ເຫດການ​ຮຸນ​ແຮງ​ຢູ່​ໃນ​ອາ​ຟະ​ກາ​ນິດ​ສະຖານ ເຮັດ​ໃຫ້​ມີ​ຜູ້​ເສຍ​ຊີວິດ​ຫຼາຍ​ຮ້ອຍ​ຄົນ

104 16 ສ.ຫ. 2018 ຂ່າວຕ່າງປະເທດ
ເຫດການ​ຮຸນ​ແຮງ​ຢູ່​ໃນ​ອາ​ຟະ​ກາ​ນິດ​ສະຖານ ເຮັດ​ໃຫ້​ມີ​ຜູ້​ເສຍ​ຊີວິດ​ຫຼາຍ​ຮ້ອຍ​ຄົນ

    ແຫຼ່ງ​ຂ່າວ​ຈາກ​ເຂດ​ອາຊີ​ໃຕ້ ໃຫ້​ຮູ້​ວ່າ ບັນດາ​ເຈົ້າ​ໜ້າທີ່​ຂອງ​ອາ​ຟະ​ກາ​ນິດ​ສະຖານ ແຈ້ງ​ໃຫ້​ຮູ້ເມື່ອ​ວັນ​ທີ 14 ສິງຫາ​ນີ້​ວ່າ ມີ​ຜູ້​ເສຍ​ຊີວິດ​ຢ່າງ​ໜ້ອຍ 466 ຄົນ ໃນ​ນັ້ນ​ເປັນ​ສາມັນ​ຊົນ 40 ຄົນ ຈາກ​ການ​ຍິງ​ຕໍ່ສູ້​ກັນ​ລະຫວ່າງ​ກຸ່ມ​ມື​ປືນ ຕາ​ລີ​ບັນ ກັບ​ກອງ​ກຳລັງ​ຮັກສາ​ຄວາມ​ສະຫງົບ​ຂອງ​ອາ​ຟະ​ກາ​ນິດ​ສະຖານ ຢູ່​ໃນ​ນະຄອນ ກາ​​ສ​ນີ (ພາກ​ຕາເວັນ​ອອກ​ຂອງ​ອາ​ຟະ​ກາ​ນິດ​ສະຖານ) ໂດຍ​ກຸ່ມ​ມື​ປືນ​ຕາ​ລີ​ບັນ ໄດ້​ປະຕິບັດ​ການ​ໂຈມ​ຕີ​ເພື່ອ​ຫວັງ​ຄວບ​ຄຸມ​ນະຄອນ​ດັ່ງກ່າວ ເມື່ອ 5 ວັນ​ກ່ອນ​ໜ້າ​ນີ້.

    ໂຄສົກ​ຂອງ​ກະຊວງ​ປ້ອງ​ກັນ​ປະເທດ​ອາ​ຟະ​ກາ​ນິດ​ສະຖານ ໃຫ້​ຮູ້​ວ່າ ຈຳນວນ​ຜູ້​ທີ່​ຖືກ​ຂ້າ​ຕາຍ​ຂອງ​ກຸ່ມ​ຕາ​ລີ​ບັນ ເພີ່ມ​ຂຶ້ນ​ເປັນ 326 ຄົນ ໃນ​ຂະນະ​ທີ່​ຝ່າຍ​ລັດຖະບານ ມີ​ຜູ້​ເສຍ​ຊີວິດ 100 ຄົນ ໃນ​ນັ້ນ​ມີ​ຕຳຫຼວດ 70 ຄົນ ແລະ ຍັງ​ມີ​ສາມັນ​ຊົນ​ເສຍ​ຊີວິດ​ອີກ 40 ຄົນ.

    ເຖິງ​ຢ່າງໃດ​ກໍ​ຕາມ ຕົວ​ເລກ​ການ​ເສຍ​ຊີວິດ​ຂອງ​ສາມັນ​ຊົນ ຍັງ​ເປັນ​ພຽງ​ການ​ລາຍ​ງານ​ເບື້ອງ​ຕົ້ນ ຊຶ່ງ​ຕົວ​ເລກ​ທີ່​ຊັດ​ເຈນ ຈະ​ໄດ້​ນຳ​ອອກ​ມາ​ເປີດເຜີຍ ຫຼັງ​ຈາກ​ທີ່​ສິ້ນ​ສຸດ​ການ​ກຳຈັດ​ພວກ​ມື​ປືນ​ທີ່​ຍັງ​ຫຼົງ​ເຫຼືອ​ຢູ່​ໃຫ້​ໝົດ​ໄປ​ຈາກ​ນະຄອນ​ດັ່ງກ່າວ.

 

ຂ່າວທີ່ກ່ຽວຂ້ອງ