ຂ່າວຫຼ້າສຸດ

ສ ອາ​ເມ​ຣິ​ກາ ປິດ​ລ້ອມ​ບໍລິສັດ​ຂອງ​ຣັດ​ເຊຍ ແລະ​ຈີນ ທີ່​ລະເມີດ​ຄຳ​ສັ່ງ​ປິດ​ລ້ອມ ​ສປປ ເກົາຫຼີ

168 17 ສ.ຫ. 2018 ຂ່າວຕ່າງປະເທດ
ສ ອາ​ເມ​ຣິ​ກາ ປິດ​ລ້ອມ​ບໍລິສັດ​ຂອງ​ຣັດ​ເຊຍ ແລະ​ຈີນ ທີ່​ລະເມີດ​ຄຳ​ສັ່ງ​ປິດ​ລ້ອມ ​ສປປ ເກົາຫຼີ

    ວັນ​ທີ 15 ສິງຫາ​ນີ້ ກະຊວງ​ການ​ເງິນ​ຂອງ ສ ອາ​ເມ​ຣິ​ກາ ໄດ້​ປະກາດ​ມາດ​ຕະການ​ປິດ​ລ້ອມ​ທີ່​ມຸ່ງ​ໃສ່​ບັນດາ​ບໍລິສັດ​ຂອງ​ຣັດ​ເຊຍ ແລະ​ຈີນ ທີ່​ລະເມີດ​ຄຳ​ສັ່ງ​ປິດ​ລ້ອມ​ຕໍ່​ເສດຖະກິດ​ຂອງ ​ສປປ ເກົາຫຼີ ທ່າມກາງ​ທີ່ ສ ອາ​ເມ​ຣິ​ກາ ຊອກ​ຫາ​ວິທີ​ຮັກສາ​ຄວາມ​ກົດ​ດັນ​ຕໍ່​ທາງ​ການ ​ສປປ ເກົາຫຼີ ກ່ຽວ​ກັບ​ໂຄງການ​ນີວ​ເຄລຍ​ຂອງ​ປະເທດ​ນີ້.

   ກະຊວງ​ການ​ເງິນ​ຂອງ ສ ອາ​ເມ​ຣິ​ກາ ກ່າວ​ຫາ​ບໍລິສັດ Dalian Sun Moon Star International Logistics Trading ຊຶ່ງ​ມີ​ສຳນັກງານ​ໃຫຍ່​ຕັ້ງ​ຢູ່​ຈີນ ແລະ​ ມີ​ສາຂາ SINSMS ຢູ່​ໃນ​ສິງກະໂປ ວ່າ​ປະກອບ​ເອກະສານ​ປອມ ເພື່ອ​ສ້າງ​ຄວາມ​ສະດວກ​ໃຫ້​ແກ່​ການ​ສົ່ງ​ສິນຄ້າ​ປະເພດ​ເຫຼົ້າ ແລະ ​ຢາສູບ “ທີ່​ຜິດ​ກົດໝາຍ” ໄປ​ຍັງ ​ສປປ ເກົາຫຼີ.

    ນອກຈາກ​ນັ້ນແລ້ວ ບໍລິສັດ Profinet ຢູ່​ໃນ​ຣັດ​ເຊຍ ກໍ​ຖືກ​ກ່າວ​ຫາ​ວ່າ​ລະເມີດ​ຄຳ​ສັ່ງ​ປິດ​ລ້ອມ​ຂອງ​ສະຫະ​ປະຊາ​ຊາດ ດ້ວຍ​ການ​ສະໜອງ​ການ​ບໍລິການ​ທ່າ​ກຳປັ່ນ​ທະເລ ໃຫ້​ແກ່​ກຳປັ່ນ​ຕ່າງໆ ທີ່​ຕິດ​ທຸງຊາດ ​ສປປ ເກົາຫຼີ ຢູ່​ໃນ​ທ່າ​ກຳປັ່ນ 3 ແຫ່ງ ຢູ່​ທາງ​ພາກ​ຕາເວັນ​ອອກ​ຂອງ​ຣັດ​ເຊຍ.

    ໃນ​ອີກ​ເຫດການ​ໜຶ່ງ​ກ່ອນ​ໜ້າ​ນັ້ນ ຣັດ​ເຊຍ ແລະ ​ຈີນ ໄດ້​ຄັດຄ້ານ​ຕໍ່​ການ​ສະເໜີ​ຂອງ ສ ອາ​ເມ​ຣິ​ກາ ທີ່​ເພີ່ມ​ເຕີມ​ທະນາຄານ​ຂອງ​ຣັດ​ເຊຍ​ແຫ່ງ​ໜຶ່ງ ແລະ​ ເຈົ້າ​ຂອງ​ທະນາຄານ​ແຫ່ງ​ໜຶ່ງ​ຂອງ ​ສປປ ເກົາຫຼີ ທີ່​ເຄື່ອນ​ໄຫວ​ຢູ່​ໃນ​​ມົສ​ກູ (ຣັດ​ເຊຍ) ພ້ອມ​ກັບ​ອີກ 2 ອົງ​ປະກອບ ເຂົ້າ​ໃນ “ບັນຊີ​ດຳ” ຂອງ​ສະພາ​ຄວາມ​ໝັ້ນຄົງ ສະຫະ​ປະຊາ​ຊາດ.

   ສ ອາ​ເມ​ຣິ​ກາ ແລະ ສະພາ​ຄວາມ​ໝັ້ນຄົງ ສະຫະ​ປະຊາ​ຊາດ ໄດ້​ປະຕິບັດ​ມາດ​ຕະການ​ປິດ​ລ້ອມ​ຕ່າງໆ ອັນ​ປະກອບ​ດ້ວຍ​ການ​ຫ້າມ ​ສປປ ເກົາຫຼີ ສົ່ງ​ອອກ​ຖ່ານ​ຫີນ ເຫຼັກ ກົ່ວ ຜະລິດ​ຕະ​ພັນ​ຕັດຫຍິບ ແລະ​ສິນ​ທະເລ ພ້ອມ​ທັງ​ຈຳກັດ​ຕໍ່ ​ສປປ ເກົາຫຼີ ໃນ​ການ​ນຳ​ເຂົ້າ​ນ້ຳມັນ ແລະ ​ບັນດາ​ຜະລິດ​ຕະ​ພັນ​ນ້ຳມັນ​ຜ່ານ​ການ​ກັ່ນ​ຕອງ ທັງ​ນີ້​ກໍ​ເພື່ອ​ເປັນ​ການ​ຕັດ​ແຫຼ່ງ​ການ​ເງິນ ທີ່​ຖື​ວ່າ​ເປັນ​ການ​ນຳ​ໃຊ້​ໃຫ້​ແກ່​ໂຄງການ​ນີວ​ເຄລຍ ແລະ​ລູກ​ສອນ​ໄຟ​ຂອງ ​ສປປ ເກົາຫຼີ.

 

ຂ່າວທີ່ກ່ຽວຂ້ອງ