ສະພາ​ແຫ່ງ​ຊາດ ນູ​ແວນ ເຊ​ລັງ ຮັບຮອງ​ກົດໝາຍ​ວ່າ​ດ້ວຍ​ການ​ຫ້າມ​ຊື້​ເຮືອນ​ສຳລັບ​ຄົນ​ຕ່າງປະເທດ

208 20 ສ.ຫ. 2018 ຂ່າວຕ່າງປະເທດ
ສະພາ​ແຫ່ງ​ຊາດ ນູ​ແວນ ເຊ​ລັງ ຮັບຮອງ​ກົດໝາຍ​ວ່າ​ດ້ວຍ​ການ​ຫ້າມ​ຊື້​ເຮືອນ​ສຳລັບ​ຄົນ​ຕ່າງປະເທດ

    ເມື່ອ​ຄ່ຳ​ຄືນ​ຂອງ​ວັນ​ທີ 15 ສິງຫາ​ທີ່​ຜ່ານ​ມາ ສະພາ​ແຫ່ງ​ຊາດ​ຂອງ​ນູ​ແວນ ເຊ​ລັງ ໄດ້​ຮັບຮອງ​ດ້ວຍ​ຄະແນນ​ສຽງ 63/57 ສຳລັບ​ກົດໝາຍ​ວ່າ​ດ້ວຍ​ການ​ລົງທຶນ​ຂອງ​ຕ່າງປະເທດ​ສະບັບ​ດັດແກ້ ຊຶ່ງ​ຕາມ​ນັ້ນແລ້ວ​ກໍ​ແມ່ນ ຫ້າມ​ຄົນ​ຕ່າງປະເທດ​ຊື້​ເຮືອນ​ຢູ່​ໃນ ນູ​ແວນ ເຊ​ລັງ.

    ກົດໝາຍ​ສະບັບ​ດັດແກ້​ດັ່ງກ່າວ ຊຶ່ງ​ລັດຖະບານ ພາຍ​ໃຕ້​ການ​ນຳພາ​ຂອງ​ນາຍົກລັດຖະມົນຕີ ຈາ​ຊິນ​ດາ ອາ​ເດິນ ນຳ​ອອກ​ມາ​ເມື່ອ​ເດືອນ​ຕຸລາ​ປີ​ກາຍ ແມ່ນ​ເພື່ອ​ຊ່ວຍເຫຼືອ​ປະຊາຊົນ ນູ​ແວນ ເຊ​ລັງ ໃນ​ການ​ຊື້​ອະສັງຫາລິມະ​ຊັບ ດ້ວຍ​ລາຄາ​ທີ່ແທ້​ຈິງ.

    ກົດໝາຍ​ສະບັບ​ດັດແກ້​ດັ່ງກ່າວ ລະບຸ​ວ່າ ຄົນ​ຕ່າງປະເທດ ບໍ່​ສາມາດ​ທີ່​ຈະ​ຈັດ​ຊື້​ເອົາ​ສ່ວນ​ໃຫຍ່​ຂອງ​ອາຄານ​ປະເພດ​ຕ່າງໆ​ຢູ່​ໃນ ນູ​ແວນ ເຊ​ລັງ ໂດຍ​ຍົກເວັ້ນ​ແຕ່​ປະເພດ​ຫ້ອງ​ແຖວ​ທີ່​ຫາ​ກໍ​ໄດ້​ຮັບ​ການ​ກໍ່ສ້າງ ຢູ່​ໃນ​ເຂດ​ທີ່​ໄດ້​ກຳນົດ​ການ​ພັດທະນາ​ຂະໜາດ​ໃຫຍ່ ຫຼື​ບໍ່​ກໍ​ແມ່ນ​ອາຄານ​ທີ່​ມີ​ຫຼາຍ​ຊັ້ນ. ເຖິງ​ຢ່າງໃດ​ກໍ​ຕາມ ພົນລະເມືອງ​ຂອງ​ອົດ​ສະ​ຕຣາ​ລີ ແລະ​ສິງກະໂປ ແມ່ນ​ໄດ້​ຮັບ​ການ​ຍົກເວັ້ນ​ອອກ​ຈາກ​ຄຳ​ສັ່ງ​ຫ້າມ​ດັ່ງກ່າວ ເນື່ອງ​ຈາ​ກວ່າ​ສອງ​ຝ່າຍ​ມີ​ຂໍ້​ກຳນົດ​ສະເພາະ​ກ່ຽວ​ກັບ​ການ​ຄ້າ​ເສລີ.

    ສະຖິຕິ​ຂອງ​ອົງການ Stats NZ ຊີ້​ໃຫ້​ເຫັນ​ວ່າ ໃນ​ເດືອນ​ມິຖຸນາ ປີ 2017 ມີ 82% ຂອງ​ຈຳນວນ​ເຮືອນ​ທີ່​ຊື້​ຂາຍ​ຢູ່​ໃນ ນູ​ແວນ ເຊ​ລັງ​​ບ ແມ່ນ​ປະຕິບັດ​ໂດຍ​ພົນລະເມືອງ​ຂອງ ນູ​ແວນ ເຊ​ລັງ ໃນ​ຂະນະ​ທີ່ 16% ຂຶ້ນ​ກັບ​ບັນດາ​ວິ​ສາ​ຫະ​ກິດ ຫຼື​ກຸ່ມ​ບໍລິສັດ ໂດຍ​ແມ່ນ​ຊາວ ນູ​ແວນ ເຊ​ລັງ ເປັນ​ຜູ້​ຄອບ​ຄອງ ແລະ​ມີ​ພຽງ​ປະມານ 2% ຂອງ​ຈຳນວນ​ເຮືອນ​ທີ່​ໄດ້​ຊື້​ໄປ ບໍ່​ແມ່ນ​ໂດຍ​ພົນລະເມືອງ​ຂອງ ນູ​ແວນ ເຊ​ລັງ ໃນ​ນັ້ນ ສ່ວນ​ຫຼາຍ​ເປັນ​ຂອງ​ຄົນ​ຈີນ ແລະ ອົດ​ສະ​ຕຣາ​ລີ.

 

ຂ່າວທີ່ກ່ຽວຂ້ອງ