ຂ່າວຫຼ້າສຸດ

CPP ໄດ້​ຮັບ​ໄຊຊະນະ​ຢ່າງ​ຂາດ​ຂັ້ນ ໃນ​ການ​ເລືອກ​ຕັ້ງ​ສະພາ​ແຫ່ງ​ຊາດ​ກຳປູເຈຍ

91 17 ສ.ຫ. 2018 ຂ່າວຕ່າງປະເທດ
CPP ໄດ້​ຮັບ​ໄຊຊະນະ​ຢ່າງ​ຂາດ​ຂັ້ນ ໃນ​ການ​ເລືອກ​ຕັ້ງ​ສະພາ​ແຫ່ງ​ຊາດ​ກຳປູເຈຍ

     ຂ່າວ​ຈາກ​ພະນົມ​ເປັນ ໃຫ້​ຮູ້​ວ່າ ເມື່ອ​ຄ່ຳ​ຄືນ​ຂອງ​ວັນ​ທີ 15 ສິງຫາ​ນີ້ ຄະນະ​ກຳມະການ​ການ​ເລືອກ​ຕັ້ງ​ແຫ່ງ​ຊາດ​ກຳປູເຈຍ (NEC) ໄດ້​ຢັ້ງຢືນ​ຢ່າງ​ເປັນ​ທາງ​ການ​ວ່າ ພັກ​ປະຊາຊົນ​ກຳປູເຈຍ (CPP) ໄດ້​ຮັບ​ໄຊຊະນະ​ຢ່າງ​ຂາດ​ຂັ້ນ ໃນ​ການ​ເລືອກ​ຕັ້ງ​ສະພາ​ແຫ່ງ​ຊາດ​ຊຸດ​ທີ VI ຊຶ່ງ​ຈັດ​ຂຶ້ນ​ເມື່ອ​ວັນ​ທີ 29 ກໍລະກົດ​ທີ່​ຜ່ານ​ມາ.

    ຜົນ​ທີ່​ມີ​ອອກ​ມາ​ຢ່າງ​ເປັນ​ທາງ​ການ​ນັ້ນ ໃຫ້​ຮູ້​ວ່າ ມີ​ຜູ້​ມີ​ສິດ​ເລືອກ​ຕັ້ງ 6.956.900 ຄົນ ຈາກ​ຈຳນວນ​ທີ່​ມີ​ຢູ່​ທັງ​ໝົດ 8.380.217 ຄົນ ໄດ້​ໄປ​ໃຊ້​ສິດ​ເລືອກ​ຕັ້ງ ໂດຍ​ກວມ​ເອົາ 83,02%. ດ້ວຍ​ຈຳນວນ​ບັດ​ເລືອກ​ຕັ້ງ​ທີ່​ໃຫ້ການ​ສະໜັບສະໜູນ​ຢ່າງ​ຂາດ​ຂັ້ນ​ທີ່ 4.889.113 ບັດ ກວມ​ເອົາ 76,85% ຂອງ​ຍອດ​ຈຳນວນ​ບັດ​ທີ່​ຖືກຕ້ອງ​ນັ້ນ CPP ຍາດ​ໄດ້​ຄົບ​ຖ້ວນ​ທັງ 125 ທີ່​ນັ່ງ​ໃນ​ສະພາ​ແຫ່ງ​ຊາດ​ຊຸດ​ໃໝ່.

    ສ່ວນ​ອີກ 19 ພັກ​ການເມືອງ​ທີ່​ຍັງ​ເຫຼືອ ແມ່ນ​ບໍ່​ຍາດ​ໄດ້​ທີ່​ນັ່ງ​ໃດ​ເລີຍ​ໃນ​ສະພາ​ແຫ່ງ​ຊາດ ຍ້ອນ​ວ່າ​ໄດ້​ຮັບ​ບັດ​ຄະແນນ​ສຽງ​ສະໜັບສະໜູນ​ຍັງ​ບໍ່​ພໍ ເພື່ອ​ສາມາດ​ໃຫ້​ໄດ້​ຢ່າງ​ໜ້ອຍ 1 ທີ່​ນັ່ງ ຕາມ​ທີ່​ກົດໝາຍ​ລະບຸ​ໄວ້. ໃນ​ນັ້ນ ພັກ​ທີ່​ມາ​ໃນ​ອັນ​ດັບ​ສອງ​ຮອງ​ຈາກ CPP ກໍ​ແມ່ນ​ພັກ FUNCINPEC ໂດຍ​ຍາດ​ໄດ້​ສຽງ​ສະໜັບສະໜູນ​ພຽງ 374.510 ບັດ ກວມ​ເອົາ 5,89% ຂອງ​ຍອດ​ຈຳນວນ​ບັດ​ທີ່​ຖືກຕ້ອງ.

    ຕາມ​ຕາຕະລາງ ຊຶ່ງ​ນາຍົກລັດຖະມົນຕີ​ກຳປູເຈຍ ຮຸນ​ແຊນ ປະກາດ​ອອກ​ມາ​ເມື່ອ​ວັນ​ທີ 8 ສິງຫາ​ທີ່​ຜ່ານ​ມາ ກໍ​ແມ່ນ​ສະພາ​ແຫ່ງ​ຊາດ​ຊຸດ​ທີ VI ຈະ​ໄຂ​ປະຊຸມ​ວາລະ​ທຳ​ອິດ ໃນ​ວັນ​ທີ 5 ກັນຍາ​ໜ້າ​ນີ້ ພາຍ​ໃຕ້​ການ​ເປັນ​ປະທານ​ຂອງ​ກະສັດ ໂນ​ໂຣ​ດົມ ສີ​ຫາ​ໂມ​ນີ. ຕໍ່​ມາ ໃນ​ວັນ​ທີ 6 ກັນຍາ ສະພາ​ແຫ່ງ​ຊາດ​ກຳປູເຈຍ ຈະ​ລົງ​ຄະແນນ​ສຽງ​ໄວ້​ວາງໃຈ ຕໍ່​ການ​ສ້າງຕັ້ງ​ລັດຖະບານ​ສະໄໝ​ທີ VI ແລະ​ ໃນ​ວັນ​ທີ 7 ກັນຍາ ລັດຖະບານ​ໃໝ່​ຂອງ​ກຳປູເຈຍ ຈະ​ຈັດ​ວາລະ​ປະຊຸມ​ທຳ​ອິດ.

 

ຂ່າວທີ່ກ່ຽວຂ້ອງ