ຂ່າວຫຼ້າສຸດ

ຫຼາຍພາກສ່ວນໃຫ້ການຊ່ວຍເຫຼືອຜູ້ປະສົບໄພນ້ຳຖ້ວມ

434 16 ສ.ຫ. 2018 ຂ່າວໜ້າ​ໜຶ່ງ
ຫຼາຍພາກສ່ວນໃຫ້ການຊ່ວຍເຫຼືອຜູ້ປະສົບໄພນ້ຳຖ້ວມ

    ມູນ​ນິ­ທິ​ໄທ​ເພິ່ງ​ໄທ ພ້ອມ​ດ້ວຍ​ຄະ­ນະ​ສິ­ລະ​ປິນ​ວົງ BNK48 ຮ່ວມ​ສົ່ງ​ຄວາມ​ຫ່ວງ​ໄຍ ແລະ ໃຫ້­ການ​ຊ່ວຍ­ເຫຼືອ​ແກ່​ຜູ້​ປະ­ສົບ​ໄພ­ພິ­ບັດ (ນ້ຳ​ຖ້ວມ) ຢູ່ ສປປ ລາວ ເພື່ອ​ເປັນ​ສ່ວນ​ໜຶ່ງ​ໃນ​ການ​ປະ­ກອບ­ສ່ວນ​ບັນ­ເທົາ​ທຸກ​ໃຫ້​ຜູ້​ປະ­ສົບ​ໄພ​ນ້ຳ​ຖ້ວມ​ຢ່າງ​ກະ­ທັນ­ຫັນ ຈາກ​ເຫດ­ການ​ສັນ​ຄູ​ກັ້ນ​ນ້ຳເຂື່ອນ​ເຊ​ປຽນ-ເຊ​ນ້ຳ​ນ້ອຍ​ແຕກ ຢູ່​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ເຊິ່ງ​ສ້າງ​ຄວາມ​ເສຍ​ຫາຍ​ຕໍ່​ຊີ­ວິດ ແລະ ຊັບ​ສິນ​ຢ່າງ​ຫຼວງ­ຫຼາຍ.

    ພິ­ທີ​ມອບ-ຮັບ​ເງິນ​ຊ່ວຍ­ເຫຼືອ 700 ລ້ານ​ກວ່າ​ກີບ ຫຼື ປະ­ມານ 3.361.793 ບາດ ໄດ້​ຈັດ​ຂຶ້ນ​ວັນ​ທີ 12 ສິງ­ຫາ 2018 ຢູ່​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ເຊິ່ງ​ມອບ​ໂດຍ​ທ່ານ​ນາງ ສຸ­ດາ​ຣັດ ເກ​ຍຸ​ຣາ​ພັນ ປະ­ທານ​ມູນ​ນິ­ທິ​ໄທ​ເພິ່ງ​ໄທ ແລະ ຮັບ​ໂດຍ​ທ່ານ ຄຳ​ແພງ ໄຊ​ສົມ​ແພງ ລັດ­ຖະ­ມົນ­ຕີກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ໂດຍ​ມີ​ທ່ານ​ນາງ ນາ­ລີ ສີ​ສຸ​ລິດ ພັນ​ລະ​ຍາ​ຂອງ​ທ່ານ​ນາ­ຍົກ­ລັດ­ຖະ­ມົນ­ຕີ ພ້ອມ​ດ້ວຍ​ສິ­ລະ​ປິນ​ວົງ BNK48 ແລະ ພາກ­ສ່ວນ​ກ່ຽວ​ເຂົ້າ​ຮ່ວມ.

    ສຳ­ລັບ​ເງິນ​ທີ່​ມາ​ມອບ​ໃນ​ຄັ້ງ​ນີ້ ແມ່ນ​ໄດ້​ມາ​ຈາກ​ການ​ຈັດ​ງານ​ສິ­ລະ​ປະ​ດົນ­ຕີ​ການ​ກຸ­ສົນ “ປະ­ເທດ​ໄທ​ເພື່ອ​ອັດ​ຕະ​ປື” ສະ­ແດງ​ໂດຍ​ຄະ­ນະ​ສິ­ລະ​ປິນ​ວົງ BNK48 ໂດຍ​ງານ​ດັ່ງ­ກ່າວ ມີ​ປະ­ຊາ­ຊົນ​ໄທ​ເຂົ້າ​ຮ່ວມ​ຫຼາຍ​ພັນ​ຄົນ.

    ນອກ​ນີ້ ວັນ​ທີ 9 ສິງ­ຫາ 2018 ຜ່ານ​ມາ ທີ່​ຫ້ອງ​ວ່າ­ການ​ປົກ­ຄອງ​ນະ­ຄອນ­ຫຼວງ​ວຽງ​ຈັນ ສຳ­ນັກ­ງານ​ປ້ອງ​ກັນ ແລະ ບັນ­ເທົາ​ສາ­ລະ​ນະ​ໄພ ແຂວງ​ໜອງ​ຄາຍ ປະ­ເທດ​ໄທ ໄດ້​ນຳ​ເອົາ​ເຄື່ອງ​ມາ​ມອບ​ໃຫ້​ອົງ­ການ​ປົກ­ຄອງ​ນະ­ຄອນ­ຫຼວງ​ວຽງ​ຈັນ ເປັນ​ກຽດ​ມອບ​ໂດຍທ່ານ​ນາງ ວະ​ຣາງ​ຄະ­ນາ ສິນ​ປະ­ກິດ ຫົວ­ໜ້າ​ສຳ­ນັກ­ງານ​ປ້ອງ​ກັນ ແລະ ບັນ­ເທົາ​ສາ­ລະ​ນະ​ໄພ ແຂວງ​ໜອງ​ຄາຍ ກ່າວ​ຮັບ​ໂດຍ​ທ່ານ​ນາງ ລຳ​ພອຍ ສີ​ອັກ​ຄະ​ຈັນ ຫົວ­ໜ້າ​ພະ​ແນກ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ນະ­ຄອນ­ຫຼວງ​ວຽງ​ຈັນ ມີ​ພະ­ນັກ­ງານ​ກ່ຽວ­ຂ້ອງ​ທັງ​ສອງ​ຝ່າຍ​ເຂົ້າ​ຮ່ວມ.

    ເຄື່ອງ​ທີ່​ນຳ​ມາ​ມອບ​ໃນ​ຄັ້ງ​ນີ້​ປະ­ກອບ​ມີ​ເຄື່ອງ​ອຸ­ປະ­ໂພກ ບໍ­ລິ­ໂພກ ເຄື່ອງ­ນຸ່ງ​ຫົ່ມ ແລະ ເງິນ​ຈຳ­ນວນ 1 ແສນ​ກວ່າ​ບາດ ໂອ­ກາດ​ດັ່ງ­ກ່າວ​ທ່ານ​ນາງ​ ລຳ​ພອຍ ສີ​ອັກ​ຄະ​ຈັນ ກໍ່​ໄດ້​ສະ­ແດງ​ຄວາມ​ຂອບ­ໃຈ​ມາ​ຍັງ​ສຳ­ນັກ­ງານ​ປ້ອງ​ກັນ ແລະ ບັນ­ເທົາ​ສາ­ລະ​ນະ​ໄພ​ທີ່​ໄດ້​ແບ່ງ​ເບົາ​ຄວາມ­ທຸກ​ໂສກ​ໃນ​ຄັ້ງ​ນີ້ ແລະ ຈະ​ຈຳ​ເອົາ​ເຄື່ອງ​ຈຳ­ນວນ​ດັ່ງ­ກ່າວ ​ໄປ​ມອບ​ຕໍ່­ໃຫ້​ປະ­ຊາຊົນ​ທີ່​ໄດ້​ຮັບ​ຜົນ​ກະ­ທົບ​ດັ່ງ­ກ່າວ.

    ພ້ອມ​ນີ້ ທ່ານ ກາ​ວີ​ພອນ ສຸດ​ທີ ຫົວ­ໜ້າ​ກອງ​ຊ່ວຍ­ເຫຼືອ ແລະ ບັນ­ເທົາ​ທຸກ​ທີ່​ປະ­ຈຳ​ຢູ່​ພາກ​ສະ­ໜາມ ເມືອງ​ສະໜາມ​ໄຊ ແຂວງ​ອັດ​ຕະ​ປື ແຈ້ງ​ໃຫ້​ຮູ້​ກ່ຽວ​ກັບ​ການ​ຊ່ວຍ­ເຫຼືອ​ປະ­ຊາ­ຊົນ​ທີ່​ໄດ້​ຮັບ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ ຢູ່​ເມືອງ​ສະໜາມ​ໄຊ ໃນ​ວັນ​ທີ 10 ສິງ­ຫາ 2018 ວ່າ: ປັດ­ຈຸ­ບັນ​ຍັງ​ມີ​ຫຼາຍ​ພາກ­ສ່ວນ​ໄດ້​ສືບ­ຕໍ່​ໃຫ້­ການ​ຊ່ວຍ­ເຫຼືອ​ ຜູ້​ທີ່​ໄດ້​ຮັບ​ຜົນ​ກະ­ທົບ​ດັ່ງ­ກ່າວ ໃນ​ນີ້​ອົງ­ການ​ກາ­ແດງ​ລາວ ກໍ່​ຄືກາ­ແດງ​ເພື່ອນ​ມິດ ໂດຍ​ສະ­ເພາະ ສະ­ພາ​ກາ­ຊາດ​ໄທ ໄດ້​ພ້ອມ​ກັນ​ປະ­ຕິ­ບັດ​ໜ້າ­ທີ່ ແລະ ພາ­ລະ​ບົດ­ບາດ​ໃນ​ເວ­ລາ​ສຸກ​ເສີນ​ຕ່າງໆ.

ສະ­ພາ​ກາ­ຊາດ​ໄທ ໄດ້​ຮີບ​ຮ້ອນ​ຈັດ​ສົ່ງ​ເຄື່ອງ​ຊ່ວຍ­ເຫຼືອ​ບັນ­ເທົາ​ທຸກ​ໃຫ້​ແກ່​ອົງ­ການ​ກາ­ແດງ​ລາວ ເພື່ອ​ໄປ​ຊ່ວຍເຫຼືອ​ປະ­ຊາ­ຊົນ​ຜູ້​ປະ­ສົບ​ໄພ​ຢູ່​ເມືອງ​ສະ­ໜາມ​ໄຊ ໃນ​ນີ້ ເຄື່ອງ​ຊ່ວຍ­ເຫຼືອ​ທີ່​ສົ່ງ​ມາ​ປະ­ກອບ​ມີ​ເຂົ້າ­ສານ ນ້ຳ​ດື່ມ ອາ­ຫານ​ສຳເລັດ​ຮູບ ຢາ​ປົວ​ພະ­ຍາດ 1.500 ຊຸດ ເຕັ້ນ 10 ດາງ ມູນ​ຄ່າ 499 ລ້ານ​ກີບ ຫຼື ປະ­ມານ 1.960.500 ບາດ ແລະ ເງິນ 1,27 ຕື້​ກວ່າ​ກີບ ຫຼື ປະ­ມານ 5 ລ້ານ​ບາດ ລວມ​ທັງ​ໝົດ 1,77 ຕື້​ກວ່າ​ກີບ.

ຂ່າວທີ່ກ່ຽວຂ້ອງ