ຂ່າວຫຼ້າສຸດ

ມີ​ຜູ້​ເສຍ​ຊີວິດ 48 ຄົນ ຈາກ​ເຫດການ​ວາງ​ລະ​ເບີດ​ສະລະ​ຊີບ​ຢູ່​ໃນ​ອາ​ຟະ​ກາ​ນິດ​ສະຖານ

185 17 ສ.ຫ. 2018 ຂ່າວຕ່າງປະເທດ
ມີ​ຜູ້​ເສຍ​ຊີວິດ 48 ຄົນ ຈາກ​ເຫດການ​ວາງ​ລະ​ເບີດ​ສະລະ​ຊີບ​ຢູ່​ໃນ​ອາ​ຟະ​ກາ​ນິດ​ສະຖານ

     ກະຊວງ​ສາທາລະນະ​ສຸກ​ຂອງອາ​ຟະ​ກາ​ນິດ​ສະຖານ ​ແຈ້ງ​ໃຫ້​ຮູ້​ເມື່ອ​ວັນ​ທີ 15 ສິງຫາ​ນີ້​ວ່າ ຈຳນວນ​ຜູ້​ເສຍ​ຊີວິດ​ຈາກ​ເຫດການ​ວາງ​ລະ​ເບີດ​ສະລະ​ຊີບ ຊຶ່ງ​ເກີດ​ຂຶ້ນ​ໃນ​ວັນ​ດຽວ​ກັນ ຢູ່​ທີ່​ສູນ​ການ​ສຶກສາ​ແຫ່ງ​ໜຶ່ງ ​ໃນ​ນະຄອນຫຼວງ​ກາ​ບູນ ​ໄດ້​ເພີ່ມ​ຂຶ້ນ​ເປັນ 48 ຄົນ ​ໃນ​ຂະນະ​ທີ່​ຜູ້​ບາດ​ເຈັບ​ມີ 67 ຄົນ.

​    ເຫດການ​ດັ່ງກ່າວ​ເກີດ​ຂຶ້ນ ທ່າມກາງ​ທີ່​ຫຼາຍ​ຕົວ​ເມືອງ​ຂະໜາດ​ໃຫຍ່​ໃນ​ທົ່ວ​ປະ​ເທດອາ​ຟະ​ກາ​ນິດ​ສະຖານ ກາຍ​ເປັນ​ເປົ້າ​ໝາຍ​ຂອງ​ການ​ໂຈມ​ຕີ​ຫຼາຍ​ລາຍ ​ໃນ​ຊຸມ​ເດືອນ​ມໍ່ໆ​ມາ​ນີ້ ​ໂດຍ​ທີ່​ອົງການ ລັດ​ອິສລາມ (IS) ​ແລະ ​ກຸມ​ມື​ປືນ ຕາ​ລີ​ບັນ ​ໄດ້​ດຳ​ເນີນ​ການ​ໂຈມ​ຕີ​ຫຼາຍ​ລາຍ ​ໃສ່​ກອງ​ກຳລັງ​ຮັກສາ​ຄວາມ​ສະຫງົບ ​ແລະ​ ພື້ນຖານ​ການ​ທະຫານ​ຂອງ​ຝ່າຍ​ລັດຖະບານ ອາ​ຟະ​ກາ​ນິດ​ສະຖານ.

​    ເມື່ອ​ເດືອນ​ທີ່​ຜ່ານ​ມາ IS ​ໄດ້​ດຳ​ເນີນ​ການວາງ​ລະ​ເບີດ​ສະລະ​ຊີບ ​ໂດຍ​ມຸ່ງ​ເປົ້າ​ໃສ່​ຂະ​ບວນລົດ​ຄຸ້ມ​ກັນ​ຮອງ​ປະທານາທິບໍດີອາ​ຟະ​ກາ​ນິດ​ສະຖານ ອັບ​ດູ​ນ ຣາຊິດ ດົສຕູມ ຢູ່​ໃກ້​ກັບ​ສະໜາມ​ບິນ​ກາ​ບູນ ຊຶ່ງ​ໃນ​ເຫດການ​ນັ້ນ ທ່ານ ອັບ​ດູ​ນ ຣາຊິດ ດົສຕູມ ພົ້ນ​ໄພ ​ແຕ່​ວ່າການ​ໂຈມ​ຕີ​ໄດ້​ເຮັດ​ໃຫ້​ມີ​ຜູ້​ອື່ນໆເສຍ​ຊີວິດ 23 ຄົນ ​ແລະ​ ບາດ​ເຈັບ​ອີກ 107 ຄົນ.

ຂ່າວທີ່ກ່ຽວຂ້ອງ