ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 15/08/2018

169 15 ສ.ຫ. 2018 ຫົວຂໍ້ຂ່າວອື່ນໆ

    ມື້ນີ້ມີ​ບົດຮຽນ​ກ່ຽວ​ກັບ​ການ​ກຳນົດ​ເກນ​ອາຍຸ​ບຳນານ​ຢູ່ ຣັດ​ເຊຍ ເລື່ອງ​ການ​ແຍກ​ປະເພດ​ຂີ້​ເຫຍື້ອ​ຢູ່ ມາ​ເລ​ເຊຍ ແລະ ເລື່ອງ​ຜູ້​ໃຫຍ່​ໃນ​ຍີ່ປຸ່ນ​ຖືກຕ້ອງ​ຕິ​ຍ້ອນ​ປະພຶດ​ຕົນ​ບໍ່​ເໝາະ​ສົມ ເວລາ​ລົງໄປ​ຕິດ​ຄວາມສຸກ-ທຸກຂອງ​ປະຊາ​ຊົນ​ຢູ່​ທ້ອງຖິ່ນ.

   ທີ່ ຣັດ​ເຊຍ: ຂ່າວ​ຕ່າງ​ປະເທດ​ຫວ່າງ​ບໍ່​ດົນ​ມາ​ນີ້​ໄດ້​ໃຫ້​ຮູ້ວ່າ: ສະພາດູ​ມາ (ສະພາ​ຕ່ຳ) ຂອງ​ຣັດ​ເຊຍ ໄດ້​ຮັບຮອງ​ເອົາແຜນການ​ປັບປຸງ​ກ່ຽວ​ກັບ​ອາຍຸບຳນານ​ຂອງ​ຜູ້​ອອກແຮງ​ງານ ຈາກ​ໄວ​ບຳນານ​ໃນ​ເມື່ອ​ກ່ອນ​ທີ່​ກຳນົດ 60 ປີ ສຳລັບ​ຜູ້​ຊາຍ ແລະ 55 ປີ ສຳລັບ​ຜູ້ຍິງ ມາ​ເປັນ 65 ປີ ສຳລັບ​ຜູ້​ຊາຍ ແລະ 63 ປີ ສຳລັບ​ຜູ້ຍິງ​ໄວ​ບຳນານ​ເກົ່າ​ນັ້ນ ໄດ້​ປະຕິບັດ​ມາ​ແຕ່​ຍຸກ​ສະຫະພາບ​ໂຊ​ວຽດ ເຊິ່ງ​ມາ​ຮອດ​ປັດຈຸບັນ​ເຫັນ​ວ່າບໍ່​ເໝາະ​ສົມ ​ຍ້ອນ​ວ່າອາຍຸ​ສະເລ່ຍ​ຂອງ​ຄົນ​ຣັດ​ເຊຍ​ໄດ້​ເພີ່ມ​ຂຶ້ນ ແນວໃດ​ກໍ່​ດີ ແຜນ​ປັບ​ຂຶ້ນ​ອາຍຸ​ບຳນານ​ນີ້ ໄດ້​ປະ​ເຊີນ​ກັບ​ກະແສ​ຕ້ານ​ຄືນຈາກ​ຊາວ​ຜູ້​ອອກແຮງ​ງານ​ກວ່າ 80% ໃນ​ນັ້ນມີ 3,8 ລ້ານ​ຄົນ ໄດ້​ລົງ​ລາຍ​ເຊັນ​ຄັດຄ້ານ ພວກ​ຄັດຄ້ານ​ເຫັນ​ວ່າ ທຽບ​ກັບ​ມາດຕະຖານ​ບັນຫາ​ປະເທດ​ທີ່​ພັດທະ​ນາ​ແລ້ວ ອາຍຸ​ສະເລ່ຍ​ຂອງ​ຄົນ​ຣັດ​ເຊຍ​ໃນ​ປັດຈຸບັນ​ຍັງ​ຕ່ຳ ຄື: 65 ປີ ສຳລັບ​ຜູ້​ຊາຍ ແລະ 73 ປີ ສຳລັບ​ແມ່ຍິງ ເມື່ອ​ເປັນ​ແນວ​ນີ້ ຄົນ​ຣັດ​ເຊຍ​ຫຼາຍ​ຄົນ​ອາດ​ຈະ​ບໍ່ມີ​ອາຍຸ​ຍືນ​ຮອດ ມື້​ໄດ້​ກິນ​ເບ້ຍ​ບຳນານ ແນວໃດ​ກໍ່​ດີ ທ່ານ ມັກ​ຊິມ ​ໂຕ​ປີ​ລິນ ລັດຖະມົນຕີ​ແຮງ​ງານ​ຣັດ​ເຊຍ ໄດ້​ອອກ​ມາ​ປົກ​ປ້ອງ​ແຜນການ​ປັບ​ຂຶ້ນ​ອາຍຸ​ບຳນານ​ແບບ​ຫົວ​ຂາດ​ຄາ ໂດຍ​ອ້າງ​ວ່າ ໃນ​ປັດຈຸ​ບັນ ​ສະພາບ​ເສດຖະກິດ​ຂອງ​ປະເທດ ພວມ​ປະ​ເຊີນ​ກັບ​ການ​ຜັນແປ​ຢ່າງ​ໃຫຍ່​ຫຼວງ​ທຽບ​ກັບ​ຊຸມປີ 1930 ຂອງ​ສະຕະວັດທີ 20 ແລະ ດຽວນີ້​ຄົນ​ຣັດ​ເຊຍ ມີ​ອາຍຸ​ຍືນ​ກວ່າ​ເກົ່າ ດັ່ງນັ້ນ ຈຶ່ງ​ຈຳເປັນ​ຕ້ອງ​ປັບ​ຂຶ້ນ​ອາຍຸ​ບຳນານ​ໃຫ້ເໝາະ​ສົມ.

   ທີ່ ມາ​ເລ​ເຊຍ: ການ​ເກັບ​ມ້ຽນຂີ້ເຫຍື່ອ​ຢູ່​ມາ​ເລ​ເຊຍ​ນັ້ນ ດຳເນີນ​ໄປ​ພາຍ​ໃຕ້​ກົດ​ລະບຽບ​ທີ່​ຮັບຮອງ​ເອົາ​ໃນ​ປີ 2007 ວ່າ​ດ້ວຍ​ການ​ຄຸ້ມ​ຄອງ​ວຽກ​ອະນາໄມ ແລະ ການ​ກຳຈັດ​ຂີ້​ເຫຍື້ອ ກົດ​ລະບຽບ​ນີ້ ໄດ້​ຮັບ​ການ​ປະຕິບັດ​ແບບ​ບັງຄັບ​ໃນ​ນະຄອນຫຼວງ ກົວ​ລາ​ລຳ​ເປີ ເມືອງ​ປູ​ຕຼາ​ຈາ​ຢາ ມາ​ລັກ​ກາ ແປກ​ລິດ ເນ​ກຼີ​ເຊັມ ບີ​ລານ ປາ​ຮັງ ເກ​ດາ ແລະ ໂຈ​ຮໍ ເພື່ອ​ຮັບປະກັນ​ປະ​ສິດທິ​ຜົນ ໃນ​ການ​ປະຕິບັດ​ກົດລະບຽບ​ດັ່ງກ່າວ ທາງ​ການ​ນະຄອນ​ຫຼວງ​ກົວ​ລາ​ລຳ​ເປີ ແລະ ປຼູ​ຕຼາ​ຈາ​ຢາ ໄດ້​ກຳນົດ​ໂທດ​ປັບ​ໃໝຜູ້​ທີ່​ບໍ່​ແຍກ​ປະເພດ​ຂີ້​ເຫຍື້ອ ເຊິ່ງ​ເລີ່ມ​ປະຕິບັດນັບ​ແຕ່​ວັນ​ທີ 1 ເດືອນ​ມິຖຸນາ ປີ 2016 ເປັນຕົ້ນ​ມາ ກ່ອນ​ໜ້າ​ຈະ​ມີ​ການ​ປັບໄໝ​ຕົວ​ຈິງ ທາງ​ການ​ມາ​ເລ​ເຊຍ ໄດ້​ດຳເນີນ​ຂະ​ບວນ​ການ​ປຸກລະດົມ​ບັນດາ​ຄົວ​ເຮືອນ​ໃຫ້​ຕື່ນ​ຕົວ ແລະ ເຂົ້າໃຈ​ກ່ຽວ​ກັບ​ບັນຫາ​ການ​ແຍກປະເພດ​ຂີ້​ເຫຍື້ອ ໃນ​ເດືອນ​ກັນຍາ ປີ 2015 ກົດ​ລະບຽບ​ໄດ້​ກຳນົດ​ໂທດ​ປັບໄໝ​ສຳລັບ​ຄົວ​ເຮືອນ​ທີ່ລະເມີດ​ໄວ້​ດັ່ງນີ້: ຄົວ​ເຮືອນ​ທີ່​ລະເມີດ (ບໍ່​ແຍກ​ປະເພດ​ຂີ້​ເຫຍື້ອ) ຄັ້ງ​ທຳ​ອິດ ຈະ​ຕ້ອງ​ເສຍ​ຄ່າ​ປັບໃໝ ເປັນ​ເງິນ 50 ຣິງ​ກິດ ເທື່ອ​ທີ​ສອງ​ຈະ​ເພີ່ມ​ຂຶ້ນ​ເປັນ 100 ຣິງ​ກິດ ເທື່ອ​ທີ​ສາມ 500 ຣິງ​ກິດ ເທື່ອ​ຕໍ່​ໄປ 1.000 ຣິງ​ກິດ ແລະ ເພີ່ມ​ຂຶ້ນ​ຕາມ​ລຳດັບ ແລະ ຈະ​ຖືກຟ້ອງ​ຂຶ້ນ​ສານ ການ​ແຍກ​ປະເພດ​ຂີ້​ເຫຍື້ອ​ນັ້ນ ນອກຈາກ​ຈະ​ຊ່ວຍ​ໃຫ້ການ​ເກັບ​ມ້ຽນຖ່າຍ​ເທ​ສະດວກ​ຂຶ້ນ​ແລ້ວ ຍັງ​ສາມາດ​ໃຊ້​ກຳ​ມະ​ວິທີ​ນຳ​ຂີ້​ເຫຍື້ອ​ຫຼາຍ​ປະເພດ​ມາ​ໃຊ້​ຄືນໃໝ່​ໄດ້ (ແຫຼ່ງ​ຂ່າວ​ຈາກ The Nation 29/6/2016).

   ທີ່ ຍີ່ປຸ່ນ: ມີ​ຂ່າວ​ທີ່​ເກີດ​ຂຶ້ນ​ຢູ່​ຍີ່ປຸ່ນ ແຕ່ 2 ປີຜ່ານມາ ແຕ່​ຄວນ​ເບິ່ງ​ໄວ້​ເພື່ອ​ເປັນ​ບົດຮຽນ ໂດຍ​ສະເພາະແມ່ນ​ສຳລັບ​ພະນັກ​ງານ​ຂັ້ນ​ຕ່າງໆ​ເວລາ​ລົງ​ໄປ ພື້ນຖານ​ເພື່ອ​ຕິດຕາມ​ສະພາບການ ຊີວິດ​ການ​ເປັນ​ຢູ່​ຂອງ​ປະຊາ​ຊົນທີ່​ປະສົບ​ກັບ​ບັນຫາ​ສຸກ​ເສີນ​ຕ່າງໆ ເຊັ່ນ: ໄພ​ທຳ​ມະຊາດ ເປັນຕົ້ນ ເລື່ອງ​ມີ​ຢູ່​ວ່າ ຮອງ​ລັດຖະມົນຕີ​ກະຊວງ​ກໍ່ສ້າງ​ຂອງຍີ່ປຸ່ນ ໄດ້​ລົງ​ໄປ​ຕິດຕາມ​ຊີວິດ​ການ​ເປັນ​ຢູ່​ຂອງ​ປະຊາຊົນໃນ​ເມືອງ ອິ​ວາ​ອິ​ຊູ​ມິ ທີ່​ຖືກ​ພາຍຸ​ທຳລາຍ​ໃນ​ຕົ້ນ​ເດືອນ​ກັນຍາ ປີ 2016 ເຮັດ​ໃຫ້​ມີ​ຜູ້​ເສຍ​ຊີວິດ 20 ຄົນ ເວລາ​ລົງ​ຢ້ຽມຢາມ​ປະຊາ​ຊົນ​ນັ້ນ ທ່ານ​ຮອງ​ລັດ​ຖະ​ມົນຕີ ຕ້ອງ​ໄດ້​ຕະ​ລຸຍ​ບວກ​ນ້ຳ ແລະ ຕົມແຕ່​ທ່ານ​ພັດ​ລືມ​ເກີບ​ໂບກ ດັ່ງນັ້ນ ມີ​ຕອນ​ໜຶ່ງ​ທ່ານ​ໄດ້​ໃຫ້​ພະນັກງານ​ຕິດຕາມ​ເຈ່ຍ​ທ່ານ​ຂ້າມ​ບວກ​ຕົມ ແລະ ຮູບ​ພາບ​ຕອນ​ນີ້ ໄດ້​ແຜ່​ກະຈາຍ​ຜ່ານ​ສື່​ສັງຄົມ​ອອນ​ລາຍ ເຮັດ​ໃຫ້​ມີ​ສຽງ​ວິພາກ​ວິຈານວ່າ ​ທ່ານ​ຮອງ​ລັດຖະມົນຕີ​ບໍ່​ຈິງ​ຈັງ​ກັບ​ຄວາມ​ຮັບຜິດຊອບ ບໍ່​ສົມ​ກັບ​ວ່າລົງ​ໄປ​ເບິ່ງສຸກ-ທຸກຂອງ​ປະຊາຊົນ ຂ່າວ​ບອກ​ວ່າ ທາງ​ກະຊວງ​ກ່ຽວຂ້ອງ​ເອງ ​ກໍ່​ໄດ້​ຕຳ​ນິ​ທ່ານ​ຮອງ​ລັດຖະມົນຕີ​ຢ່າງ​ໜັກ.

ຂ່າວທີ່ກ່ຽວຂ້ອງ