ຂ່າວຫຼ້າສຸດ

ມີ​ຜູ້​ເສຍ​ຊີວິດ 10 ຄົນ ຈາກ​ເຫດການ​ໄຟ​ໄໝ້​ສະຖານທີ່​ດູ​ແລ​ຄົນ​ຊະລາ​ຢູ່​ໃນ​ປະເທດ​ຊີ​ເລ

151 17 ສ.ຫ. 2018 ຂ່າວຕ່າງປະເທດ
ມີ​ຜູ້​ເສຍ​ຊີວິດ 10 ຄົນ ຈາກ​ເຫດການ​ໄຟ​ໄໝ້​ສະຖານທີ່​ດູ​ແລ​ຄົນ​ຊະລາ​ຢູ່​ໃນ​ປະເທດ​ຊີ​ເລ

    ເຈົ້າ​ໜ້າທີ່​ຂອງ​ຊີ​ເລ ແຈ້ງ​ໃຫ້​ຮູ້ເມື່ອ​ວັນ​ທີ 14 ສິງຫາ​ນີ້​ວ່າ ມີ​ແມ່ຍິງ​ເສຍ​ຊີວິດ​ຢ່າງ​ໜ້ອຍ 10 ຄົນ ແລະ ​ໄດ້​ຮັບ​ບາດເຈັບ​ອີກ 3 ຄົນ ຈາກ​ເຫດການ​ໄຟ​ໄໝ້​ສະຖານທີ່​ດູ​ແລ​ຄົນ​ຊະລາ ຊຶ່ງ​ເກີດ​ຂຶ້ນ​ຢູ່​ໃນ​ນະຄອນ ຊີ​ກົວ​ຢານ ທີ່​ຂຶ້ນ​ກັບ​ເຂດ ບີ​ໂອ​ບີ​ໂອ (ພາກ​ໃຕ້​ຊີ​ເລ).

    ຜູ້​ວ່າການ​ເຂດ ບີ​ໂອ​ບີ​ໂອ ເວົ້າ​ວ່າ ອັກຄີ​ໄພ​ດັ່ງກ່າວ​ເກີດ​ຂຶ້ນ ໃນ​ເວລາ​ຮຸ່ງ​ເຊົ້າ​ຂອງ​ວັນ​ທີ 14 ສິງຫາ ໂດຍ​ໄດ້​ເຜົາ​ໄໝ້​ເຂດ​ໜຶ່ງ​ຂອງ​ສະຖານທີ່​ດູ​ແລ​ຄົນ​ຊະລາ ຊັນ​ຕາ ມາ​ຕາ (Santa Marta). ໃນ​ເວລາ​ນີ້ ມີ​ຄົນ​ຊະລາ 42 ຄົນ ອາ​ໃສ​ຢູ່​ໃນ​ສະຖານທີ່​ດູ​ແລ​ຄົນ​ຊະລາ​ແຫ່ງ​ນີ້ ໂດຍ​ທີ່​ຜູ້​ເສຍ​ຊີວິດ​ດັ່ງກ່າວ ຕ່າງ​ກໍ​ຢູ່​ໃນ​ຫ້ອງ​ໝາຍ​ເລກ 2 ຊຶ່ງ​ພວກ​ເຂົາ​ເປັນ​ອຳມະພາດ ຈຶ່ງ​ບໍ່​ສາມາດ​ໜີ​ອອກ​ໄປ​ໄດ້ ໃນ​ເວລາ​ທີ່​ເກີດ​ໄຟ​ໄໝ້.

    ເຈົ້າ​ໜ້າທີ່​ມອດ​ໄຟ ໄດ້​ຍ້າຍ​ຄົນ​ຊະລາ​ທີ່​ໄດ້​ຮັບ​ບາດເຈັບ ໄປ​ຍັງ​ໂຮງໝໍ​ທີ່​ໃກ້​ທີ່​ສຸດ ເພື່ອ​ປິ່ນປົວ ໃນ​ຂະນະ​ທີ່​ເຈົ້າ​ໜ້າທີ່​ຕຳຫຼວດ ກໍ​ດຳເນີນ​ການ​ສືບສວນ​ສອບ​ສວນ​ຫາ​ສາເຫດ​ຂອງ​ໄຟ​ໄໝ້.

ຂ່າວທີ່ກ່ຽວຂ້ອງ