ຂ່າວຫຼ້າສຸດ

ສ້າງຄວາມເຂົ້າໃຈ ວຽກງານຄຸ້ມຄອງເຕັກໂນໂລຊີດ້ານນິວເຄຼຍ

165 17 ສ.ຫ. 2018 ຂ່າວໜ້າ​ໜຶ່ງ

    ນິວ​ເຄຼຍ ຟັງ​ແລ້ວ​ມີ​ຫຼາຍ​ຄົນ​ຄົງ​ຮູ້­ສຶກ​ຢ້ານ ແລະ ຕົກ­ໃຈ ເນື່ອງ​ຈາກ​ນິວ​ເຄຼຍ ມັກ​ຖືກ​ນຳ​ໃຊ້ ຫຼື ໄດ້​ຮັບ​ຮູ້​ໃນ​ກໍ­ລະ­ນີ​ເກີດ​ເຫດ­ການ​ທີ່​ມີ​ຄວາມ​ສູນ​ເສຍ​ຕໍ່​ຊີ­ວິດ ແລະ ຊັບ​ສິນ​ຂອງ​ຄົນ​ເຮົາ ແຕ່​ນິວ​ເຄຼຍ ຍັງ​ມີ​ປະ­ໂຫຍດ​ຢ່າງ​ໃຫຍ່​ຫຼວງ ​ຕໍ່​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ຫຼາຍ​ປະ­ເທດ ຖ້າ​ເຮົາ​ມີ​ການ​ເກັບ​ຮັກ­ສາ ແລະ ນຳ​ໃຊ້​ຖືກ​ວິ­ທີ ນິວ​ເຄຼຍ​ກໍ່​ຈະ​ເປັນ​ປະ­ໂຫຍດ​ທີ່​ສຸດ​ ໃນ​ການ​ພັດ­ທະ­ນາ​ຮອບ­ດ້ານ.

    ສະ​ຖາ​ບັນ​ຄຸ້ມ​ຄອງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ກະ­ຊວງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ຈັດ​ສຳ​ມະ​ນາ​ສ້າງ​ຄວາມ​ຮັບ​ຮູ້-ຄວາມ​ເຂົ້າ­ໃຈ ​ກ່ຽວ​ກັບ​ວຽກ​ງານ​ຄຸ້ມ​ຄອງ​ຄວາມ​ປອດ​ໄພ ແລະ ການ​ນຳ​ໃຊ້​ວິ­ທະ­ຍາ­ສາດ ເຕັກ​ໂນ​ໂລ​ຊີ​ດ້ານ​ນິວ​ເຄຼຍ ຂຶ້ນ​ວັນ​ທີ 16-17 ສິງ­ຫາ 2018 ຢູ່​ສະ​ຖາ​ບັນ​ດັ່ງ­ກ່າວ ໂດຍ​ເປັນ​ປະ­ທານ​ຂອງ​ທ່ານ ບໍ່​ວຽງ​ຄຳ ວົງ​ດາ­ລາ ລັດ­ຖະ­ມົນ­ຕີ​ກະ­ຊວງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ມີ​ທ່ານ ສັນ­ຍາ ປຣະ​ເສີດ ຮອງ​ປະ­ທານ​ຄະ­ນະ​ກຳ­ມາ​ທິ​ການ​ເສດ­ຖະ­ກິດ ວິ­ທະ­ຍາ­ສາດ-ເຕັກ​ໂນ​ໂລ​ຊີ ແລະ ສິ່ງ­ແວ­ດລ້ອມ ສະ­ພາ​ແຫ່ງ​ຊາດ ພ້ອມ​ດ້ວຍ​ບັນ­ດາ​ຜູ້­ຕາງ­ໜ້າ​ຈາກ​ກະ­ຊວງ ອົງ­ການ ແລະ ແຂວງ​ເປົ້າ​ໝາຍ​ເຂົ້າ​ຮ່ວມ.

    ເປົ້າ​ໝາຍ​ສຳ­ຄັນ​ຂອງ​ສຳ​ມະ​ນາ​ຄັ້ງ​ນີ້ ເພື່ອ​ສ້າງ​ຄວາມ​ຮັບ​ຮູ້ ແລະ ເຂົ້າ­ໃຈ​ແກ່​ບັນ­ດາ​ຂະ­ແໜງການ​ກ່ຽວ­ຂ້ອງ​ ທັງ​ສູນ​ກາງ-ທ້ອງ­ຖິ່ນ ໃຫ້​ເຫັນ​ໄດ້​ເຖິງ​ຄວາມ​ສຳ­ຄັນ​ຂອງ​ວຽກ​ງານ​ຄຸ້ມ​ຄອງ​ຄວາມ​ປອດໄພ​ທາງ​ດ້ານ​ນິວ​ເຄຼຍ ແລະ ການ​ມີ​ສ່ວນ​ຮ່ວມ​ປະ­ຕິ­ບັດ​ສົນ­ທິ­ສັນ­ຍາ ແລະ ບັນ­ດາ​ຂໍ້​ຕົກ­ລົງ​ສາ­ກົນ ທີ່ ສປປ ລາວ ເປັນ​ພາ­ຄີ ພ້ອມ​ນີ້ຍັງ​ເປັນ​ການ​ແລກ­ປ່ຽນ​ບົດ­ຮຽນ ປະ­ສົບ​ການ ແລະ ພຶດ­ຕິ​ກຳ​ຕົວ​ຈິງ​ຈາກ​ຊ່ຽວ­ຊານ ໂດຍ​ສະ­ເພາະ ການ​ສ້າງ​ຮ່າງ​ກົດ­ໝາຍ​ວ່າ​ດ້ວຍ​ຄວາມ​ປອດ​ໄພ​ດ້ານ​ລັງ­ສີ ການ​ລະ­ດົມ​ຄວາມ​ຄິດ​ກ່ຽວ​ກັບ​ການ​ກຳ­ນົດ​ວຽກ​ບຸ­ລິ­ມະ­ສິດ​ຂອງ​ຂະ­ແໜງ­ການ ເພື່ອ​ປະ­ກອບ​ໃນ​ການ​ປັບ­ປຸງ​ຮ່າງ​ແຜນ​ຮ່ວມ​ມື ລະ­ຫວ່າງ​ລັດ­ຖະ­ບານ​ລາວກັບ​ອົງ­ການ IAEA ສາ­ກົນ ເຊິ່ງ​ສຳ​ມະ​ນາ​ຄັ້ງ​ນີ້ ຈະ​ລົງ​ເລິກ​ບັນ­ດາ​ແຜນ​ວຽກ​ເອ­ກະ­ສານ ຂໍ້​ກຳ­ນົດ ແລະ ລະ­ບຽບ​ການ​ຕ່າງໆ​ທີ່​ກ່ຽວ​ພັນ​ເຖິງ​ການ​ຄຸ້ມ​ຄອງ ນຳ​ໃຊ້ ແລະ ຄວາມ​ຈຳ­ເປັນ​ທີ່​ຕ້ອງ​ສ້າງ​ຄວາມ​ປອດ​ໄພ​ທາງ​ດ້ານ​ນິວ​ເຄຼຍ ເພື່ອ​ການ​ພັດ­ທະ­ນາ​ທີ່​ຍືນ​ຍົງ ແລະ ເກີດ​ຜົນ​ປະ­ໂຫຍດ​ສູງ​ສຸດ​ແກ່​ປະ­ເທດ​ຊາດ.

ຂ່າວທີ່ກ່ຽວຂ້ອງ