ຂ່າວຫຼ້າສຸດ

ເຊື່ອມຊຶມມະຕິຄົບຄະນະບໍລິຫານງານສູນກາງພັກ

225 16 ສ.ຫ. 2018 ຂ່າວໜ້າ​ໜຶ່ງ
ເຊື່ອມຊຶມມະຕິຄົບຄະນະບໍລິຫານງານສູນກາງພັກ

    ຄະ­ນະ​ໂຄ­ສະ­ນາ​ອົບ­ຮົມ​ສູນ​ກາງ​ພັກ (ຄອພສ) ຈັດ​ກອງ​ປະ­ຊຸມ​ເຊື່ອມ​ຊຶມ​ມະ­ຕິ​ຄົບ​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ ຄັ້ງ​ທີ 6 ສະ­ໄໝ​ທີ X ຂອງ​ພັກ ຂຶ້ນ​ວັນ​ທີ 14 ສິງ­ຫາ 2018 ຢູ່ ຄອພສ ໂດຍ​ເປັນ​ປະ­ທານ​ຂອງ​ສະ­ຫາຍ ກິ​ແກ້ວ ໄຂ​ຄຳ​ພິ­ທູນ ເລ­ຂາ­ທິ­ການ​ສູນ​ກາງ​ພັກ ຫົວ­ໜ້າ ຄອພສ ມີ​ຄະ­ນະ​ປະ­ຈຳ​ພັກ ຄະ­ນະ​ພັກ ສະ­ມາ­ຊິກ​ພັກ ແລະ ພະ­ນັກ­ງານ​ຫຼັກ​ແຫຼ່ງ​ເຂົ້າ​ຮ່ວມ.

    ສະ­ຫາຍ ກິ​ແກ້ວ ໄຂ​ຄຳ​ພິ­ທູນ ໄດ້​ຍົກ​ໃຫ້​ເຫັນ​ທັດ­ສະ­ນະ ທິດ​ທາງ ແລະ ວຽກ​ງານ​ທີ່​ອົງ­ຄະ​ນະ​ພັກ​ທຸກ​ຂັ້ນ​ຕ້ອງ​ໄດ້​ສຸມ​ໃສ່​ນຳ­ພາ ເປັນ­ຕົ້ນ ການ​ຢືດ​ໝັ້ນ​ສ້າງ​ຄວາມ​ໝັ້ນ­ຄົງ​ໃຫ້​ແກ່​ລັດ​ທີ່​ປົກ­ຄອງ​ດ້ວຍ​ກົດ­ໝາຍ ການ​ເພີ່ມ​ນິ­ຕິ​ກຳ​ໃນ​ການ​ປົກ­ຄອງ ແລະ ຍົກ​ສູງ​ປະ​ສິດ­ທິ​ຜົນ​ການ​ບໍ­ລິ­ຫານ​ລັດ ສະ­ກັດ​ກັ້ນ​ພະ­ຍາດ​ອາດ­ຍາ​ສິດ ແລະ ຕ້ານ​ການ​ສໍ້​ລາດ​ບັງ​ຫຼວງ ເສີມ​ຂະ­ຫຍາຍ​ສິດ​ເປັນ​ເຈົ້າ​ຂອງ​ປະ­ຊາ­ຊົນ​ໃນ​ການ​ຄຸ້ມ​ຄອງ​ລັດ-ຄຸ້ມ​ຄອງ​ສັງ­ຄົມ ເພີ່ມ​ທະ­ວີ​ການ​ພົວ­ພັນ​ຮ່ວມ​ມື​ສາ­ກົນ ປັບ­ປຸງ​ແບບ­ແຜນ​ການ​ນຳ­ພາ ແລະ ວິ­ທີ​ເຮັດ​ວຽກ​ຂອງ​ຄະ­ນະ​ພັກ​ຂັ້ນ​ຕ່າງໆ​ໃຫ້​ສອດ­ຄ່ອງ ເດັດ­ດ່ຽວ​ແກ້​ໄຂ​ຈິນ­ຕະ­ນາ­ການ​ເກົ່າ ແນວ​ຄິດ​ຮັກ­ສາ​ຮີດ­ຄອງ​ເດີມ ແບບ​ບໍ­ລິ­ຫານ​ເກື້ອ­ກູນ ທີ່​ອີງ­ໃສ່​ແຕ່​ມະ­ຕິຄຳ​ສັ່ງ ແຈ້ງ​ການ​ເປັນ­ຕົ້ນ​ຕໍ ຫັນ​ໄປ​ສູ່​ການ​ເສີມ​ຂະ­ຫຍາຍ​ແບບ​ນຳ­ພາ​ທີ່​ມີ​ວິ­ທະ­ຍາ­ສາດຕາມ​ລັດ​ຖະ​ທຳ​ມະ­ນູນ ກົດ­ໝາຍ ແລະ ມີ​ຄວາມ​ທັນ​ສະໄໝ​ເທື່ອ​ລະ​ກ້າວ ເພື່ອ​ເຊື່ອມ​ໂຍງ​ບັນ­ດາ​ປະ­ເທດ​ໃນ​ພາກ​ພື້ນ ແລະ ສາ­ກົນ​ໃຫ້​ຫຼາຍ​ຂຶ້ນ ນອກ​ນີ້ ຜູ້​ເຂົ້າ​ຮ່ວມ​ຍັງ​ໄດ້​ຮັບ​ຟັງ​ການ​ເຜີຍ­ແຜ່​ກ່ຽວ​ກັບ​ຄຳ​ສັ່ງ​ຂອງ​ຄະ­ນະ​ເລ­ຂາ­ທິ­ການ​ສູນ​ກາງ​ພັກ ວ່າ​ດ້ວຍ​ການ​ກະ­ກຽມ​ດຳ­ເນີນ​ກອງ​ປະ­ຊຸມ​ໃຫຍ່​ອົງ­ຄະ​ນະ​ພັກ​ກະ­ຊວງ ອົງ­ການ ແຂວງ ນະ­ຄອນ­ຫຼວງ ອົງ­ການ​ພັກ​ເມືອງ ແລະ ຮາກ​ຖານ​ພັກ​ໃນ​ທົ່ວ​ປະ­ເທດ ເພື່ອ​ແນ­ໃສ່​ໃຫ້​ຄະ­ນະ​ພັກ​ທຸກ​ຂັ້ນ ນຳ­ໄປ​ຈັດ​ຕັ້ງ​ປະ­ຕິ­ບັດ​ຢ່າງ​ຖືກ­ຕ້ອງ ສອດ­ຄ່ອງ ແລະ ມີ​ຜົນ­ສຳ­ເລັດ.

ຂ່າວທີ່ກ່ຽວຂ້ອງ