ຂ່າວຫຼ້າສຸດ

ສືບຕໍ່ມອບສິ່ງເສດເຫຼືອຂອງທະຫານອາເມຣິກາ

285 15 ສ.ຫ. 2018 ຂ່າວໜ້າ​ໜຶ່ງ
ສືບຕໍ່ມອບສິ່ງເສດເຫຼືອຂອງທະຫານອາເມຣິກາ

    ພິທີ​ມອບ-ຮັບ​ສິ່ງ​ເສດ​ເຫຼືອ​ຂອງ​ທະຫານ​ອາ​ເມ​ຣິ​ກາ ທີ່​ໄດ້​ເສຍ​ຊີ​ວິດ​ໃນ​ປາງ​ສົງຄາມ​ຢູ່​ລາວ ທີ່​ຖືກ​ຄົ້ນ​ພົບ​ຈາກ​ການ​ປະຕິບັດ​ງານ​ຮ່ວມ​ພາກ​ສະໜາມ​ ລະຫວ່າງ​ຄະນະ​ວິຊາ​ການ​ລາວ-ອາ​ເມ​ຣິ​ກາ ຄັ້ງ​ທີ 5 ປະຈຳ​ສົກ​ປີ 2017-2018 ຢູ່​ເຂດ​ແຂວງ​ອຸດົມ​ໄຊ ແລະ ແຂວງ​ຫົວພັນ ໄດ້​ຈັດ​ຂຶ້ນ​ວັນ​ທີ 14 ສິງຫາ 2018 ຢູ່​ແຂວງ​ຫຼວງ​ພະ​ບາງ ເຊິ່ງ​ມອບ​ໂດຍ​ທ່ານ ແສງ​ເພັດ ຮຸ່ງ​ບຸນ​ຍວງ ຮອງ​ລັດຖະມົນຕີ​ກະຊວງ​ການ​ຕ່າງປະເທດ ຜູ້​ຊີ້​ນຳ​ວຽກ​ງານ MIA ແລະ ຮັບ​ໂດຍ​ທ່ານ​ນາງ Rena Bitter ເອກ​ອັກ​ຄະ​ລັດ​ຖະ​ທູດ​ອາ​ເມ​ຣິ​ກາ ປະຈຳ​ລາວ ມີ​ພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມ.

    ໂດຍ​ສືບຕໍ່​ປະຕິບັດ​ນະໂຍບາຍ​ມະນຸດສະທຳ​ ອັນ​ສະເໝີ​ຕົ້ນ​ສະເໝີ​ປາຍ​ຂອງ​ລັດຖະບານ​ລາວ ທີ່​ມີ​ຕໍ່​ຄອບຄົວ ກໍ່​ຄື​ຍາດ​ພີ່ນ້ອງ​ຂອງ​ທະຫານ​ອາ​ເມ​ຣິ​ກາ ຜູ້​ຫາຍ​ສາບ​ສູນ​ໃນ​ປາງ​ສົງຄາມ​ຢູ່​ລາວ ແລະ ອີງ​ຕາມ​ການ​ຮ້ອງ​ຂໍ​ຂອງ​ລັດຖະບານ​ອາ​ເມ​ຣິ​ກາ ​ໃນ​ການ​ແກ້​ໄຂ​ບັນຫາ​ດັ່ງກ່າວ ນັບ​ແຕ່​ປີ 1985 ເປັນຕົ້ນ​ມາ ຄະນະ​ວິຊາ​ການ​ລາວ-ອາ​ເມ​ຣິ​ກາ ໄດ້​ຮ່ວມ​ກັນ​ດຳເນີນ​ການ​ສຳ​ຫຼວດ ແລະ ຂຸດ​ຄົ້ນ ເພື່ອ​ຊອກ​ຫາ​ຮ່ອງຮອຍ ແລະ ສິ່ງ​ເສດ​ເຫຼືອ​ຂອງ​ທະຫານ​ອາ​ເມ​ຣິ​ກາ ທີ່​ຫາຍ​ສາບ​ສູນ​ໃນ​ປາງ​ສົງຄາມ​ຢູ່​ລາວ ທັງ​ໝົດ 573 ຄົນ ປັດຈຸບັນ ລັດຖະບານ​ລາວ ​ໄດ້​ມອບ​ສິ່ງ​ເສດ​ເຫຼືອ​ທະຫານ​ອາ​ເມ​ຣິ​ກາ ທີ່​ໄດ້​ເສຍ​ຊີວິດ​ຢູ່​ລາວ​ທີ່​ໄດ້​ຮັບ​ການ​ສັນ​ນະ​ສູດ​ແລ້ວ 282 ຄົນ ໃຫ້​ອາ​ເມ​ຣິ​ກາ ແລະ ຍັງ​ອີກ 291 ຄົນ ທີ່​ຍັງ​ເຫຼືອ​ຈະ​ໄດ້​ຮ່ວມ​ກັນ​ສືບຕໍ່​ຄົ້ນ​ຫາ​ໃນຕໍ່ໜ້າ.

    ເມື່ອ​ມໍ່ໆມານີ້​ລັດຖະບານ​ອາ​ເມ​ຣິ​ກາ ໄດ້​ຮ້ອງ​ຂໍ​ໃຫ້​ລັດຖະບານ​ລາວ ຊ່ວຍເຫຼືອ​ໃນ​ການ​ຊອກ​ຫາ​ຜູ້​ທີ່​ຫາຍ​ສາບ​ສູນ​ໃນ​ປາງ​ສົງຄາມ​ຢູ່​ລາວ ​ໃຫ້​ໄວ​ກວ່າ​ເກົ່າ ໂດຍ​ເຫັນ​ໄດ້​ຄວາມ​ສຳຄັນ​ຂອງ​ວຽກ​ງານ​ມະນຸດສະທຳ​ນີ້ ລັດຖະບານ​ລາວ​ ໄດ້​ກຽມພ້ອມ​ທີ່​ຈະ​ໃຫ້ການ​ຮ່ວມ​ມື​ໃນ​ການ​ປະຕິບັດ​ງານ​ຮ່ວມ​ສອງ​ຝ່າຍ ເພື່ອ​ຊອກ​ຄົ້ນ​ເອົາ​ສິ່ງ​ເສດ​ເຫຼືອ​ຂອງ​ທະຫານ​ອາ​ເມ​ຣິກາ ສົ່ງ​ຄືນ​ໃຫ້​ຄອບຄົວ​ເທົ່າ​ທີ່​ຈະ​ເຮັດ​ໄດ້.

    ການ​ຮ່ວມ​ມື​ສອງ​ຝ່າຍ​ລາວ-ອາ​ເມ​ຣິ​ກາ ໃນ​ດ້ານ​ນີ້​ໄດ້​ຮັບ​ຜົນສຳເລັດ​ເປັນ​ຢ່າງ​ດີ ຍ້ອນ​ມີ​ການ​ຮ່ວມ​ມື​ຂອງ​ລັດຖະບານ ເຈົ້າ​ໜ້າທີ່​ທຸກ​ຂັ້ນ​ແຕ່​ສູນ​ກາງ​ຮອດ​ທ້ອງຖິ່ນ ກໍ່​ຄືການ​ຮ່ວມ​ມື​ອັນ​ດີ​ຂອງ​ປະຊາຊົນ​ບັນດາເຜົ່າ ອັນ​ເປັນ​ການ​ສ່ອງ​ແສງ​ຢ່າງ​ຈະແຈ້ງ​ເຖິງ​ນະໂຍບາຍ​ມະນຸດສະທຳ ​ອັນ​ສະເໝີ​ຕົ້ນສະເໝີ​ປາຍ​ຂອງ​ລັດຖະບານ​ລາວ ທີ່​ມີ​ຕໍ່​ລັດຖະບານ ແລະ ປະຊາຊົນ​ອາ​ເມ​ຣິ​ກາ ໂດຍ​ສະເພາະ ຕໍ່​ຄອບຄົວ​ຍາດຕິ​ພີ່ນ້ອງ​ຜູ້​ທີ່​ຫາຍ​ສາບ​ສູນ​ໃນ​ປາງ​ສົງຄາມ​ຢູ່​ລາວ.

ຂ່າວທີ່ກ່ຽວຂ້ອງ