ຂ່າວຫຼ້າສຸດ

ຈະຈັດງານວາງສະແດງ ASEAN FAIR 2018 ຢູ່ສະຫວັນນະເຂດ

223 15 ສ.ຫ. 2018 ຂ່າວໜ້າ​ໜຶ່ງ
ຈະຈັດງານວາງສະແດງ ASEAN FAIR 2018 ຢູ່ສະຫວັນນະເຂດ

    ເພື່ອ​ເປັນ​ການ​ສົ່ງ­ເສີມ​ການ​ພົວ­ພັນ ແລະ ການ​ຮ່ວມ​ມື​ລະ­ຫວ່າງລາວ ແລະ ປະ­ເທດ​ສະ­ມາ­ຊິກ​ອາຊຽນ ທັງ​ເປັນ​ການ​ສ້າງ​ເວ­ທີ​ໃນ​ການ​ໂຄ­ສະ­ນາ ແລະ ຈຳ­ໜ່າຍ​ສິນ­ຄ້າ ສ້າງ​ຄວາມ​ເຂັ້ມ­ແຂງ​ໃຫ້​ຜູ້​ປະ­ກອບ​ການ​ມີ​ຫຼາຍ​ຊ່ອງ​ທາງ​ໃນ​ການ​ເຂົ້າ​ຫາ​ຕະ­ຫຼາດ ຈັບ​ຄູ່​ຮ່ວມ​ທຸ­ລະ​ກິດ ແລກ­ປ່ຽນ​ບົດ­ຮຽນ​ເຊິ່ງ​ກັນ ແລະ ກັນ​ ແລະ ເປັນ​ການ​ສ້າງ​ກິດ­ຈະ­ກຳ​ເພື່ອ​ສະ­ໜັບ­ສະ­ໜູນ​ປີ​ທ່ອງ​ທ່ຽວ​ລາວ 2018 ໃຫ້​ນັກ​ທ່ອງ​ທ່ຽວ ນັກ​ລົງ­ທຶນ​ເຂົ້າ​ມາ​ລາວ​ໃຫ້​ນັບ​ມື້​ຫຼາຍ​ຂຶ້ນ.

    ວັນ​ທີ 13 ສິງ­ຫາ 2018 ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ (ສຄອ) ຮ່ວມ​ກັບ​ບໍ­ລິ­ສັດ ເທັນ​ໂຊ ຈຳ­ກັດ ປະ­ເທດ​ໄທ ຈັດ​ພິ­ທີ​ຖະ­ແຫຼງ​ຂ່າວ​ກ່ຽວ​ກັບ​ງານ​ວາງ­ສະ­ແດງ ASEAN FAIR 2018 ຂຶ້ນ​ຢູ່ ສຄອ ໂດຍ​ມີ​ທ່ານ​ນາງ ຈັນ­ທະ​ຈອນ ວົງ​ໄຊ ຮອງ​ປະ­ທານ ສຄອ ທ່ານ​ນາງ ສີ​ຣາ​ມົນ ສີ­ຂຽວ ປະ­ທານ​ບໍ­ລິ­ສັດ ​ເທັນ​ໂຊ ຈຳ­ກັດ ປະ­ທານ​ຜູ້​ຈັດ​ງານ​ວາງ­ສະ­ແດງ ASEAN FAIR 2018 ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ງານ​ວາງ­ສະ­ແດງ ASEAN FAIR 2018 ຈະ​ຈັດ​ຂຶ້ນ​ແຕ່​ວັນ​ທີ 20-23 ກັນ­ຍາ 2018 ຢູ່​ສູນ​ການ​ຄ້າ​ສະ­ຫວັນ-ໄອ​ເຕັກ ແຂວງ​ສະ­ຫວັນ​ນະ​ເຂດ ເຊິ່ງ​ພາຍ​ໃນ​ງານ​ຈະ​ມີ​ສິນ­ຄ້າ​ຫຼາຍ​ປະ­ເພດ ເປັນ­ຕົ້ນ ເຄື່ອງ​ກະ­ສິ­ກຳ ອຸດ­ສາ­ຫະ­ກຳ ເຄື່ອງ​ກົນ​ຈັກ ເຄື່ອງ­ນຸ່ງ​ຫົ່ມ ເຄື່ອງ­ໃຊ້​ໃນ​ຄົວ​ເຮືອນ ແລະ ອື່ນໆ ຈາກ​ພາຍ​ໃນ ແລະ ນຳ​ເຂົ້າ​ຈາກ​ຕ່າງ­ປະ­ເທດ 200 ກວ່າ​ຮ້ານ ໃນ​ນີ້ ສິນ­ຄ້າ​ຈາກ​ປະ­ເທດ​ໄທ ມີ​ປະ­ມານ 60% ສິນ­ຄ້າ​ຈາກ​ລາວ ແລະ ປະ­ເທດ​ສະ­ມາ­ຊິກ​ອາ​ຊຽນ 40% ນອກ­ຈາກ​ວາງ­ສະ­ແດງ ແລະ ຂາຍ​ສິນ­ຄ້າ​ແລ້ວ ຍັງ​ຈະ​ມີ​ການ​ສຳ​ມະ​ນາ ສະ­ແດງ​ສິ­ລະ​ປະ ແຂ່ງ­ຂັນ​ແຕ່ງ­ກິນ ແລະ ອື່ນໆ ພ້ອມ​ນີ້ ງານ​ມື້​ສຸດ​ທ້າຍ​ກໍ່​ຈະ​ເປັນ​ການ​ລະ­ດົມ​ທຶນ ​ເພື່ອ​ຊ່ວຍ­ເຫຼືອ​ຜູ້​ປະ­ສົບ​ໄພ​ນ້ຳ​ຖ້ວມ​ຢູ່​ພາກ​ໃຕ້​ຂອງ​ລາວ​ອີກ​ດ້ວຍ ດັ່ງ­ນັ້ນ ຖ້າ​ຫົວ­ໜ່ວຍ​ທຸ­ລະ​ກິດ​ໃດ​ສົນ­ໃຈ​ເຂົ້າ​ຮ່ວມ​ງານ ສາ­ມາດ​ພົວ­ພັນ​ໄດ້​ທີ່​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ ຫຼື ສະ­ພາ​ການ​ຄ້າ ແລະ ອຸດ­ສາ­ຫະ­ກຳ ແຂວງ​ສະ­ຫວັນ​ນະ​ເຂດ ໃນ​ໂມງ​ລັດ​ຖະ​ການ.

ຂ່າວທີ່ກ່ຽວຂ້ອງ