ເຟຣດ ໂຮໂລ ມອບອຸປະກອນການແພດໄອທີ ເຂົ້າໃນວຽກງານປິ່ນປົວຮັກສາສຸຂະພາບຕາ

244 17 ສ.ຫ. 2018 ຂ່າວໜ້າ​ໜຶ່ງ
ເຟຣດ ໂຮໂລ ມອບອຸປະກອນການແພດໄອທີ ເຂົ້າໃນວຽກງານປິ່ນປົວຮັກສາສຸຂະພາບຕາ

    ມູນ​ນິ­ທິ ເຟຣດ ໂຮ​ໂລ (Fred Hollows Foundation) ອົດ​ສະ​ຕຣາ​ລີ ປະ­ຈຳ ສປປ ລາວ ມອບ​ອຸ​ປະ­ກອບ​ການ​ແພດ ແລະ ອຸ­ປະ­ກອນ​ໄອ​ທີ ໃຫ້​ກັບ​ກົມ​ປິ່ນ­ປົວ ແລະ ຟື້ນ​ຟູ​ໜ້າ­ທີ່​ການ ກະ­ຊວງ​ສາ​ທາລະ­ນະ​ສຸກ ເພື່ອ​ນຳ​ໃຊ້​ເຂົ້າ​ໃນ​ວຽກ​ງານ​ປິ່ນ­ປົວ ແລະ ຮັກ­ສາ​ສຸ­ຂະ­ພາບ​ຕາ ລວມ​ມູນ​ຄ່າ 606 ລ້ານ​ກີບ.

    ທ່ານ ຄຳ​ພົ້ວ ສຸດ­ທິ​ສົມ­ບັດ ຫົວ­ໜ້າ​ສູນ​ປິ່ນ­ປົວ ແລະ ຮັກ­ສາ​ສຸ­ຂະ­ພາບ​ຕາ (ທົ່ງ​ປົ່ງ) ກ່າວ​ວ່າ: ມູນ​ນິ­ທິ ເຟຣດ ໂຮ​ໂລ ໄດ້​ເຂົ້າ​ມາ​ເປັນ​ຄູ່​ຮ່ວມ​ງານ​ເປັນ​ເວ­ລາ 10 ປີ ເຊິ່ງ​ໄດ້​ໃຫ້­ການ​ຊ່ວຍ­ເຫຼືອ​ດ້ານ​ວຽກ​ງານ​ປິ່ນ­ປົວ-ຮັກ­ສາ​ສຸ­ຂະ­ພາບ​ຕາ ເລີ່ມ​ຈາກ 4 ແຂວງ ເປັນ 7 ແຂວງ ແລະ 10 ແຂວງ ປັດ­ຈຸ­ບັນ​ກວມ​ເອົາ​ຫຼາຍ​ກວ່າ​ເຄິ່ງ​ໜຶ່ງ​ຂອງ​ບັນ­ດາ​ແຂວງ​ທົ່ວ​ປະ­ເທດ ການ​ຊ່ວຍ­ເຫຼືອ​ຂອງ​ມູນ​ນິ­ທິ​ດັ່ງ­ກ່າວ ເຮັດ​ໃຫ້​ວຽກ​ງານ​ປິ່ນປົວ ແລະ ຮັກ­ສາ​ສຸ­ຂະ­ພາບ​ຕາ ໄດ້​ຮັບ​ການ​ພັດ­ທະ­ນາ​ຂຶ້ນ​ຢ່າງ​ຕໍ່​ເນື່ອງ ເຮັດ​ໃຫ້​ປະ­ຊາ­ຊົນ​ໃນ​ຊົນ­ນະ­ບົດ ຫ່າງ​ໄກ​ສອກ­ຫຼີກ ​ໄດ້​ເຂົ້າ​ເຖິງ​ການ​ຮັກ­ສາ​ປິ່ນ­ປົວ​ໄດ້​ເປັນ​ຢ່າງ​ດີ.

    ອຸ­ປະ­ກອນ​ທີ່​ນຳ​ມາ​ມອບ​ໃນ​ຄັ້ງ​ນີ້ ມີ 11 ຊຸດ 67 ລາຍ­ການ ລວມ​ເຖິງ​ອຸ­ປະ­ກອນ IT ມີ 3 ຊຸດ ເຊິ່ງ​ຈະ​ມອບ​ໃຫ້​ສູນ​ປິ່ນ­ປົວ ແລະ ຮັກ­ສາ​ສຸ­ຂະ­ພາບ​ຕາ ແຂວງ​ບໍ​ລິ​ຄຳ​ໄຊ ຄຳ​ມ່ວນ ແລະ ສະ­ຫວັນ​ນະ​ເຂດ ເຊິ່ງ​ຈະ​ໄດ້​ນຳ​ໃຊ້​ເຂົ້າ​ໃນ​ວຽກ​ງານ​ປິ່ນ­ປົວ ແລະ ຮັກ­ສາ​ສຸ­ຂະ­ພາບ​ຕາ​ໃຫ້​ໄດ້​ຮັບ​ປະ​ສິດ­ທິ​ຜົນ​ສູງ​ຂຶ້ນ.

    ພິ­ທີ​ມອບ-ຮັບ​ເຄື່ອງ​ດັ່ງ­ກ່າວ ຈັດ​ຂຶ້ນ​ວັນ​ທີ 15 ສິງ­ຫາ 2018 ຢູ່​ຫ້ອງ­ການ​ມູນ​ນິ­ທິ ເຟຣດ ໂຮ​ໂລ ຕຶກ​ອາ­ຄານ​ໂຣ​ໂຢສະ​ແກຣ ເຊິ່ງ​ມອບ​ໂດຍ​ທ່ານ​ນາງ ເຄັດ​ຕີ ສະ​ມິດ ເລ­ຂາ​ເອກ​ສະ­ຖານ​ເອກ​ອັກ​ຄະ​ລັດ​ຖະ​ທູດ ແຫ່ງ​ອົດ​ສະ​ຕຣາ​ລີ ປະ­ຈຳ ສປປ ລາວ ແລະ ຮັບ​ໂດຍທ່ານ ຄຳ​ພົ້ວ ສຸດ­ທິ​ສົມ­ບັດ ໂດຍ​ຊ້ອງໜ້າ​ພາກ­ສ່ວນ​ກ່ຽວ­ຂ້ອງ.

ຂ່າວທີ່ກ່ຽວຂ້ອງ