ເຮືອບິນ​ແບບ​ບໍ່​ມີ​ຄົນ​ຂັບ ຖືກ​ຍິງ​ຕົກ​ຢູ່​ໃກ້​ຖານ​ທັບ​ຂອງ​ຣັດ​ເຊຍ ຢູ່​ໃນ​ຊີ​ຣີ

103 16 ສ.ຫ. 2018 ຂ່າວຕ່າງປະເທດ
ເຮືອບິນ​ແບບ​ບໍ່​ມີ​ຄົນ​ຂັບ ຖືກ​ຍິງ​ຕົກ​ຢູ່​ໃກ້​ຖານ​ທັບ​ຂອງ​ຣັດ​ເຊຍ ຢູ່​ໃນ​ຊີ​ຣີ

     ຂ່າວສານ AP ອ້າງ​ຕາມ​ສື່ສານ​ແຫ່ງ​ລັດ​ຊີ​ຣີ ໃຫ້​ຮູ້ເມື່ອ​ວັນ​ທີ 14 ສິງຫາ​ນີ້​ວ່າ ເຮືອບິນ​ແບບ​ບໍ່​ມີ​ຄົນ​ຂັບ​ຖືກ​ຍິງ​ຕົກ 5 ລຳ ຢູ່​ໃນ​ແຂວງ​ລາ​ຕາ​ເກຍ ໃນ​ເຂດ​ແຄມ​ຝັ່ງ​ທະເລ​ຂອງ​ຊີ​ຣີ ຊຶ່ງ​ເກີດ​ຂຶ້ນ​ເມື່ອ​ເຮືອ​ບີນ​ເຫຼົ່ານັ້ນ ເຂົ້າ​ໄປ​ໃກ້​ຖານ​ທັບ​ອາກາດ Hmeimim ຂອງ​ຣັດ​ເຊຍ ຢູ່​ໃນ​ເຂດ​ດັ່ງກ່າວ.

    ຖານ​ທັບ​ອາກາດ Hmeimim ເປັນ​ສຳນັກງານ​ບັນຊາ​ການ​ການເຄື່ອນໄຫວ​ດ້ານ​ທະຫານ​ຂອງ​ຣັດ​ເຊຍ ໃນ​ການ​ໃຫ້​ຄວາມ​ຊ່ວຍເຫຼືອ​ກອງ​ກຳລັງ​ຂອງ​ອຳນາດ​ການ​ປົກຄອງ ຂອງ​ປະທານາທິບໍດີ​ຊີ​ຣີ ບາ​ຊາ ອາ​​ລ-​ອັສ​ຊັດ. ຣັດ​ເຊຍ ເປັນ​ພັນທະ​ມິດ​ຕົ້ນຕໍ​ຂອງ​ປະທານາທິບໍດີ ​ອັສ​ຊັດ ແລະ ຊ່ວຍເຫຼືອ​ຜູ້ນຳ​ຊີ​ຣີ ຢູ່​ໃນ​ສົງຄາມ​ພາຍ​ໃນ​ປະເທດ ທີ່​ໄດ້ແກ່​ຍາວ​ມາ​ເປັນ​ເວລາ​ຫຼາຍ​ປີ.

   ອົງການ​ຕິດຕາມ​ສິດທິ​ມະນຸດ​ຊີ​ຣີ (SOHR) ໃຫ້​ຮູ້​ວ່າ ບັນດາ​ເຮືອບິນ​ແບບ​ບໍ່​ມີ​ຄົນ​ຂັບ​ດັ່ງກ່າວ ຖືກ​ຍິງ​ຕົກ​ເມື່ອ​ຄ່ຳ​ຄືນ​ຂອງ​ວັນ​ທີ 13 ສິງຫາ. SOHR ແລະ ສື່ສານ​ແຫ່ງ​ລັດ​ຊີ​ຣີ ກໍ​ໃຫ້​ຮູ້​ວ່າ ເຮືອບິນ​ທີ່​ຖືກ​ຍິງ​ຕົກ​ນັ້ນ ບິນ​ຂຶ້ນ​ຈາກ​ເຂດ​ດິນແດນ ທີ່​ຄວບ​ຄຸມ​ໂດຍ​ຝ່າຍ​ລຸກ​ຮື​ຂຶ້ນ ຢູ່​ໃນ​ແຂວງ​ໃກ້​ຄຽງ​ກັບ​ແຂວງ​ອິດ​ລິບ (ທິດຕາເວັນຕົກ​ສ່ຽງ​ເໜືອ​ປະເທດ​ຊີ​ຣີ).

 

ຂ່າວທີ່ກ່ຽວຂ້ອງ