ສ້າງຂະບວນການຕ້ອນຮັບ ວັນສ້າງຕັ້ງແນວລາວສ້າງຊາດ

190 15 ສ.ຫ. 2018 ຂ່າວໜ້າ​ໜຶ່ງ
ສ້າງຂະບວນການຕ້ອນຮັບ ວັນສ້າງຕັ້ງແນວລາວສ້າງຊາດ

    ຫ້ອງ­ການ​ແນວ​ລາວ​ສ້າງ​ຊາດ ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ (ນວ) ຮ່ວມ​ກັບ​ແນວ​ລາວ​ສ້າງຊາດ​ບ້ານ​ຕ່າງໆ ຈັດ​ພິ­ທີ​ປ່ອຍ​ປາ ແລະ ປູກ​ຕົ້ນ­ໄມ້ ເພື່ອ​ສ້າງ​ຂະ​ບວນ​ການ​ຄຳ­ນັບ​ຮັບ​ຕ້ອນ​ວັນ​ສ້າງ­ຕັ້ງ​ແນວ​ລາວສ້າງ​ຊາດ ຄົບ­ຮອບ 68 ປີ ກອງ​ປະ­ຊຸມ​ຜູ້​ຊົງ​ຄຸນ​ວຸດ​ທິ​ບັນ­ດາ­ເຜົ່າ ຄັ້ງ​ທີ III ປີ 2018 ຈັດ​ຂຶ້ນ​ວັນ​ທີ 13 ສິງ­ຫາ 2018 ຢູ່​ໜອງ​ປາ ວັດ​ພະ​ບາດ​ໂພນ​ຄ້ອງ ໂດຍ​ມີ​ທ່ານ ບຸນ​ທ່ຽງ ຂຸນ​ສີ ປະ­ທານ​ແນວ​ລາວ​ສ້າງ​ຊາດ ນວ ທ່ານ ວິ­ລະ​ສັກ ນາມ​ມຸນ­ຕີ ເຈົ້າ­ເມືອງ​ນາ​ຊາຍ​ທອງ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ເພັດ​ສະ­ຫວັນ ວິ​ມະ​ລາ​ວົງ ປະ­ທານ​ແນວ​ລາວ​ສ້າງ​ຊາດ​ເມືອງ​ນາ​ຊາຍ​ທອງ ກ່າວ​ວ່າ: ເມືອງ​ນາ​ຊາຍທອງ ມີ​ແມ່­ນ້ຳ ຫ້ວຍ ໜອງ ຄອງ​ບຶງ ແລະ ອ່າງ­ເກັບ­ນ້ຳ​ຫຼາຍ​ແຫ່ງ ເຊິ່ງ​ອຳ­ນວຍ​ຄວາມ​ສະ­ດວກ​ໃຫ້​ແກ່ວຽກ​ງານ​ການ​ປະ­ມົງ ເພື່ອ​ເຮັດ​ໃຫ້​ຈຳ­ນວນ​ປາ​ມີ​ຫຼາຍ​ໃນ​ແຫຼ່ງ​ນ້ຳ​ທຳ​ມະ​ຊາດ ຈຳ­ເປັນ​ຕ້ອງ​ໄດ້​ມີ​ການ​ປ່ອຍ​ປາ ແລະ ສັດ​ນ້ຳ​ອື່ນໆ​ລົງ​ສູ່​ທຳ​ມະ​ຊາດ ແລະ ປ່ອຍ​ລົງ​ໜອງ​ລ້ຽງ​ເອງ ເພື່ອ​ສ້າງ​ຄວາມ​ສົມ​ດຸນ​ດ້ານ​ລະ­ບົບ​ນິ­ເວດ ເພີ່ມ​ສະ­ບຽງອາ­ຫານ ແລະ ຂາຍ​ເປັນ​ສິນ­ຄ້າ ໂດຍ​ສ່ວນ​ບຸກ­ຄົນ ນິ­ຕິ­ບຸກ­ຄົນ ບໍ­ລິ­ສັດ ນັກ­ທຸ­ລະ­ກິດ ຜູ້​ປະ­ກອບ​ການ​ເປັນ​ຜູ້ຈັດ​ຕັ້ງ​ພາຍ​ໃຕ້​ການ​ຊີ້​ນຳ​ຂອງ​ລັດ ເພື່ອ​ຂະ­ຫຍາຍ​ພັນ​ຕາມ​ທຳ​ມະ​ຊາດ ໂດຍ​ພາກ​ລັດ ອົງ­ການ​ປົກ­ຄອງ​ທ້ອງ­ຖິ່ນ ແລະ ທຸກ​ຊັ້ນ​ຄົນ​ເປັນ​ຜູ້​ຮັບ­ຜິດ­ຊອບ ນັບ​ແຕ່​ປີ 1994-2017 ເປັນ­ຕົ້ນ ເມືອງ​ນາ​ຊາຍ​ທອງ ປ່ອຍ​ປາ​ສູ່​ທຳ​ມະ​ຊາດແລ້ວ 23.407.493 ໂຕ ນົກ 87 ໂຕ.

    ສະ­ເພາະ​ປີ 2018 ຫ້ອງ­ການ​ແນວ​ລາວ​ສ້າງ​ຊາດ ​ເມືອງ​ນາ​ຊາຍ​ທອງ ໄດ້​ຈັດ​ກິດ­ຈະ­ກຳ​ປ່ອຍ​ປາ​ລົງ​ສູ່​ທຳ​ມະຊາດ ຈຳ­ນວນ 30.000 ກວ່າ​ໂຕ ໃນ​ນີ້ ມີ​ປາ​ນິນ ປາ​ໃນ​ຄຳ ປາ­ປາກ ແລະ ປູກ​ເບ້ຍ​ໄມ້​ຕ່າງໆ 200 ຕົ້ນ.

ຂ່າວທີ່ກ່ຽວຂ້ອງ