ຂ່າວຫຼ້າສຸດ

ປະທານປະເທດ ເນັ້ນແຂວງຄຳມ່ວນ ແຈກຢາຍເຄື່ອງຊ່ວຍເຫຼືອໃຫ້ຜູ້ປະສົບໄພຢ່າງທົ່ວເຖິງ

865 17 ສ.ຫ. 2018 ຂ່າວໜ້າ​ໜຶ່ງ
ປະທານປະເທດ ເນັ້ນແຂວງຄຳມ່ວນ ແຈກຢາຍເຄື່ອງຊ່ວຍເຫຼືອໃຫ້ຜູ້ປະສົບໄພຢ່າງທົ່ວເຖິງ

    ທ່ານ ບຸນ​ຍັງ ວໍ­ລະ​ຈິດ ປະ­ທານ​ປະ­ເທດ ພ້ອມ​ດ້ວຍ​ທ່ານ​ຮອງ​ນາ­ຍົກ­ລັດ­ຖະ­ມົນ­ຕີ ບັນ­ດາ​ລັດ­ຖະ­ມົນ­ຕີ​ກະ­ຊວງ​ຕ່າງໆ ເຄື່ອນ​ໄຫວ​ຢ້ຽມ­ຢາມ ແລະ ຕິດ­ຕາມ​ກ່ຽວ​ກັບ​ສະ­ພາບ​ນ້ຳ​ຖ້ວມ​ຢູ່​ແຂວງ​ຄຳ​ມ່ວນ ວັນ​ທີ 16 ສິງ­ຫາ 2018 ໂດຍ​ໄດ້​ຮັບ​ການ​ຕ້ອນ­ຮັບ​ຈາກ​ທ່ານ ໂອ​ໄດ ສຸ­ດາ​ພອນ ເຈົ້າ­ແຂວງ​ຄຳ​ມ່ວນ ພ້ອມ​ດ້ວຍ​ບັນ­ດາ​ການ​ນຳ​ແຂວງ ເມືອງ ແລະ ພະ­ແນກ­ການ​ອ້ອມ​ຂ້າງ.

    ທ່ານ ໂອ​ໄດ ສຸ­ດາ​ພອນ ກ່າວ​ວ່າ: ປີ 2018 ແຂວງ​ຄຳ​ມ່ວນ ໄດ້​ຮັບ​ຕົວ​ເລກ​ສູ້​ຊົນ​ການ​ເກັບ​ລາຍ​ຮັບ 689 ຕື້​ກີບ ໃນ​ນີ້​ພູດ​ຂອງ​ສູນ​ກາງ 387 ຕື້​ກີບ ພູດ​ທ້ອງ­ຖິ່ນ 302 ຕື້​ກີບ ຜ່ານ​ການ​ຈັດ​ເກັບ​ລາຍ​ຮັບ​ມາ​ຮອດ​ວັນ​ທີ 14 ສິງ­ຫາ 2018 ປະ­ຕິ­ບັດ​ໄດ້ 408 ຕື້​ກີບ ເທົ່າ​ກັບ 59,21% ໃນ​ນີ້​ພູດ​ສູນ​ກາງ 237 ຕື້​ກີບ ເທົ່າ​ກັບ 61,36% ພູດ​ທ້ອງ­ຖິ່ນ 170 ຕື້​ກີບ ເທົ່າ​ກັບ 56,45% ຂອງ​ແຜນ­ການ​ປີ ເລີ່ມ​ແຕ່​ຕົ້ນ​ເດືອນ​ກໍ­ລະ­ກົດ 2018 ໄດ້​ມີ​ຝົນ­ຕົກ​ຕິດ­ຕໍ່​ກັນ​ຫຼາຍ​ວັນ ເຮັດ​ໃຫ້​ລະ­ດັບ​ນ້ຳ​ໃນ​ແມ່­ນ້ຳ​ຕ່າງໆ ໂດຍ​ສະ­ເພາະ ນ້ຳ​ເຊ​ບັ້ງ­ໄຟ ລວມ​ເຖິງ​ສາຍ​ນ້ຳ​ທີ່​ເປັນ​ສາ­ຂາ​ເພີ່ມ​ສູງ​ຂຶ້ນ​ກາຍ​ເຂດ​ອັນ­ຕະ­ລາຍ ແລະ ໄຫຼ​ລົ້ນ​ຝັ່ງ​ເຂົ້າ​ຖ້ວມ​ເນື້ອ­ທີ່​ການ​ຜະ­ລິດ ເຮືອນ​ປະ­ຊາ­ຊົນ ແລະ ສິ່ງ​ປຸກ​ສ້າງ​ອື່ນໆ ໃນ​ນີ້ ບ້ານ​ທີ່​ໄດ້​ຮັບ​ຜົນ​ກະ­ທົບ​ມີ 420 ບ້ານ 27.010 ຄອບ­ຄົວ ໃນ​ນີ້ ບ້ານ​ທີ່​ໄດ້​ຮັບ​ຜົນ​ກະ­ທົບ​ແຮງ ​ໄດ້​ຍ້າຍ​ປະ­ຊາ­ຊົນ​ອອກ​ໄປ​ຢູ່​ຕາມ​ຈຸດ​ພັກ​ເຊົາ​ຊົ່ວ­ຄາວ ແລະ ຍ້າຍ​ໄປ​ຢູ່​ນຳ​ພີ່­ນ້ອງ​ມີ 34 ບ້ານ 7.300 ຄົນ (ປັດ­ຈຸ­ບັນ​ໄດ້​ກັບ​ຄືນ​ເມືອ​ຢູ່​ເຮືອນ​ຕົນ​ເອງ​ແລ້ວ) ສ່ວນ​ເນື້ອ­ທີ່​ນາ​ຖືກ​ຖ້ວມ​ມີ 36.965 ເຮັກ­ຕາ ເທົ່າ​ກັບ 45% ຂອງ​ເນື້ອ­ທີ່​ນາ​ປັກ​ດຳ​ຕົວ​ຈິງ ຄາດ​ຄະ­ເນ​ຄວາມ​ເສຍ​ຫາຍ 21.579 ເຮັກ­ຕາ ເນື້ອ­ທີ່​ພືດ​ລະ­ດູ­ຝົນ 802 ເຮັກ­ຕາ ຄາດ​ຄະ­ເນ​ຄວາມ​ເສຍ​ຫາຍ 598 ເຮັກ­ຕາ ນອກ​ນີ້ ຍັງ​ມີ​ສັດ­ລ້ຽງ​ຕາຍ​ຄື: ຄວາຍ 79 ໂຕ ງົວ 243 ໂຕ ແບ້ 325 ໂຕ ໝູ 292 ໂຕ ສັດ​ປີກ 11.322 ໂຕ ໜອງ​ປາ​ຖືກ​ຖ້ວມ 833 ໜອງ ຊົນ­ລະ­ປະ­ທານ 131 ແຫ່ງ ໂຮງ­ຮຽນ 81 ແຫ່ງ ວັດ 36 ແຫ່ງ ສຸກ­ສາ­ລາ 11 ແຫ່ງ ເສັ້ນ­ທາງ​ບາງ​ເສັ້ນ​ຖືກ​ປິດ​ການ​ສັນ­ຈອນ​ຊົ່ວ­ຄາວ ແລະ ຖືກ​ຕັດ­ຂາດ​ເສຍ​ຫາຍ​ຫຼາຍ​ຈຸດ.

    ສຳ­ລັບ​ການ​ປຸກ­ລະ­ດົມ​ເຄື່ອງ​ຊ່ວຍ­ເຫຼືອ ແມ່ນ​ມີ​ຫຼາຍ​ພາກ­ສ່ວນ​ພາຍ​ໃນ ແລະ ຕ່າງ­ປະ­ເທດ ໄດ້​ໃຫ້­ການ​ຊ່ວຍ­ເຫຼືອ​ຢ່າງ​ເປັນ​ຂະ​ບວນ ເຊິ່ງ​ເລີ່ມ​ແຕ່​ວັນ​ທີ 14 ກໍ­ລະ­ກົດ-15 ສິງ­ຫາ 2018 ລວມ​ມູນ​ຄ່າ 7 ຕື້​ກວ່າ​ກີບ ໃນ​ນີ້ ເງິນ 1 ຕື້​ກວ່າ​ກີບ ເງິນ​ບາດ 478.600 ບາດ ໃນ​ນີ້ ໄດ້​ນຳ​ເຄື່ອງ​ອຸ­ປະ­ໂພກ-ບໍ­ລິ­ໂພກ ໄປ​ຊ່ວຍ​ແຂວງ​ອັດ​ຕະ​ປື 2 ຄັ້ງ ລວມ​ມູນ​ຄ່າ 385 ລ້ານ​ກີບ ເປັນ​ເງິນ 185 ລ້ານ​ກີບ ແລະ ໄດ້​ແຈກ​ຢາຍ​ລົງ​ຊ່ວຍ­ເຫຼືອ​ບັນ­ດາ​ເມືອງ​ພາຍ​ໃນ​ແຂວງ​ຄຳ​ມ່ວນ ລວມ​ມີ​ວັດ­ຖຸ ແລະ ເງິນ ມູນ​ຄ່າ 5 ຕື້​ກວ່າ​ກີບ.

    ໂອ­ກາດ​ນີ້ ທ່ານ​ປະ­ທານ​ປະ­ເທດ ກໍ່​ໄດ້​ໂອ້​ລົມ ເຊິ່ງ​ທ່ານ​ໄດ້​ເນັ້ນ​ໃຫ້​ເອົາ­ໃຈ­ໃສ່​ປົກ​ປັກ​ຮັກ­ສາ​ເຄື່ອງ​ຊ່ວຍ­ເຫຼືອ ແລະ ນຳ​ແຈກ​ຢາຍ​ໃຫ້​ຜູ້​ໄດ້​ຮັບ​ຜົນ​ກະ­ທົບ​ຢ່າງ​ທົ່ວ​ເຖິງ ປັບ­ປຸງ-ປົວ­ແປງ​ບັນ­ດາ​ພື້ນ­ຖານ​ໂຄງ​ລ່າງ ໂດຍ​ມີ​ການ​ຈັດ​ລຽງ​ບຸ­ລິ­ມະ­ສິດ​ໃນ​ສິ່ງ​ທີ່​ຈຳ­ເປັນ ເປັນ­ຕົ້ນ ເສັ້ນ­ທາງ ສຸກ­ສາ­ລາ ໂຮງ­ຮຽນ ລະ­ບົບ​ຊົນ­ລະ­ປະ­ທານ​ທີ່​ເປ່​ເພ ຕິດ­ຕາມ​ກວດ­ກາ​ອ່າງ­ເກັບ­ນ້ຳ​ແຕ່​ລະ​ບ່ອນ ເພື່ອ​ຄວາມ​ຮັບ­ປະ­ກັນ​ຕື່ມ ສືບ­ຕໍ່​ພື້ນ​ຟູ​ຊີ­ວິດ​ການ​ເປັນ​ຢູ່​ຂອງ​ຜູ້​ໄດ້​ຮັບ​ຜົນ​ກະ­ທົບ​ໃຫ້​ເຂົ້າ​ສູ່​ສະ­ພາບ​ປົກ­ກະ­ຕິ​ໂດຍ​ໄວ ຊຸກ­ຍູ້​ປຸກ­ລະ­ດົມ​ໃຫ້​ເຂົາ­ເຈົ້າ​ທຳ​ການ​ຜະ­ລິດ ໂດຍ​ຕິດ​ພັນ​ກັບ​ຕະ­ຫຼາດ​ຈຳ­ໜ່າຍ ເພື່ອ​ທົດ​ແທນ​ກັບ​ຜົນ​ຜະ­ລິດ​ທີ່​ເສຍ​ຫາຍ ກະ­ກຽມ​ແນວ​ພັນ​ເຂົ້າ-ແນວ​ພັນ​ພືດ ເພື່ອ​ສະ­ໜອງ​ໃຫ້​ເຂົາ­ເຈົ້າເອົາ­ໃຈ­ໃສ່​ຕິດ­ຕາມ​ກ່ຽວ​ກັບ​ພະ­ຍາດ​ຕ່າງໆ​ທີ່​ອາດ​ຈະ​ເກີດ​ຂຶ້ນພາຍ­ຫຼັງ​ນ້ຳ​ບົກ​ແຫ້ງ ນອກ​ນີ້ ກໍ່​ໃຫ້​ເອົາ­ໃຈ­ໃສ່​ກ່ຽວ​ກັບ​ບັນ­ຫາ​ຄວາມ​ບໍ່​ສະ­ຫງົບ ຄວາມ​ບໍ່​ເປັນ​ລະ­ບຽບ​ຮຽບ​ຮ້ອຍທີ່​ເປັນ​ບັນ­ຫາ​ສຳ­ຄັນ​ໃນ​ປັດ­ຈຸ­ບັນ ລວມ​ທັງ​ເອົາ­ໃຈ­ໃສ່​ໃນ​ການ​ກະ­ກຽມ​ໃຫ້​ແກ່​ກອງ​ປະ­ຊຸມ 3 ຂັ້ນ ເພື່ອ​ຮັບ­ປະ­ກັນ​ຈັດ​ຕັ້ງ​ປະ­ຕິ­ບັດ​ໃຫ້​ຖືກ­ຕ້ອງ ແລະ ວຽກ​ງານ​ກໍ່­ສ້າງ​ພະ­ນັກ­ງານ​ສືບ​ທອດ​ປ່ຽນ​ແທນ.

ໂອ­ກາດ​ນີ້ ​ທ່ານ​ປະ­ທານ​ປະ­ເທດ ຍັງ​ໄດ້​ມອບ​ເງິນ 300 ລ້ານ​ກີບ ຊ່ວຍ­ເຫຼືອ​ໄພ­ພິ­ບັດ​ນ້ຳ​ຖ້ວມ​ຢູ່​ແຂວງ​ຄຳ​ມ່ວນ ຕື່ມ​ອີກ.

ຂ່າວທີ່ກ່ຽວຂ້ອງ