ຂ່າວຫຼ້າສຸດ

5 ປະເທດ​ໃນ​ເອີ​ຣົບ ຈະ​ຮັບ​ເອົາ​ຜູ້​ອົບ​ພະ​ຍົບ​ຈາກ​ກຳປັ່ນ​ກູ້​ໄພ ອາ​ກົວ​ຣີ​ອຸ​​ສ

98 16 ສ.ຫ. 2018 ຂ່າວຕ່າງປະເທດ
5 ປະເທດ​ໃນ​ເອີ​ຣົບ ຈະ​ຮັບ​ເອົາ​ຜູ້​ອົບ​ພະ​ຍົບ​ຈາກ​ກຳປັ່ນ​ກູ້​ໄພ ອາ​ກົວ​ຣີ​ອຸ​​ສ

    ຄະນະ​ກຳມະການ​ເອີ​ຣົບ (EC) ແຈ້ງ​ໃຫ້​ຮູ້ເມື່ອ​ວັນ​ທີ 14 ສິງຫາ​ນີ້​ວ່າ ຝຣັ່ງ ເຢຍ​ລະ​ມັນ ລຸກ​ຊຳ​ບວກ ປອກ​ຕຸຍ​ການ ແລະ ​ແອດ​ສະ​ປາຍ ໄດ້​ເຫັນ​ດີ​ເປັນ​ກະສັນ​ກັນ ໃນ​ການ​ຮັບ​ເອົາ​ຜູ້​ອົບ​ພະ​ຍົບ​ທັງ​ໝົດ 141 ຄົນ ທີ່ຢູ່​ໃນ​ກຳປັ່ນ​ກູ້​ໄພ ອາ​ກົວ​ຣີ​ອຸ​​ສ (Aquarius).

    ການ​ຕົກລົງ​ດັ່ງກ່າວ ໄດ້​ເປັນ​ການ​ຢຸດຕິ​ທາງ​ຕັນ ທີ່​ໄດ້ແກ່​ຍາວ​ມາ​ເປັນ​ເວລາ 4 ວັນ ກ່ຽວ​ກັບ​ຊະ​ຕາ​ກຳ​ຂອງ​ຜູ້​ອົບ​ພະ​ຍົບ 141 ຄົນ ຊຶ່ງ​ກຳປັ່ນ​ກູ້​ໄພ ອາ​ກົວ​ຣີ​ອຸ​​ສ ໃຫ້​ຄວາມ​ຊ່ວຍເຫຼືອ ຢູ່​ໃນ​ເຂດ​ທະເລ​ເມ​ດີ​ເຕ​ຣາ​ເນ ຫຼັງ​ຈາກ​ທີ່​ອີ​ຕາ​ລີ ແລະ​ມານ​ຕາ ບໍ່​ອະນຸຍາດ​ໃຫ້​ກຳປັ່ນ​ລຳ​ນັ້ນ​ເຂົ້າ​ທຽບ​ທ່າ.

    ໃນ​ນັ້ນ ນາຍົກລັດຖະມົນຕີ​ແອດ​ສະ​ປາຍ ເປ​ໂດຣ ຊານ​ເຈ​​ສ ລົງ​ພິມ​ຂໍ້ຄວາມ​ຢູ່​ໃນ​ສື່​ສັງຄົມ  Twitter ໂດຍ​ແຈ້ງ​ໃຫ້​ຮູ້​ວ່າ ແອດ​ສະ​ປາຍ ຈະ​ຮັບ​ເອົາ​ຜູ້​ອົບ​ພະ​ຍົບ 60 ຄົນ ຈາກ​ຈຳນວນ 141 ຄົນ ຢູ່​ເທິງ​ກຳປັ່ນ​ອາ​ກົວ​ຣີ​ອຸ​​ສ. ໃນ​ຂະນະ​ດຽວ​ກັນ ທາງ​ການ​ປອກ​ຕຸຍ​ການ ກໍ​ປະກາດ​ຮັບ​ເອົາ​ຜູ້​ອົບ​ພະ​ຍົບ​ດັ່ງກ່າວ ຈຳນວນ 30 ຄົນ.

    ທາງ​ດ້ານ​ນາຍົກລັດຖະມົນຕີ ມານ​ຕາ ໂຈ​ເຊບ ມູ​​ສ​ກາດ ເວົ້າ​ວ່າ ມານ​ຕາ​ຈະ​ອະນຸຍາດ​ໃຫ້​ກຳປັ່ນ ອາ​ກົວ​ຣີ​ອຸ​​ສ ເຂົ້າ​ທຽບ​ທ່າ ເພື່ອ​ໃຫ້​ຜູ້​ອົບ​ພະ​ຍົບ​ຂຶ້ນ​ຝັ່ງ ແລະ ຫຼັງ​ຈາກ​ນັ້ນ​ກໍ​ສົ່ງ​ໄປ​ຍັງ 5 ປະເທດ​ດັ່ງກ່າວ.

 

    ນັບ​ແຕ່​ເດືອນ​ມິຖຸນາ​ປີ​ນີ້​ເປັນຕົ້ນ​ມາ ອີ​ຕາ​ລີ​ໄດ້​ປະຕິເສດ​ເປັນ​ປະຈຳ ຕໍ່​ການ​ຮັບ​ເອົາ​ກຳປັ່ນ​ກູ້​ໄພ ແລະ​ບັນດາ​ອົງການ​ທີ່​ບໍ່​ຂຶ້ນ​ກັບ​ລັດຖະບານ (NGO) ຂອງ​ຕ່າງປະເທດ ໃນ​ນັ້ນ​ມີ​ກຳປັ່ນ ອາ​ກົວ​ຣີ​ອຸ​​ສ ລວມ​ຢູ່​ນຳ ພ້ອມ​ທັງ​ກ່າວ​ຫາ​ວ່າ​ກຳປັ່ນ​ເຫຼົ່ານັ້ນ ຮ່ວມ​ມື​ກັບ​ບັນດາ​ຜູ້​ຄ້າ​ມະນຸດ.

 

ຂ່າວທີ່ກ່ຽວຂ້ອງ