ຂ່າວຫຼ້າສຸດ

ນັກສຶກສາລາວ 20 ຄົນ ໄດ້ຮັບທຶນໄປສຶກສາຕໍ່ຢູ່ປະເທດຍີ່ປຸ່ນ

300 16 ສ.ຫ. 2018 ຂ່າວໜ້າ​ໜຶ່ງ
ນັກສຶກສາລາວ 20 ຄົນ ໄດ້ຮັບທຶນໄປສຶກສາຕໍ່ຢູ່ປະເທດຍີ່ປຸ່ນ

    ງານ​ລ້ຽງ​ສົ່ງ​ນັກ​ສຶກ​ສາ​ລາວ ທີ່​ຈະ​ເດີນ­ທາງ​ໄປ​ສຶກ​ສາ​ຕໍ່​ຢູ່​ປະ­ເທດ​ຍີ່­ປຸ່ນ ພາຍ​ໃຕ້​ທຶນ​ການ​ສຶກ​ສາ 2 ໂຄງ­ການ JDS ແລະ YLP ຂອງ​ລັດ­ຖະ­ບານ​ຍີ່­ປຸ່ນ ຈັດ​ຂຶ້ນ​ວັນ​ທີ 13 ສິງ­ຫາ 2018 ຢູ່​ບ້ານ​ພັກ​ທ່ານ​ເອກ​ອັກ​ຄະ​ຣາ​ຊະ​ທູດ​ຍີ່­ປຸ່ນ ໂດຍ​ມີ​ທ່ານ​ນາງ ແສງ​ເດືອນ ຫຼ້າ​ຈັນ­ທະ​ບູນ ລັດ­ຖະ­ມົນ­ຕີກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ປະ­ທານ​ສະ­ມາ­ຄົມ​ມິດ­ຕະ­ພາບ​ລາວ-ຍີ່­ປຸ່ນ ທ່ານ ທາ​ເຄ​ຊິ ຮິ​ກິ​ຮາ​ຣະ ເອກ​ອັກ​ຄະ​ຣາ​ຊະ​ທູດ​ຍີ່­ປຸ່ນ ປະ­ຈຳ ສປປ ລາວ ທ່ານ ໂຢ​ຊິ​ຮາ​ລຶ ໂຢ​ເນ​ຢາ​ມາ ຫົວ­ໜ້າ​ຫ້ອງ­ການ​ອົງ­ການ​ໄຈ​ກາ ປະ­ຈຳ ສປປ ລາວ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທຶນ​ການ​ສຶກ​ສາ​ດ້ານ​ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ (JDS) ແມ່ນ​ທຶນ​ການ​ຊ່ວຍ­ເຫຼືອ​ລ້າ ທີ່​ສະ­ໜອງ​ໃຫ້​ລັດ­ຖະ­ກອນ​ລາວ ໄປ​ສຶກ​ສາ​ໃນ​ລະ­ດັບ​ປະ­ລິນ­ຍາ​ໂທ ໄລ­ຍະ 2 ປີ ຢູ່​ມະ­ຫາ­ວິ­ທະ­ຍາ­ໄລປະ­ເທດ​ຍີ່­ປຸ່ນ ເພື່ອ​ປະ­ກອບ­ສ່ວນ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ລາວ ໂຄງ­ການ​ນີ້​ໄດ້​ເລີ່ມ​ແຕ່​ປີ 1999 ເປັນ­ຕົ້ນ​ມາ ໂດຍ​ມີ​ລັດ­ຖະ­ກອນ​ລາວ​ຫຼາຍ​ກວ່າ 370 ຄົນ ໄດ້​ຮັບ​ທຶນ​ການ​ສຶກ​ສາ​ດັ່ງ­ກ່າວ ສຳ­ລັບ​ປີ​ນີ້​ນັກ​ສຶກ​ສາ​ໄດ້​ຮັບ​ທຶນ JDS ມີ 20 ຄົນ ທີ່​ຈະ​ໄດ້​ໄປ​ສຶກ​ສາ ແລະ ເຮັດ​ຄົ້ນ­ຄວ້າ​ໃນ​ຂະ­ແໜງ­ການ​ຕ່າງໆ​ຢູ່​ປະ­ເທດ​ຍີ່­ປຸ່ນ ສ່ວນ​ໂຄງ­ການ​ຜູ້­ນຳ​ໄວ​ໜຸ່ມ (YLP) ເພື່ອ​ຍົກ​ລະ­ດັບ​ຄວາມ​ສາ­ມາດ​ຂອງ​ລັດ­ຖະ­ກອນ​ໄວ​ໜຸ່ມ​ໃຫ້​ເປັນ​ຜູ້­ນຳ​ໃນ​ອະ­ນາ­ຄົດ ໄດ້​ເລີ່ມ​ແຕ່​ປີ 2001 ເປັນ­ຕົ້ນ​ມາ ໂດຍ​ມີ​ລັດ­ຖະ­ກອນ​ລາວ 53 ຄົນ ໄດ້​ຮັບ​ທຶນ​ດັ່ງ­ກ່າວ ເພື່ອ​ສຶກ​ສາ​ໃນ​ລະ­ດັບ​ປະ­ລິນ­ຍາ​ໂທ ໄລ­ຍະ​ເວ­ລາ 1 ປີ ໃນ 5 ຂະ­ແໜງ­ການ​ເຊັ່ນ: ນະ­ໂຍ­ບາຍ​ລັດ ນະ­ໂຍ­ບາຍ​ລັດ​ທ້ອງ­ຖິ່ນ ບໍ­ລິ­ຫານ​ທຸ­ລະ​ກິດ ກົດ­ໝາຍ ແລະ ບໍ­ລິ­ຫານ​ສາ­ທາ­ລະ­ນະ​ສຸກ.

    ທ່ານ ທາ​ເຄ​ຊິ ຮິ​ກິ​ຮາ​ຣະ ໄດ້​ສະ­ແດງ​ຄວາມ​ຍິນ​ດີ​ຕໍ່​ນັກ​ສຶກ​ສາ​ທີ່​ກຳ­ລັງ​ຈະ​ເດີນ­ທາງ​ໄປ​ຍີ່­ປຸ່ນ ແລະ ອວຍ­ພອນ​ໃຫ້​ພວກ​ເຂົາ​ໃຊ້​ໂອ­ກາດ​ທີ່​ໄດ້​ຮັບ​ນີ້​ໃຫ້​ດີ​ທີ່​ສຸດ ເພື່ອ​ພັດ­ທະ­ນາ​ຕົນ​ເອງ ໂດຍ​ຜ່ານ​ການ​ສຶກ​ສາ​ຮ່ຳ­ຮຽນ​ໃນ​ສະ­ພາບ​ແວດ​ລ້ອມ​ໃໝ່ ແລະ ຫວັງ​ວ່າ​ນັກ​ສຶກ​ສາ​ທຸກ​ຄົນ​ຈະ​ເກັບ​ກຳ​ເອົາ​ຄວາມ​ຮູ້ ແລະ ປະ­ສົບ​ການ​ຕ່າງໆ ເພື່ອ​ຈະ​ປະ­ກອບ­ສ່ວນ​ໃນ​ການ​ພັດ­ທະ­ນາ​ປະ­ເທດ​ຂອງ​ຕົນ​ໃນ​ອະ­ນາ­ຄົດ ແລະ ຈະ​ເປັນ​ຂົວ​ເຊື່ອມ​ຄວາມ​ສຳ­ພັນ​ລະ­ຫວ່າງ​ປະ­ຊາ­ຊົນ​ຍີ່­ປຸ່ນ-ລາວ ອີກ​ດ້ວຍ.

ຂ່າວທີ່ກ່ຽວຂ້ອງ