ຮື້ຖອນເທີບ ສິ່ງກີດຂວາງ ທີ່ກວມເອົາເຂດສະຫງວນຖະໜົນສຸພານຸວົງ

286 15 ສ.ຫ. 2018 ຂ່າວໜ້າ​ໜຶ່ງ
ຮື້ຖອນເທີບ ສິ່ງກີດຂວາງ ທີ່ກວມເອົາເຂດສະຫງວນຖະໜົນສຸພານຸວົງ

    ໂດຍ​ປະ­ຕິ­ບັດ​ຕາມ​ແຈ້ງ​ການ​ຂອງ​ພະ​ແນກ​ໂຍ­ທາ​ທິ​ການ ແລະ ຂົນ­ສົ່ງ ນະ­ຄອນ­ຫຼວງ​ວຽງ​ຈັນ (ຍທຂ.ນວ) ເລື່ອງ​ໃຫ້​ມ້າງ ຮື້​ຖອນ​ເທີບ-ເງີບ ຕູບ ເຕັ້ນ ໂຕະ​ຕັ່ງ ຮົ້ວ ປ້າຍ​ໂຄ­ສະ­ນາ ແລະ ສິ່ງ​ປຸກ​ສ້າງ​ອື່ນໆ ທີ່​ກວມ​ເອົາ​ເຂດ​ສະ­ຫງວນ​ຖະ­ໜົນ​ສຸ​ພາ­ນຸ​ວົງ ແຕ່​ສີ່​ແຍກ​ສະ­ໜາມ​ບິນ​ວັດ​ໄຕ-ສາມ​ແຍກ​ສີ​ໄຄ ເມືອງ​ສີ​ໂຄດ​ຕະ­ບອງ ວັນ​ທີ 14 ສິງ­ຫາ 2018 ທ່ານ ບຸນ​ຈັນ ແກ້ວ​ສີ​ທຳ​ມະ ຮອງ​ຫົວ­ໜ້າ​ພະ​ແນກ ຍທຂ.ນວ ພ້ອມ​ດ້ວຍ​ອຳ­ນາດ​ການ​ປົກ­ຄອງ​ບ້ານ ແລະ ພາກ­ສ່ວນ​ທີ່​ກ່ຽວ­ຂ້ອງ ລົງ​ຈັດ​ສັນ​ຄວາມ​ບໍ່​ເປັນ​ລະ­ບຽບ​ຮຽບ​ຮ້ອຍ​ຢູ່​ຖະ­ໜົນ​ດັ່ງ­ກ່າວ.

    ທ່ານ ບຸນ​ຈັນ ແກ້ວ​ສີ​ທຳ​ມະ ກ່າວ​ວ່າ: ການ​ຕໍ່​ເຕີມ​ເທີບ-ເງີບ ຕູບ ເຕັ້ນ ໂຕະ​ຕັ່ງ ຮົ້ວ ປ້າຍ​ໂຄ­ສະ­ນາ ຕູ້ ATM ແລະ ສິ່ງ​ກີດ­ຂວາງ​ອື່ນໆ ທີ່​ກວມ​ເອົາ​ເຂດ​ສະ­ຫງວນ​ທາງ​ນັ້ນ ແມ່ນ​ຜິດ​ຕໍ່​ກົດ­ໝາຍ​ທາງ​ຫຼວງ ແລະ ກົດ­ໝາຍ​ຜັງ­ເມືອງ ສະ­ນັ້ນ ເພື່ອ​ເຮັດ​ໃຫ້​ຕົວ​ເມືອງ​ມີ​ຄວາມ​ສະ­ອາດ​ຈົບ­ງາມ ພະ​ແນກ ຍທຂ.ນວ ຈຶ່ງ​ມີ​ຄວາມ​ຈຳ­ເປັນ​ຕ້ອງ​ແຈ້ງ​ມາ​ຍັງ​ບັນ­ດາ​ອົງ­ການ​ພາກ​ລັດ ບຸກ­ຄົນ ແລະ ນິ­ຕິ­ບຸກ­ຄົນ ຈົ່ງ​ໃຫ້­ການ​ຮ່ວມ​ມື​ໃນ​ການ­ຈັດ­ຕັ້ງ ມ້າງ ຮື້​ຖອນ​ເທີບ-ເງີບ ຕູບ ເຕັ້ນ ໂຕະ​ຕັ່ງ ຮົ້ວ ປ້າຍ​ໂຄ­ສະ­ນາ ແລະ ສິ່ງ​ກີດ­ຂວາງ​ອື່ນໆ ອອກ​ຈາກ​ເຂດ​ສະ­ຫງວນ​ຖະ­ໜົນ ພາຍ­ຫຼັງ​ທີ່​ໄດ້​ກຳ­ນົດ​ເວ­ລາ​ໄວ້.

    ການ​ຮື້​ຖອນ​ສິ່ງ​ກິດ​ຂວາງ​ຕ່າງໆ ​ທີ່​ກວມ​ເອົາ​ເຂດ​ສະ­ຫງວນ​ຖະ­ໜົນ ມີ​ຄວາມ​ຈຳ­ເປັນ​ຕ້ອງ​ໄດ້​ປະ­ຕິບັດ​ຕາມ​ລະ­ບຽບ ໂດຍ​ການ​ຮື້​ຖອນ​ແມ່ນ​ເຫັນ​ດີ​ໃຫ້​ປະ­ຊາ­ຊົນ​ມ້າງ​ອອກ​ເອງ ແຕ່​ກໍ­ລະ­ນີ​ບໍ່​ທ່ວງ​ທັນ ແມ່ນ​ເຫັນ​ດີ​ໃຫ້​ທາງ​ພາກ­ສ່ວນ​ກ່ຽວ­ຂ້ອງ ຊອກ​ແຮງ​ງານ​ມ້າງ​ໃຫ້ ແລ້ວ​ຄິດ­ໄລ່​ຄ່າ​ແຮງ​ງານ​ນັ້ນ​ຄືນ​ຕາມ​ຫຼັງ ເຊິ່ງ​ຜ່ານ​ການ​ລົງ​ຮື້​ຖອນ​ຕົວ​ຈິງ ຈຳ­ນວນ 5 ບ້ານ ມີ​ເທີບ-ເງີບ 104 ກໍ­ລະ­ນີ ປ້າຍ​ໂຄ­ສະ­ນາ​ຕ່າງໆ 54 ປ້າຍ ແລະ ຮົ້ວ​ກຳ­ແພງ 2 ກໍ­ລະ­ນີ.

    ສຳ­ລັບ​ປະ­ຊາ­ຊົນ​ທີ່​ມີ​ຈຸດ­ປະ­ສົງ​ກໍ່­ສ້າງ​ເທີບ-ເງີບ​ຄືນ ຫຼື ການ​ກໍ່­ສ້າງ​ອື່ນໆ​ໃນ​ເຂດ​ດັ່ງ­ກ່າວ​ນີ້ ຕ້ອງ​ຂໍ­ອະ­ນຸ­ຍາດ ແລະ ແຈ້ງ​ໃຫ້​ພາກ­ສ່ວນ​ທີ່​ກ່ຽວ­ຂ້ອງ​ຮັບ​ຊາບ​ກ່ອນ ​ຈຶ່ງ​ສາ­ມາດ​ລົງ­ມື​ກໍ່­ສ້າງ​ໄດ້.

ຂ່າວທີ່ກ່ຽວຂ້ອງ