ຂ່າວຫຼ້າສຸດ

ເມົາແລ້ວຂັບ

558 15 ສ.ຫ. 2018 ນານາສາລະ

   ເມົາ​ແລ້ວ​ຂັບ​ຂີ່​ລົດ ຜົນ​ຕາມ​ມາ​ຫຼາຍ​ກໍ­ລະ­ນີ ກໍ່​ຄື ເກີດ​ອຸ­ບັດ​ຕິ​ເຫດ​ລົດ​ຕຳ​ກັນ ຫຼື ບໍ່​ດັ່ງ­ນັ້ນ​ກໍ່​ຕຳເສົາ​ໄຟ­ຟ້າ ກຳ­ແພງ​ເຮືອນ ລົດ​ເສຍ​ຫາຍ​ເພ­ພັງ ບາງ​ຄົນ​ເອົາ​ຊີ­ວິດ​ບໍ່​ລອດ ຫຼື ຂາ​ຫັກ ແຂນ​ຂາດ ​ກໍ່​ມີອຸ­ບັດ​ຕິ​ເຫດ​ສ່ວນ​ໜຶ່ງ​ທີ່​ເກີດ​ມາ​ຈາກ​ອາ­ການ​ດື່ມເຫຼົ້າ​ເມົາ​ສຸ­ລາ​ແລ້ວ​ຂັບ​ລົດ​ ປາ­ກົດ​ມີ​ໃຫ້​ເຫັນ ປະເພດ​ຕໍ່​ມາກໍ່​ແມ່ນ​ພວກ​ຂັບ​ຂີ່​ຂາດ​ຄວາມ​ຮູ້​ເລື່ອງກົດ​ຈະ­ລາ­ຈອນ ແລ້ວ​ເຜີ​ສະ­ຕິ ເຊັ່ນ: ລົມ​ໂທລະ­ສັບເວ­ລາ​ຂັບ​ຂີ່ ຫຼື ສາ­ມາດ​ເວົ້າ​ໄດ້​ວ່າປະ­ເພດ​ນີ້​ໂລກສວຍ ບໍ່​ແຄ​ກັບ​ສັງ­ຄົມ ຫຼື ຄົນ​ຂັບ​ຂີ່​ຮ່ວມ​ຖະ­ໜົນ ຂໍໃຫ້​ຕົນ​ໄດ້​ເຮັດ​ແນວ​ພໍ­ໃຈ ໂດຍ​ບໍ່​ສົນ​ວ່າ​ພຶດ­ຕິ​ກຳ​ດັ່ງກ່າວ ​ມັນ​ຖືກ­ຕ້ອງ​ເໝາະ​ສົມ​ພຽງ​ໃດ.

   ຜູ້​ຂຽນ​ໄດ້​ອ່ານ­ໜັງ­ສື​ພິມ​ປະ­ຊາ­ຊົນ ລົງ​ວັນ​ທີ 18/7/2018 ທີ່​ເວົ້າ​ເຖິງ​ອຸ­ບັດ​ຕິ​ເຫດ​ເກີດ​ຂຶ້ນ​ຢູ່​ນະ­ຄອນຫຼວງ​ວຽງ​ຈັນ 6 ເດືອນ​ຕົ້ນ​ປີ ມີ​ເຖິງ 600 ກວ່າລາຍ ແລະ ມີ​ຜູ້​ເສຍ​ຊີ­ວິດ 106 ຄົນ ຂ່າວ​ບອກ​ວ່າ ສາ­ເຫດ​ສ່ວນ​ໃຫຍ່​ກໍ່​ແມ່ນ​ຜູ້​ຂັບ​ຂີ່​ບໍ່​ປະ­ຕິ­ບັດ​ຕາມກົດ​ຈະ­ລາ­ຈອນ ດື່ມ​ສິ່ງ​ມຶນ­ເມົາ​ແລ້ວ​ຂັບ​ລົດ ລົດຂາດ​ເຕັກ­ນິກ ພວກ​ເຮົາ​ລອງ​ຄິດ​ເບິ່ງ​ວ່າ ບັນ­ດາຮ້ານ​ບັນ­ເທີງ​ຍາມ​ຄ່ຳ​ຄືນ​ມີ​ຫຼາຍ​ໜ້ອຍ​ພຽງ​ໃດ ແລະ ມີ​ຈຳ­ນວນ​ໄວ​ລຸ້ນ​ເຂົ້າ​ໄປ​ຫຼິ້ນ​ທ່ຽວ​ຫຼາຍ​ປານໃດ ສະ­ຖານ­ທີ່​ດັ່ງ­ກ່າວ ​ເມື່ອ​ເຂົ້າ​ໄປ​ແລ້ວ​ກໍ່​ມີ​ແຕ່ການ​ໂດດ​ເຕັ້ນ ກິນ​ດື່ມ​ຕາມ​ພາ­ສາ​ໄວ​ລຸ້ນ ເຖິງ​ເວລາ​ເລີກ​ບໍ່​ມຶນ​ກໍ່​ເມົາ ຖ້າ­ວ່າ​ດື່ມ​ເຫຼົ້າ​ຫຼາຍ ເຊິ່ງ​ສົ່ງຜົນ​ເຖິງ​ການ​ຂັບ​ຂີ່ ບາງ​ຄົນ​ເລີກ​ບ່ອນ​ນີ້​ກໍ່​ໄປ​ຕໍ່​ບ່ອນອື່ນ ດື່ມ​ເຫຼົ້າ​ຕໍ່​ສອງ​ຍົກ​ສາມ​ຍົກ ນີ້​ແຫຼະ​ທີ່​ມາ​ຂອງອາ­ການ​ມຶນ­ເມົາ ບວກ​ກັບ​ສະ­ພາບ​ຈິດ­ໃຈ​ຂອງ​ໄວລຸ້ນ ຮູ້​ເທົ່າ​ບໍ່​ເຖິງ​ການ... ຖ້າ​ໄປ​ຟັງ​ພວກ​ແພດ​ໝໍ ເພິ່ນ​ຈົ່ມ​ສູ່​ຟັງ​ຈະ​ຮູ້​ວ່າ ຜູ້​ບາດ­ເຈັບ​ຈາກ​ອຸ­ປະ­ຕິ­ເຫດ ແລ້ວ​ເຂົ້າ​ໄປ​ປິ່ນ­ປົວ​ສ່ວນ​ໜຶ່ງ​ກໍ​ແມ່ນ​ກະ­ທົບ​ຫົວ ເຊິ່ງ​ເຮັດ​ໃຫ້​ຜູ້­ກ່ຽວ​ສູນ​ເສຍ​ຊັບ​ໃນ​ການ​ຮັກ­ສາ​ປິ່ນປົວ ແລະ ເປີ­ເຊັນ​ກັບ​ມາ​ດີ​ຄື​ຄົນ​ປົກ­ກະ­ຕິ​ກໍ່​ມີ​ໜ້ອຍ.

   ພວກ​ເຮົາ​ຮູ້​ແລ້ວ​ວ່າ ສາ­ເຫດ​ໃຫຍ່​ຂອງ​ອຸ­ບັດ​ຕິເຫດ​ແມ່ນ​ມາ​ຈາກ​ການ​ດື່ມ​ສິ່ງ​ມຶນ­ເມົາ ບໍ່​ເຄົາ­ລົບກົດ​ຈະ­ລາ­ຈອນ ລົດ​ພາ­ຫະ­ນະ​ຂາດ​ເຕັກ­ນິກ... ສິ່ງໜຶ່ງ​ທີ່​ສຳ­ຄັນ ນອກ­ຈາກ​ການ​ປຸກ­ລະ­ດົມ​ໂຄ­ສະ­ນາໃນ​ສະ​ຖາ​ບັນ​ຕ່າງໆ​ແລ້ວ ກໍ່​ແມ່ນ​ພໍ່​ແມ່​ຜູ້​ປົກ­ຄອງ ບໍ່​ຄວນ​ຕາມ­ໃຈ​ລູກ​ຫຼານ ແລະ ຖື​ເບົາ ຫຼື ອາດ​ຈະເຂົ້າ​ກໍ­ລະ­ນີ ເຫັນ​ໂລງ​ສົບ​ຈຶ່ງ​ຫຼັ່ງ​ນ້ຳ​ຕາ​ກໍ່​ມີ.

   ດັ່ງ­ນັ້ນ ພໍ່​ແມ່​ຜູ້​ປົກ­ຄອງ​ຄວນ​ເອົາ­ໃຈ­ໃສ່​ຕັກເຕືອນ​ລູກ​ຫຼານ​ຕື່ມ ໃນ​ການ​ສັນ­ຈອນ​ຂັບ​ຂີ່​ລົດ​ໄປມາ​ຕາມ​ຖະ­ໜົນ ແລະ ບໍ່​ຄວນ​ກິນ​ດື່ມ​ມຶນ­ເມົາ ຈຳ­ນວນ​ໜຶ່ງ​ພໍ່​ແມ່​ຢູ່​ຕ່າງ​ແຂວງ ກໍ່​ມີ​ອິດ­ສະ­ຫຼະ​ຫຼິ້ນທ່ຽວ ບາດ​ເກີດ​ອຸ­ບັດ​ຕິ​ເຫດ​ມາ​ກໍ່​ຫຍຸ້ງ­ຍາກ​ພໍ່​ແມ່ ແລະ ເຈົ້າ​ໜ້າ­ທີ່​ຈະ­ລາ­ຈອນ ການ​ປຸກ­ລະ­ດົມ​ໂຄສະ​ນາ​ລະ­ບຽບ​ຈະ­ລາ­ຈອນ​ຕາມ​ໂຮງ­ຮຽນ ແລະ ບ້ານ ສະ​ຖາ​ບັນ ສຳ­ນັກ­ງານ ອົງ­ການ ໃຫ້​ພຽງ­ພໍ ຄິດ​ວ່າ​ກໍ່​ແມ່ນ​ວິ­ທີ​ໜຶ່ງ​ຊ່ວຍ​ຫຼຸດ­ຜ່ອນ​ອຸ­ບັດ​ຕິ​ເຫດລົງ​ໄດ້.

ຂ່າວທີ່ກ່ຽວຂ້ອງ