ຂ່າວຫຼ້າສຸດ

ມີ​ຜູ້​ເສຍ​ຊີວິດ​ຫຼາຍ​ສິບ​ຄົນ ຈາກ​ເຫດການ​ຂົວ​ພັງ​ຖະຫຼົ່ມ​ຢູ່​ໃນ​ອີ​ຕາ​ລີ

164 16 ສ.ຫ. 2018 ຂ່າວຕ່າງປະເທດ
ມີ​ຜູ້​ເສຍ​ຊີວິດ​ຫຼາຍ​ສິບ​ຄົນ ຈາກ​ເຫດການ​ຂົວ​ພັງ​ຖະຫຼົ່ມ​ຢູ່​ໃນ​ອີ​ຕາ​ລີ

    ທ່ານ ມັດ​ເຕ​ໂອ ຊາ​ລວີ​ນີ ຮອງ​ນາຍົກລັດຖະມົນຕີ ທັງ​ເປັນ​ລັດຖະມົນຕີ​ກະ​ຊວງ​ພາຍ​ໃນ​ຂອງ​ອີ​ຕາ​ລີ ​ແຈ້ງ​ໃຫ້​ຮູ້​ກ່ຽວ​ກັບຜູ້​ໄດ້​ຮັບ​ເຄາະ​ຮ້າຍ ຈາກ​ເຫດການ​ຂົວ​ເທິງບົກ Morandi ​ພັງ​ຖະຫຼົ່ມ ຢູ່​ໃນ​ນະຄອນ ​ເຈ​ນົວ ​ໃນ​ເຂດ ລີ​ກູ​ເຣຍ (ພາກ​ຕາ​ເວັນ​ຕົກ​ສ່ຽງ​ເໜືອ​ຂອງ​ອີ​ຕາ​ລີ) ຊຶ່ງ​ເກີດ​ຂຶ້ນ​ເມື່ອ​ວັນ​ທີ 14 ສິງຫາ​ນີ້ ວ່າ​​ເບື້ອງ​ຕົ້ນ​ມີ​ລາຍ​ງານຜູ້​ເສຍ​ຊີວິດ​ 26 ຄົນ ​ແລະ​ບາດ​ເຈັບ​ອີກ 15 ​ຄົນ.

   ຂ່າວ​ແຈ້ງວ່າ ອຸບັດ​ເຫດ​ດັ່ງກ່າວ ​ເກີດ​ຂຶ້ນ​ໃນ​ເວລາ​ທ່ຽງ​ວັນ ​ໂດຍ​ມີ​ຍ່ານ​ໜຶ່ງ​ຂອງ​ຂົວ ທີ່​ມີ​ຄວາມ​ຍາວ​ປະມານ 200 ​ແມັດ ​ໄດ້​ພັງ​ຖະຫຼົ່ມລົງຈາກ​ລະດັບ​ສູງ 100 ​ແມັດ ທັບ​ໃສ່ທາງ​ລົດ​ໄຟ. ມີ​ລົດ​ຫຼາຍ​ຄັນ ທີ່​ພວມ​ຢູ່​ໃນ​ລະຫວ່າງ​ການ​ສັນຈອນ ກໍ​ໄດ້​ຕົກລົງ​ໄປ​ນຳ​ສ່ວນ​ຂົວ​ທີ່​ພັງ​ຖະຫຼົ່ມ ​ແລະ ​ຖືກ​ທັບ​ຖົມ​ຢູ່​ໃນ​ຊາກ​ຫັກ​ພັງ​ຮ່ວມ​ກັບ​ຜູ້​ຄົນ​ທີ່​ຕິດ​ຄ້າງ​ຢູ່​ດ້ານ​ໃນ​ຂອງ​ລົດ. ​ເຈົ້າ​ໜ້າ​ທີ່​ຕຳຫຼວດ​ເວົ້າວ່າ ມີ​ລົດ​ປະມານ 20 ຄັນ ​ໄດ້​ຮັບ​ຜົນ​ກະທົບ​ຈາກ​ເຫດການ​ດັ່ງກ່າວ.

    ສຳນັກ​ຂ່າວສານ ANSA ຂອງ​ອີ​ຕາ​ລີ ​ໃຫ້​ຮູ້​ວ່າ ມີຜູ້​ໄດ້​ຮັບ​ເຄາະ​ຮ້າຍ 2 ຄົນ ​ເອົາ​ຊີວິດ​ລອດ​ມາ​ໄດ້​ຈາກ​ເຫດການ​ຂົງພັງ​ຖະຫຼົ່ມ​ດັ່ງກ່າວ. ​ໃນ​ຂະນະ​ດຽວ​ກັນ ເຈົ້າ​ໜ້າ​ທີ່​ໃນ​ທ້ອງ​ຖິ່ນ ​ເວົ້າວ່າ​ວຽກ​ງານ​ບຳລຸງ​ສ້ອມ​ແຊມຂົວ​ທີ່​ພັງ​ຖະຫຼົ່ມ​ດັ່ງກ່າວ ​ໄດ້​ຮັບ​ການ​ກຳນົດ​ວ່າ​ບໍ່​ບັນລຸ​ມາດຖານ.

    ຂ່າວ​ແຈ້ງວ່າ ຂົວ Morandi ​ໄດ້​ຮັບ​ການ​ກໍ່ສ້າງ ​ໃນ​ຊຸມ​ປີ 60 ຂອງ​ສະຕະວັດ​ທີ 20 ​ແລະ​ ໄດ້​ຮັບ​ການ​ສ້ອມ​ແຊມ​ເມື່ອ​ປີ 2016. ຂົວ​ແຫ່ງ​ນີ້ ນອນ​ຢູ​ເສັ້ນ​ທາ​ງດ່ວນ​ສາຍ A10 (Autostrada 10) ທີ່​ແລ່ນ​ລຽບ​ຕາມ​ແຄມ​ຝັ່ງ​ທະ​ເລ​ທິດຕາ​ເວັນ​ຕົກ​ສ່ຽງ​ເໜືອ​ອີ​ຕາ​ລີ ​ເປັນ​ການ​ເຊື່ອມ​ຈອດ​ນະຄອນ ​ເຈ​ນົວ ກັບ​ນະຄອນ ​ເວນ​ຕີ​ມິກ​ເລຍ ​ແລະ ​ກໍ​ເປັນ​ສ່ວນ​ໜຶ່ງ​ຂອງ​ເສັ້ນທາງ E80 ຂອງ​ເອີຣົບ ທີ່​ເນັ່ງ​ຈາກ​ປອກຕຸຍ​ການ ​ເຂົ້າ​ໄປ​ຍັງພາກ​ຕາ​ເວັນ​ອອກ​ຂອງ​ປະ​ເທດ​ຕວກກີ.

 

ຂ່າວທີ່ກ່ຽວຂ້ອງ