ປະມູນການຈັດຊື້ອຸປະກອນ ຮັບໃຊ້ກຳມະການກອງເລຂາ ງານມະຫະກຳກີລາແຫ່ງຊາດ

195 16 ສ.ຫ. 2018 ວົງຈອນກີລາ
ປະມູນການຈັດຊື້ອຸປະກອນ ຮັບໃຊ້ກຳມະການກອງເລຂາ ງານມະຫະກຳກີລາແຫ່ງຊາດ

    ແຂວງ​ຊຽງ​ຂວາງ ຈັດ​ພິ­ທີເປີດ​ຂາຍ​ຊອງ​ປະ­ມູນ​ຈັດ​ຊື້​ອຸ­ປະກອນ ແລະ ເຄື່ອງ­ຮັບ​ໃຊ້​ໃຫ້​ແກ່ຄະ­ນະ​ກຳ­ມະ­ການ​ກອງ​ເລ­ຂາ ເພື່ອ​ກະ­ກຽມ​ໃຫ້​ແກ່​ງານ​ມະ​ຫະກຳ​ກີ­ລາ​ແຫ່ງ​ຊາດ ຄັ້ງ​ທີ 11 ທີ່​ແຂວງ​ຊຽງ​ຂວາງ ຂຶ້ນ​ວັນ​ທີ 8-10 ສິງ­ຫາ 2018 ຢູ່​ພະ​ແນກສຶກ​ສາ​ທິ​ການ ແລະ ກີ­ລາ (ສສກ) ແຂວງ​ຊຽງ​ຂວາງ ໂດຍ​ມີ​ທ່ານ ບົວ​ສອນ ສີ​ນວນ​ທອງ ຮອງ​ເຈົ້າ­ແຂວງ​ຊຽງ​ຂວາງ ຮອງ​ປະ­ທານ​ຈັດ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ 11 ແລະ ທ່ານ ບົວ​ລີ ພັນ​ນາ​ວົງ ຫົວ­ໜ້າ​ພະ​ແນກ ສສກ ແຂວງ​ຊຽງ​ຂວາງ ຄະ­ນະ​ກອງ​ເລ­ຂາ​ຜູ້​ປະ­ຈຳ­ການ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ການ​ຈັດ​ປະ­ມູນ​ຈັດ​ຊື້​ອຸ­ປະ­ກອນ​ຄັ້ງ​ນີ້​ມີ 6 ປະ­ເພດ (ເຄື່ອງ­ຮັບ​ໃຊ້​ຫ້ອງ­ການ) ເຊັ່ນ: ເຈ້ຍ A4 ບິກ ສະ​ກັອດ ເຄື່ອງ​ນອນ ເຄື່ອງ­ນຸ່ງ ແລະ ອຸ­ປະ­ກອນ​ຄົງ​ທີ່ (ຄອມ​ພິວ​ເຕີ ປຣິນ​ເຕີ) ການ​ປະ­ດັບ​ປະດາ​ສະ­ໜາມ​ແຂ່ງ­ຂັນ​ກີ­ລາ​ແຕ່​ລະ​ປະ­ເພດ ແລະ ເວ­ທີ​ສຳ­ຄັນ​ຕ່າງໆ ການ​ຜະ­ລິດ​ຫຼຽນ ສັດ​ນຳ​ໂຊກ ຕຸກກະ​ຕາ ໂລ​ໂກ້​ທີ່​ລະ­ນຶກ ແລະ ສາຍ​ຄ້ອງ​ຄໍ ໃນ​ນີ້​ມີ​ບໍ­ລິ­ສັດ ຫ້າງ​ຮ້ານ ລັດ​ວິ​ສາ​ຫະ​ກິດ​ເຂົ້າ​ຮ່ວມ​ປະ­ມູນ 27 ພາກ­ສ່ວນ ຈຸດ­ປະ­ສົງ​ກໍ່​ເພື່ອ​ຮັບ­ປະ­ກັນ​ການ­ຈັດ­ຕັ້ງ​ປະຕິ​ບັດ​ໂຄງ­ການ​ແຕ່​ຫົວ­ທີ​ ໃຫ້​ຖືກຕ້ອງສອດຄ່ອງ​ຕາມ​ຂັ້ນ​ຕອນ ລະ­ບຽບ​ການ​ຈັດ​ຊື້-ຈັດ​ຈ້າງ ດ້ວຍ​ທຶນ​ຂອງ​ລັດ ແລະ ກົດໝາຍ​ການ​ລົງ­ທຶນ​ຂອງ​ລັດ.

    ນອກ​ນັ້ນ ຍັງ​ເປີດ​ໂອ­ກາດ​ໃຫ້​ທຸກ​ພາກ­ສ່ວນ​ຫົວ­ໜ່ວຍ​ທຸ­ລະກິດ ທັງ​ພາກ​ລັດ ແລະ ເອ­ກະ​ຊົນ​ ເຂົ້າ​ມາ​ມີ​ສ່ວນ​ຮ່ວມ​ໃນ​ການ​ເປັນ​ເຈົ້າ­ພາບ​ທີ່​ດີ ພ້ອມ​ກັນ​ປະກອບ​ສ່ວນ​ທາງ​ວັດ­ຖຸຈິດ­ໃຈ ​ໃຫ້ແກ່​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ 11 ໃຫ້​ທັນ​ຕາມ​ກຳນົດ​ເວ­ລາ ແລະ ມີ​ປະ​ສິດ­ທິ​ຜົນສູງ ທັງ​ເປັນ​ການ​ປະ­ຕິ­ບັດ​ລະບຽບ​ການ​ຈັດ​ຊື້-ຈັດ​ຈ້າງ ເພື່ອຄວາມ​ໂປ່ງ​ໃສ ແລະ ບໍ­ລິ­ສຸດຍຸ­ຕິ​ທຳ​ອີກ​ດ້ວຍ.

ຂ່າວທີ່ກ່ຽວຂ້ອງ