ຂ່າວຫຼ້າສຸດ

ເອ​ຢິບ ເປີດ​ເຂດ​ອຸດສາຫະກຳ​ປະສົມ​ຂະໜາດ​ໃຫຍ່​ທີ່​ສຸດ​ຢູ່​ໃນ​ເຂດ​ຕາເວັນ​ອອກ​ກາງ

167 20 ສ.ຫ. 2018 ຂ່າວຕ່າງປະເທດ
ເອ​ຢິບ ເປີດ​ເຂດ​ອຸດສາຫະກຳ​ປະສົມ​ຂະໜາດ​ໃຫຍ່​ທີ່​ສຸດ​ຢູ່​ໃນ​ເຂດ​ຕາເວັນ​ອອກ​ກາງ

     ເມື່ອ​ວັນ​ທີ 15 ສິງຫາ​ທີ່​ຜ່ານ​ມາ ປະທານາທິບໍດີ​ເອ​ຢິບ ອັບ​ເດລ ຟັດ​ຕາ ແອ​​ລ-ຊີ​ຊີ ໄດ້​ເຂົ້າ​ຮ່ວມ​ພິທີ​ເປີດ​ເຂດ​ອຸດສາຫະກຳ​ປະສົມ ຜະລິດ​ຊີມັງ ແລະ ​ຫີນ​ອ່ອນ ທີ່​ມີ​ຂະໜາດ​ໃຫຍ່​ທີ່​ສຸດ​ຢູ່​ໃນ​ເຂດ​ຕາເວັນ​ອອກ​ກາງ ຊຶ່ງ​ຕັ້ງ​ຢູ່​ໃນ​ແຂວງ ເບ​ນີ ຊູ​ເອ​​ຟ ຄື​ກັບ​ວ່າ​ເປັນ​ສ່ວນ​ໜຶ່ງ ຢູ່​ໃນ​ບັນດາ​ແຜນການ​ພັດທະນາ​ຂອງ​ລັດຖະບານ​ເອ​ຢິບ.

    ເຂດ​ອຸດສາຫະກຳ​ປະສົມ​ດັ່ງກ່າວ ມີ​ເນື້ອທີ່ 5​ກມ2 ແລະ ​ມີ​ຍອດ​ການ​ລົງທຶນ 1,1 ຕື້​ໂດ​ລາ​ສະຫະລັດ ປະກອບ​ມີ​ໂຮງງານ​ຜະລິດ​ຊີມັງ 3 ແຫ່ງ ດ້ວຍ​ຍອດ​ກຳລັງ​ການ​ຜະລິດ 12 ລ້ານ​ໂຕນ/ປີ ຫຼື​ເທົ່າ​ກັບ 37.000 ໂຕນ/ວັນ. ນອກຈາກ​ນັ້ນແລ້ວ ຍັງ​ມີ​ໂຮງງານ​ຜະລິດ​ຫີນ​ອ່ອນ 5 ແຫ່ງ ແລະ ​ໂຮງງານ​ຜະລິດ​ຫີນ​ກຣາ​ນິດ 2 ແຫ່ງ ດ້ວຍ​ຍອດ​ກຳລັງ​ການ​ຜະລິດ 3,6 ລ້ານ​ແມັດ​ມົນທົນ/ປີ.

    ໂດຍ​ຜ່ານ​ກົມ​ເຕັກນິກ​ຂອງ​ກອງ​ກຳລັງ​ປະກອບ​ອາວຸດ (AFEA) ເອ​ຢິບ​ໄດ້​ຮ່ວມ​ມື​ກັບ 20 ບໍລິສັດ​ພາຍ​ໃນ ແລະ​ຕ່າງປະເທດ ໃນ​ການ​ຜັນ​ຂະຫຍາຍ​ໂຄງການ​ອັນ​ໃຫຍ່​ໂຕ​ດັ່ງກ່າວ ໃນ​ນັ້ນ​ມີ​ການ​ເຂົ້າ​ຮ່ວມ​ຂອງ​ບໍລິສັດ CDI (ຂອງ​ຈີນ). ເວລາ​ຂອງ​ການ​ປະຕິບັດ​ໂຄງການ​ດັ່ງກ່າວ ມີ​ກຳນົດ​ແກ່ຍາວ​ເປັນ​ເວລາ 21 ເດືອນ.

    ໂຄງການ​ດັ່ງກ່າວ ຈະ​ສ້າງ​ວຽກ​ເຮັດ​ງານ​ທຳ​ໂດຍ​ກົງ​ຂຶ້ນ​ມາ​ປະມານ 3.000 ຕຳແໜ່ງ​ງານ ແລະ​ໂດຍ​ທາງ​ອ້ອມ 10.000 ຕຳແໜ່ງ​ງານ ໃຫ້​ແກ່​ຜູ້​ອອກແຮງ​ງານ ຢູ​ໃນ​ເຂດ​ພາກ​ເໜືອ ເອ​ຢິບ.

    ປະທານາທິບໍດີ ອັບ​ເດລ ຟັດ​ຕາ ແອ​​ລ-ຊີ​ຊີ ກ່າວ​ຢູ່​ໃນ​ພິທີ​ດັ່ງກ່າວ ໂດຍ​ໄດ້​ໃຫ້​ຮູ້​ຕື່ມ​ວ່າ ລັດຖະບານ​ເອ​ຢິບ ພວມ​ພັດທະນາ​ແຜນການ​ສັງ​ລວມ ໃນ​ຂົງເຂດ​ກະສິກຳ ໃຫ້​ແກ່​ຊາວ​ໜຸ່ມ ຢູ່​ໃນ​ເຂດ​ພາກ​ເໜືອ​ເອ​ຢິບ ໂດຍ​ປະກອບ​ມີ​ແຂວງ ເບ​ນີ​ຊູ​ເອ​​ຟ ມິນ​ຢາ ອາຊີ​ອຸ​​ສ ແລະ ຊໍ​ຮັກ.

 

ຂ່າວທີ່ກ່ຽວຂ້ອງ