ຂ່າວຫຼ້າສຸດ

ສຳມະນາປະເມີນຜົນ ການຈັດຕັ້ງປະຕິບັດລັດຖະທຳມະນູນ ແລະ ກົດໝາຍ

315 15 ສ.ຫ. 2018 ຂ່າວໜ້າ​ໜຶ່ງ
ສຳມະນາປະເມີນຜົນ ການຈັດຕັ້ງປະຕິບັດລັດຖະທຳມະນູນ ແລະ ກົດໝາຍ

    ສະ­ພາ​ປະ­ຊາ­ຊົນ ນະ­ຄອນ­ຫຼວງ​ວຽງ​ຈັນ (ສປ.ນວ) ຮ່ວມ​ກັບ​ຫ້ອງ​ວ່າ­ການ​ປົກ­ຄອງ ນວ ຄະ­ນະ​ໂຄ­ສະ­ນາ​ອົບ­ຮົມ ນວ ແລະ ພະ​ແນກ​ຍຸ­ຕິ​ທຳ ນວ ຈັດ​ສຳ​ມະ​ນາ​ປະ​ເມີນ​ຜົນ​ການ­ຈັດ­ຕັ້ງ​ປະ­ຕິ­ບັດ​ລັດ​ຖະ​ທຳ​ມະ­ນູນ ແລະ ກົດ­ໝາຍ ໄລ­ຍະ 15 ສິງ­ຫາ 2017-15 ສິງ­ຫາ 2018 ໃນ​ໂອ­ກາດ​ວັນ​ລັດ​ຖະ​ທຳ​ມະ­ນູນ​ແຫ່ງ ສປປ ລາວ ຄົບ­ຮອບ 27 ປີ (15 ສິງ­ຫາ 1991-15 ສິງ­ຫາ 2018) ຕິດ​ພັນ​ກັບ​ວັນ​ຍຶດ​ອຳ­ນາດ 23 ສິງ­ຫາ ຄົບ­ຮອບ 43 ປີ ຂຶ້ນ​ວັນ​ທີ 14 ສິງ­ຫາ 2018 ຢູ່​ຫ້ອງ​ວ່າ­ການ​ປົກ­ຄອງ ນວ ໂດຍ​ເປັນ​ປະ­ທານ​ຂອງ​ທ່ານ ອຸ­ດອນ ໄຊ​ມຸນ­ຕີ ຮອງ​ປະ­ທານ ສປ.ນວ ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ ນວ ພ້ອມ​ດ້ວຍ​ບັນ­ດາ​ຮອງ​ເຈົ້າ​ຄອງ ແລະ ພາກ­ສ່ວນ​ກ່ຽວ­ຂ້ອງ.

    ລັດ​ຖະ​ທຳ​ມະ­ນູນ ເປັນ​ກົດ­ໝາຍ​ພື້ນ­ຖານ​ຂອງ​ຊາດ ທັງ​ເປັນ​ການ​ຫັນ​ແນວ­ທາງ​ປ່ຽນ­ແປງ​ໃໝ່​ຢ່າງ­ຮອບ­ດ້ານ ​ທີ່​ມີ​ຫຼັກ­ການ​ຂອງ​ພັກ ມາ​ເປັນ​ກົດ­ໝາຍ​ພື້ນ­ຖານ​ຂອງ​ລະ­ບອບ​ປະ­ຊາ­ທິ­ປະ­ໄຕ ປະ­ຊາ­ຊົນ ເພື່ອ​ສຶກ​ສາ​ອົບ­ຮົມ​ປະ­ຊາ­ຊົນ​ລາວ​ບັນ­ດາ­ເຜົ່າ ໃຫ້​ຍົກ​ສູງ​ນ້ຳ­ໃຈ​ຮັກ​ຊາດ ຮັກ​ລະ­ບອບ​ໃໝ່ ເພີ່ມ​ທະ­ວີ​ຄວາມ​ສາ­ມັກ­ຄີ​ທົ່ວ​ປວງ​ຊົນ​ລາວ ລັດ​ຖະ​ທຳ​ມະ­ນູນ​ຍັງ​ແມ່ນ​ການ​ສ້າງ​ສະ­ຕິ­ຊາດ​ເອ­ກະ​ພາບ​ອັນ​ໜຶ່ງ​ອັນ​ດຽວ​ກັນ ພາຍ​ໃຕ້​ການ​ນຳ­ພາ​ຂອງ​ພັກ ຮັບ​ຮູ້ ແລະ ປົກ​ປ້ອງ​ການ​ດຳ­ລົງ​ຄົງ​ຕົວ​ທີ່​ບໍ່​ຕັດ​ແຍກ​ອອກ​ຈາກ​ກັນ​ໄດ້​ຂອງ​ປະ­ຊາ­ຊົນ​ບັນ­ດາ­ເຜົ່າ ເປັນ​ພາ­ຫະ­ນະ​ທີ່​ສຳ­ຄັນ ​ເພື່ອ​ສຶກ​ສາ​ອົບ­ຮົມ​ປະ­ຊາ­ຊົນ​ໃນ​ການ​ຍົກ​ສູງ​ນ້ຳ­ໃຈ​ຮັກ​ຊາດ ຮັກ​ລະ­ບອບ​ປະ­ຊາ­ທິ­ປະ­ໄຕ ປະ­ຊາ­ຊົນ ເພີ່ມ​ທະ­ວີ​ຄວາມ​ສາ­ມັກ­ຄີ​ປອງ​ດອງ​ທົ່ວ​ປວງ​ຊົນ​ລາວ ເພື່ອ​ພ້ອມ​ກັນ​ສຸມ​ທຸກ​ກຳ­ລັງ ແລະ ຄວາມ​ສາ­ມາດ​ຂອງ​ຕົນ ປະ­ກອບ­ສ່ວນ​ໃນ​ການ​ປົກ​ປັກ​ຮັກ­ສາ ແລະ ສ້າງ­ສາ​ປະ­ເທດ​ຊາດ ຕາມ​ແນວ­ທາງ​ປ່ຽນ­ແປງ​ໃໝ່ ແນ­ໃສ່​ເຮັດ​ໃຫ້​ປະ­ເທດ​ຊາດ​ມີ​ຄວາມ​ມັ່ງ​ຄັ່ງ​ເຂັ້ມ­ແຂງ ປະ­ຊາ­ຊົນ​ຮັ່ງ­ມີ​ຜາ​ສຸກ ສັງ­ຄົມ​ມີ​ຄວາມ​ສາ­ມັກ­ຄີ​ປອງ​ດອງ ມີ​ປະ­ຊາ­ທິ­ປະ­ໄຕ ຍຸ­ຕິ​ທຳ ແລະ ສີ­ວິ­ໄລ ເຊິ່ງ​ນັບ​ແຕ່​ໄດ້​ດຳ­ເນີນ​ແນວ­ທາງ​ປ່ຽນ­ແປງ​ໃໝ່​ຮອບ­ດ້ານທີ່​ມີ​ຫຼັກ­ການ​ເປັນ­ຕົ້ນ​ມາ ພັກ​ເຮົາ​ໄດ້​ນຳ­ພາ​ສ້າງ​ປັບ­ປຸງນຳ​ໃຊ້​ລັດ​ຖະ​ທຳ​ມະ­ນູນ ກົດ­ໝາຍ ແລະ ນິ­ຕິ​ກຳ​ໃຕ້​ກົດ­ໝາຍ​ຫຼາຍ​ສົມ­ຄວນ ປັດ­ຈຸ­ບັນ​ມີ​ກົດ­ໝາຍ​ທີ່​ໄດ້​ປະ­ກາດ​ໃຊ້​ແລ້ວ 133 ສະ­ບັບ.

    ສຳ​ມະ​ນາ​ຄັ້ງ​ນີ້ ບັນ­ດາ​ພະ­ແນກ­ການ​ກ່ຽວ­ຂ້ອງ​ ໄດ້​ຜັດ­ປ່ຽນ​ກັນ​ປະ­ກອບ​ຄຳ​ເຫັນ​ໃສ່​ແຕ່​ລະ​ຫົວ­ຂໍ້ ໂດຍ​ສະ­ເພາະ ຄວາມ​ໝາຍຄວາມ​ສຳ­ຄັນ​ຂອງ​ລັດ​ຖະ​ທຳ​ມະ­ນູນ​ແຫ່ງ ສປປ ລາວ ການ­ຈັດ­ຕັ້ງ​ປະ­ຕິ­ບັດ​ລັດ​ຖະ​ທຳ​ມະ­ນູນ ກົດ­ໝາຍຢູ່ ນວ ແລະ ການ​ປະ­ຕິ­ບັດ​ກົດ­ໝາຍ ສິດ­ທິ ແລະ ພັນ­ທະ​ຂອງ​ພົນ­ລະ­ເມືອງ ການ­ຈັດ­ຕັ້ງ​ປະ­ຕິ­ບັດ​ກົດ­ໝາຍ​ວ່າ​ດ້ວຍ​ຜັງ­ເມືອງ ກົດ­ໝາຍ​ທາງ​ຫຼວງ ແລະ ການ​ຈັດ​ສັນ​ຄວາມ​ບໍ່​ເປັນ​ລະ­ບຽບ​ຮຽບ​ຮ້ອຍ​ໃນ​ຕົວ​ເມືອງ ການ­ຈັດ­ຕັ້ງ​ປະ­ຕິ­ບັດ​ກົດ­ໝາຍ​ວ່າ​ດ້ວຍ​ຢາ​ເສບ​ຕິດ ການ​ແກ້​ໄຂ​ບັນ­ຫາ​ຢາ​ເສບ​ຕິດ ການ­ຈັດ­ຕັ້ງ​ປະ­ຕິ­ບັດ​ກົດ­ໝາຍ​ວ່າ​ດ້ວຍ​ທີ່​ດິນ ບັນ­ຫາ​ການ​ຂັດ​ແຍ່ງ​ທີ່​ດິນ ກົດ­ໝາຍ​ວ່າ​ດ້ວຍ​ສິ່ງ­ແວ­ດລ້ອມ ແລະ ການ​ເສີມ​ຂະ­ຫຍາຍ​ມູນ­ເຊື້ອ 23 ສິງ­ຫາ ເຂົ້າ​ໃນ​ການ​ພັດ­ທະ­ນາ ນວ ໃນ​ໄລ­ຍະ​ໃໝ່.

ຂ່າວທີ່ກ່ຽວຂ້ອງ