູນ​ຄ່າ 28 ຕື້​ໂດ​ລາ​ສະຫະລັດ.

    ໃນ​ຂະນະ​ດຽວ​ກັນ ທ່ານ ແອນ​ໂທ​ນີ ລອກ ລັດຖະມົນຕີ​ຄົມມະນາຄົມ​ຂອງ​ມາ​ເລ​ເຊຍ ເວົ້າ​ວ່າ ການ​ປະຊຸມ​ດັ່ງກ່າວ ຈັດ​ຂຶ້ນ​ເພື່ອ​ແກ້​ໄຂ​ບັນດາ​ບັນຫາ​ທີ່​ພົວພັນ​ເຖິງ​ໂຄງການ ແລະ ວ່າ​ບົດ​ລາຍ​ງານ​ລະອຽດ ຈະ​ໄດ້​ນຳ​ສະເໜີ​ຕໍ່​ຄະນະ​ລັດຖະບານ​ມາ​ເລ​ເຊຍ.

    ກ່ອນ​ໜ້າ​ນັ້ນ ທ່ານ ຄໍ ບູນ ວານ ລັດຖະມົນຕີ​ກະຊວງ​ຄົມມະນາຄົມ​ຂອງ​ສິງກະໂປ ກ່າວ​ຕໍ່​ສະພາ​ແຫ່ງ​ຊາດ​ສິງກະໂປ ວ່າ​ຝ່າຍ​ສິງກະໂປ​ໄດ້​ສົ່ງ​ສານ​ການ​ທູດ ສະເໜີ​ໃຫ້​ມາ​ເລ​ເຊຍ​ໃຫ້​ຄວາມ​ກະຈ່າງ​ແຈ້ງ​ທັນທີ ກ່ຽວ​ກັບ​ຫຼັກ​ໝັ້ນ​ທີ່​ມີ​ຕໍ່​ໂຄງການ​ທາງ​ລົດໄຟ​ຄວາມ​ໄວ​ສູງ​ດັ່ງກ່າວ. ພ້ອມ​ກັນ​ນັ້ນ ທ່ານ ຄໍ ບູນ ວານ ກໍ​ຊີ້​ແຈງ​ວ່າ ຖ້າ​ຫາ​ກວ່າ​ຝ່າຍ​ມາ​ເລ​ເຊຍ ຕົກລົງ​ງົດ​ໂຄງການ​ລຳພັງ​ພຽງ​ຝ່າຍ​ດຽວ ສິງກະໂປ​ກໍ​ຈະ​ສະເໜີ​ໃຫ້​ຈ່າຍ​ຄ່າ​ຊົດ​ເຊີຍ ຕາມ​ຂໍ້ຄວາມ​ຂອງ​ສັນຍາ​ລະຫວ່າງ​ສອງ​ຝ່າຍ ກ່ຽວ​ກັບ​ທາງ​ລົດໄຟ​ຄວາມ​ໄວ​ສູງ ຊຶ່ງ​ໄດ້​ລົງ​ນາມ​ເມື່ອ​ປີ 2016 ກໍ​ຄື​ຕາມ​ກົດໝາຍ​ສາກົນ.

    ຕາມ​ແຜນການ​ເບື້ອງ​ຕົ້ນ​ແລ້ວ ທາງ​ລົດໄຟ​ຄວາມ​ໄວ​ສູງ ທີ່​ເຊື່ອມ​ຈອດ​ສອງ​ປະເທດ​ດັ່ງກ່າວ ມີ​ຄວາມ​ຍາວ 350 ​ກມ ໂດຍ​ຄາດ​ວ່າ​ຈະ​ນຳ​ເຂົ້າ​ສູ່​ການເຄື່ອນໄຫວ​ໃນ​ປີ 2026 ເປັນ​ການ​ຊ່ວຍ​ຫຼຸດ​ເວລາ​ການ​ເດີນທາງ​ໄປ​ມາ​ລະຫວ່າງ​ປະຊາຊົນ​ສອງ​ປະເທດ ຈາກ​ປະມານ 5 ຊົ່ວໂມງ​ດັ່ງ​ໃນ​ປັດຈຸບັນ ລົງ​ໄປ​ຍັງ​ເຫຼືອ 90 ນາທີ.

    ທ່ານ ຄໍ ບູນ ວານ ໃຫ້​ຮູ້​ວ່າ ປັດຈຸບັນ​ນີ້ ສິງກະໂປ​ຍັງ​ຄົງ​ສືບຕໍ່​ຈັດ​ສັນ​ຄ່າ​ໃຊ້​ຈ່າຍ​ໃຫ້​ແກ່​ໂຄງການ​ດັ່ງກ່າວ ໂດຍ​ຄາດ​ວ່າ​ຈະ​ມີ​ເຖິງ 300 ລ້ານ​ໂດ​ລາ​ສິງກະໂປ (ເທົ່າ​ກັບ​ປະມານ​ເກືອບ  220 ລ້ານ​ໂດ​ລາ​ສະຫະລັດ) ພາຍ​ໃນ​ທ້າຍ​ປີ​ນີ້.

 

ຂ່າວທີ່ກ່ຽວຂ້ອງ