ຂ່າວຫຼ້າສຸດ

ອີ​ຣັກ​ຕ້ອງການ​ຄ່າ​ໃຊ້​ຈ່າຍ 80 ຕື້​ໂດ​ລາ ເພື່ອ​ການ​ບູລະນະ​ສ້າງ

137 16 ສ.ຫ. 2018 ຂ່າວຕ່າງປະເທດ
ອີ​ຣັກ​ຕ້ອງການ​ຄ່າ​ໃຊ້​ຈ່າຍ 80 ຕື້​ໂດ​ລາ ເພື່ອ​ການ​ບູລະນະ​ສ້າງ

    ສື່ສານ​ໃນ​ເຂດ​ຕາເວັນ​ອອກ​ກາງ ອ້າງ​ຕາມ​ແຈ້ງ​ການ​ຂອງ​ລັດຖະບານ​ອີ​ຣັກ ໃຫ້​ຮູ້​ວ່າ ອີ​ຣັກ​ຕ້ອງການ​ເງິນ​ເກືອບ 80 ຕື້ ໂດ​ລາ​ສະຫະລັດ ເພື່ອ​ບູລະນະ​ສ້າ​​ງ​ສາ​ຄືນໃໝ່ ຢູ່​ໃນ​ບັນດາ​ຕົວ​ເມືອງ ທີ່​ໄດ້​ຮັບ​ການ​ປົດ​ປ່ອຍ​ຈາກ​ອົງການ​ກໍ່​ການ​ຮ້າຍ ລັດ​ອິ​ສລາມ (IS) ພ້ອມ​ທັງ​ເພື່ອ​ແກ້​ໄຂ​ການ​ບໍລິການ​ຢູ່​ໃນ​ຕົວ​ເມືອງ​ອື່ນໆ.

    ທ່ານ ຊາ​ອັດ ອາ​​ລ-ຮາ​ດີ​ທີ ໂຄສົກ​ຫ້ອງການ​ສື່ສານ​ຂອງ​ນາຍົກລັດຖະມົນຕີ​ອີ​ຣັກ ກ່າວ​ຕໍ່​ຜູ້​ສື່​ຂ່າວ​ຂອງ​ເອ​ຢິບ ວ່າ​ໃນ​ເວລາ​ນີ້ ບັນດາ​ອົງການ​ດ້ານ​ວິຊາ​ການ​ຂອງ​ອີ​ຣັກ ພວມ​ດຳເນີນ​ການ​ຕີ​ລາຄາ ເຖິງ​ຍອດ​ຄ່າ​ໃຊ້​ຈ່າຍ ທີ່​ປະ​ເມີນ​ໃຫ້​ແກ່​ວຽກ​ງານ​ບູລະນະ​ສ້າງສາ​ຄືນໃໝ່​ນັ້ນ​ຢູ່.

    ກ່ອນ​ໜ້າ​ນີ້ ເມື່ອ​ເດືອນ​ກຸມພາ​ທີ່​ຜ່ານ​ມາ ກູ​ເວດ ໄດ້​ເປັນ​ເຈົ້າພາບ​ຈັດ​ກອງ​ປະຊຸມ​ບັນດາ​ຜູ້​ອຸປະຖຳ​ດ້ານ​ການ​ເງິນ​ຂອງ​ສາກົນ ເພື່ອ​ລະດົມ​ກຳລັງ​ຄວາມ​ຊ່ວຍເຫຼືອ​ໃຫ້​ແກ່​ວຽກ​ງານ​ບູລະນະ​ສ້າງສາ​ຄືນໃໝ່​ຢູ່​ໃນ​ອີ​ຣັກ ທ່າມກາງ​ທີ່​ປະເທດ​ນີ້​ໄດ້​ຮັບ​ຄວາມ​ເສຍ​ຫາຍ​ຢ່າງ​ໜັກໜ່ວງ ຈາກ​ສົງຄາມ​ຕໍ່ຕ້ານ IS ທີ່​ໄດ້​ດຳເນີນ​ແຕ່​ປີ 2014 ເປັນຕົ້ນ​ມາ. ເມື່ອ​ສິ້ນ​ສຸດ​ກອງ​ປະຊຸມ​ດັ່ງກ່າວ ອີ​ຣັກ​ກໍ​ໄດ້​ຮັບ​ຄຳ​ສັນຍາ​ໃຫ້​ຄວາມ​ຊ່ວຍເຫຼືອ​ດ້ານ​ການ​ເງິນ​ເກືອບ 30 ຕື້​ໂດ​ລາ​ສະຫະລັດ ຈາກ​ບັນດາ​ຜູ້​ໃຫ້ການ​ອຸປະຖຳ​ການ​ເງິນ​ຂອງ​ສາກົນ ແຕ່​ວ່າ​ຕົວ​ເລກ​ນີ້​ຍັງ​ຕ່ຳ​ກວ່າ​ຫຼາຍ ເມື່ອ​ທຽບໃສ່​ລະດັບ​ຄວາມ​ຕ້ອງການ​ທີ່​ມີ​ເຖິງ  100 ຕື້​ໂດ​ລາ​ສະຫະລັດ.

    ສະພາບ​ຄວາມ​ບໍ່​ສະຫງົບ​ຢູ່​ໃນ​ອີ​ຣັກ ໄດ້​ເຮັດ​ໃຫ້​ປະຊາຊົນ​ເກືອບ 5 ລ້ານ​ຄົນ ຕ້ອງ​ໜີ​ອອກ​ຈາກ​ເຮືອນ​ຊານ ເພື່ອ​ໄປ​ລີ້​ໄພ ຢູ່​ທັງ​ພາຍ​ໃນ ແລະ ​ຕ່າງປະເທດ ພ້ອມ​ກັນ​ນັ້ນ​ກໍ​ເຮັດ​ໃຫ້​ເກີດ​ຄວາມ​ເສຍ​ຫາຍ​ຢ່າງ​ໜັກໜ່ວງ ໃຫ້​ແກ່​ລະບົບ​ພື້ນຖານ​ໂຄງ​ລ່າງ.

 

ຂ່າວທີ່ກ່ຽວຂ້ອງ