ກະສິກຳອິນຊີ ສະໜອງພືດຜັກໄດ້ຫຼາຍກວ່າ 1 ພັນໂຕນ

202 16 ສ.ຫ. 2018 ຂ່າວໜ້າ​ໜຶ່ງ
ກະສິກຳອິນຊີ ສະໜອງພືດຜັກໄດ້ຫຼາຍກວ່າ 1 ພັນໂຕນ

    ກຸ່ມ​ຜະ­ລິດ​ກະ­ສິ­ກຳ​ອິນ​ຊີ ນະ­ຄອນ­ຫຼວງ​ວຽງ​ຈັນ ຈັດ​ກອງ​ປະ­ຊຸມ​ສະ­ຫຼຸບ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ກະ​ສິກຳ​ອິນ​ຊີ ໃນ​ໄລ­ຍະ (2016-2018) ແລະ ທິດ​ທາງ​ແຜນ­ການ 2019-2020 ໄດ້​ຈັດ​ຂຶ້ນ​ວັນ​ທີ 14 ສິງ­ຫາ 2018 ທີ່​ພະ​ແນກ​ກະ­ສິ­ກຳ ແລະ ປ່າ­ໄມ້ ນະ­ຄອນ­ຫຼວງ​ວຽງ​ຈັນ ເປັນ​ປະ­ທານ​ຂອງ​ທ່ານ ຄຳ​ພູ ພັນ­ທະ​ບູນ ຫົວ­ໜ້າ​ກຸ່ມ​ກະ­ສິ­ກຳ​ອິນ​ຊີ​ນະ­ຄອນ­ຫຼວງ ມີທ່ານ ຫຼ້າ​ສາຍ ນວນ​ທາ​ສິງ ຫົວ­ໜ້າ​ພະ​ແນກ​ກະ­ສິ­ກຳ ແລະ ປ່າ­ໄມ້ ນະ­ຄອນ­ຫຼວງ​ວຽງ​ຈັນ ພ້ອມ​ດ້ວຍ​ສະ­ມາ­ຊິກ​ກຸ່ມ​ກະ­ສິ­ກຳ​ອິນ​ຊີ​ເຂົ້າ​ຮ່ວມ.

    ກຸ່ມ​ຜະ­ລິດ​ກະ­ສິ­ກຳ​ອິນ​ຊີ​ດັ່ງ­ກ່າວ ໄດ້​ເລີ່ມ​ຈັດ​ຕັ້ງ​ນັບ​ແຕ່​ປີ 2006 ເປັນ­ຕົ້ນ​ມາ ໄດ້​ເຕີບ​ໃຫຍ່​ຂະ­ຫຍາຍ­ຕົວ​ມາ​ເຖິງ​ປັດ­ຈຸ­ບັນ​ມີ​ສະ­ມາ­ຊິກ​ກຸ່ມ​ທັງ​ໝົດ 11 ກຸ່ມ ໃນ​ນັ້ນ ມີ​ສະ­ມາ­ຊິກ 200 ຄອບ­ຄົວ ໃນ​ໄລ­ຍະ 2 ປີ­ຜ່ານ­ມາ​ ສາ­ມາດ​ຊຸກ­ຍູ້​ຜະ­ລິດ​ຜັກ ແລະ ໝາກ​ໄມ້​ໃນ​ເນື້ອ­ທີ່ 244 ເຮັກ­ຕາ ສະ­ໜອງ​ຜົນ​ຜະ­ລິດ​ໄດ້ 1.062 ໂຕນ ສ້າງ​ລາຍ​ຮັບ​ໄດ້ 16 ຕື້​ກີບ ນອກ­ຈາກ​ນັ້ນ ໄດ້​ສຳ­ເລັດ​ສ້າງ​ເຮືອນ​ຮົ່ມ​ໄດ້ 350 ຫຼັງ ແລະ ສາ­ມາດ​ເກັບ​ເງິນ​ເຂົ້າ​ກອງ​ທຶນ​ກຸ່ມ​ໄດ້​ທັງ​ໝົດ 64 ລ້ານ​ກວ່າ​ກີບ ແລະ ໄດ້​ສົມ­ທົບ​ກັບ​ພາກ­ສ່ວນ​ກ່ຽວ­ຂ້ອງ​ລົງ​ກວດ­ກາ​ວິ­ໄຈ​ຫາ​ສານ­ພິດ​ຕົກ​ຄ້າງ ຈຳ­ນວນ 15 ຄັ້ງ 124 ຕົວ­ຢ່າງ ພົບ​ສານ​ຕົກ​ຄ້າງ​ເກີນ 50% ຢູ່​ໃນ​ລະ­ດັບ​ທີ່​ບໍ່​ປອດ​ໄພ 15 ຕົວ­ຢ່າງ ໃນ​ກໍ­ລະ­ນີ​ດັ່ງ­ກ່າວ​ແມ່ນ​ໄດ້​ປະ­ຕິ­ບັດ​ຕາມ​ກົດ​ລະ­ບຽບ​ຢ່າງ​ເຂັ້ມ​ງວດ.

    ສຳ­ລັບ​ທິດ​ທາງ​ແຜນ­ການ​ໃນ­ຕໍ່­ໜ້າ ຈະ​ສືບ­ຕໍ່​ຊຸກ­ຍູ້​ຊາວ​ກະ­ສິ­ກອນ​ທີ່​ມີ​ຄວາມ​ສົນ­ໃຈ ແລະ ມີ​ເງື່ອນ­ໄຂ​ຂະ­ຫຍາຍ​ກຸ່ມ​ຜະ­ລິດ ລົງ​ສຳ​ຫຼວດ​ກຸ່ມ​ນ້ອຍ​ແຕ່​ລະ​ບ້ານ​ ເພື່ອ​ປັບ­ປຸງ​ໃຫ້​ມີ​ຄວາມ​ເຂັ້ມ­ແຂງ​ທາງ​ດ້ານ​ການ​ຄຸ້ມ​ຄອງ ແລະ ການ​ຜະ­ລິດ​ໃຫ້​ໄດ້​ຕາມ​ມາດ­ຕະ­ຖານ ສືບ­ຕໍ່​ຂະ­ຫຍາຍ​ສະ­ມາ­ຊິກ ແລະ ເນື້ອ­ທີ່​ການ​ຜະ­ລິດ ຊຸກ­ຍູ້​ໃຫ້​ສະ­ມາ­ຊິກ​ສ້າງ​ເຮືອນ​ຮົ່ມ​ໃຫ້​ສາ­ມາດ​ຜະ­ລິດ​ໃນ​ໄລ­ຍະ​ລະ­ດູ­ຝົນ ແລະ ຂະ­ຫຍາຍ​ຕະ­ຫຼາດ​ໃຫ້​ກວ້າງ​ອອກ ເພີ່ມ​ທະ­ວີ​ລົງ​ຕິດ­ຕາມ​ກວດ­ກາ​ສະ­ມາ­ຊິກ ແລະ ກຸ່ມ​ທີ່​ຍັງ​ບໍ່​ເຂັ້ມ­ແຂງ ພ້ອມ​ທັງ​ລົງ​ກວດ​ຕິດ­ຕາມ​ມາດ­ຕະ­ຖານ​ການ​ຜະ­ລິດ​ຢ່າງ​ຕໍ່​ເນື່ອງ ແລະ ປົກ­ກະ­ຕິ.

    ໃນ​ກອງ​ປະ­ຊຸມ​ໃນ​ຄັ້ງ​ນີ້ ໄດ້​ປ່ອນ​ບັດ​ເລືອກ​ເອົາ​ຄະ­ນະ​ບໍ­ລິ­ຫານ​ງານ​ກຸ່ມ​ຜະ­ລິດ​ກະ­ສິ­ກຳ​ອິນ​ຊີ​ຊຸດ​ໃໝ່ ລົງ​ສະໝັກ 14 ສະ­ຫາຍ ເລືອກ​ເອົາ 9 ສະ­ຫາຍ ຜ່ານ​ການ​ຄັດ​ເລືອກ​ເຫັນ​ດີ​ເປັນ​ເອ­ກະ​ພາບ​ເລືອກ​ເອົາ ທ່ານ ທອງ​ໄຊ ເພັດ​ນະ­ຄອນ​ສີ ເປັນ​ປະ­ທານ​ຄະ­ນະ​ບໍ­ລິ­ຫານ​ງານ​ກຸ່ມ​ຜະ­ລິດ​ກະ­ສິ­ກຳ​ອິນ​ຊີ​ຊຸດ​ໃໝ່.

ຂ່າວທີ່ກ່ຽວຂ້ອງ