ຂ່າວຫຼ້າສຸດ

ລາວ ກຽມສົ່ງນັກກີລາຮ່ວມແຂ່ງຂັນກີລາຍິງປືນ ຊີງຂັນນານາຊາດ

143 15 ສ.ຫ. 2018 ວົງຈອນກີລາ
ລາວ ກຽມສົ່ງນັກກີລາຮ່ວມແຂ່ງຂັນກີລາຍິງປືນ ຊີງຂັນນານາຊາດ

    ຕາມ​ການ​ລາຍ​ງານ​ຂອງ​ທ່ານ ພຸດ​ທະ​ສັກ ສຸກ​ອາ​ລຸນ ປະ­ທານ​ສະ­ໂມ­ສອນ​ຍິງ​ປືນ​ໄອ​ພີ​ເອັດ​ຊີ​ລາວ ຜູ້­ອຳ­ນວຍ­ການ​ສະ­ໜາມ​ເຝິກ­ຊ້ອມ​ຍິງ​ປືນ 5 ເມສາ ໃຫ້​ຮູ້­ເມື່ອ​ບໍ່​ດົນ​ມາ​ນີ້​ວ່າ: ພາຍ­ຫຼັງ​ໄດ້​ມີ​ການ­ເຄື່ອນ­ໄຫວ​ທົດ​ສອບ​ຄວາມ​ສາ­ມາດ​ຂອງ​ນັກກີ­ລາ​ ຈຳ­ນວນ 30 ກວ່າ​ຄົນ ໃນໄລ­ຍະ​ຜ່ານ​ມາ ຢູ່​ສະ­ໜາມ​ເຝິກຊ້ອມ​ຍິງ​ປືນ 5 ເມ­ສາ ເມືອງ​ໄຊ​ເຊດ​ຖາ ນະ­ຄອນ­ຫຼວງ​ວຽງ​ຈັນ ເພື່ອ​ກຽມ​ເຂົ້າ​ຮ່ວມ​ການ​ແຂ່ງ­ຂັນ​ກີ­ລາ​ຍິງ​ປືນ​ຊີງ​ຂັນ​ນາໆຊາດ (ໄອ​ພີ​ເອັດ​ຊີ ເລ​ໂວ 4) ຢູ່​ແຂວງ​ພັດ​ທະ​ຍາ ປະ­ເທດ​ໄທ ໃນ​ກາງ​ເດືອນ​ກັນ­ຍາ 2018 ມາ​ຮອດ​ປັດ­ຈຸ­ບັນ ສາ­ມາດ​ຄັດ​ເລືອກ​ນັກກີ­ລາ​ໄອ​ພີ​ເອັດ​ຊີ​ລາວ 9 ຄົນ ຍິງ 1 ຄົນ ເປັນ​ທີ່​ຮຽບ​ຮ້ອຍ​ແລ້ວ.

    ປັດ­ຈຸ­ບັນ​ ນັກ­ກີ­ລາ​ແຕ່­ລະ­ຄົນ​ໄດ້​ເຝິກ­ຊ້ອມ​ຄວາມ​ຄ່ອງ​ແຄ້ວ​ໃນ​ການ​ເໜັງ​ຕົວ ແລະ ຈັບ​ອຸ­ປະກອນ​ປືນ​ໃຫ້​ຊຳ­ນິ​ຊຳ­ນານ ໂດຍ​ມີ​ຜູ້​ຊ່ຽວ­ຊານ​ກີ­ລາ​ຍິງ​ປືນ​ໄອ​ພີ​ເອັດ​ຊີ ຈາກ​ປະ­ເທດ​ເພື່ອນ​ບ້ານ ທີ່​ເຄີຍສ້າງ​ຜົນ­ງານ​ໃນ​ເວ­ທີ​ສາກົນ ເປັນ​ຜູ້​ຖ່າຍ​ທອດ​ປະ­ສົບ​ການໃຫ້ ແລະ ນຳ​ເອົາ​ບົດ­ຮຽນ​ທີ່​ເຄີຍ​ເຂົ້າ​ຮ່ວມ​ການ​ແຂ່ງ­ຂັນ​ຍິງ​ປືນ ເລ​ໂວ 3 ທີ່​ຜ່ານ​ມາ ມາ​ຖອດ​ຖອນ​ບົດ­ຮຽນ​ສ້າງ​ຄວາມ​ຮູ້-ຄວາມ​ສາ­ມາດ​ໃຫ້​ນັກ­ກີ­ລາ ເພື່ອ​ກຽມ​ຄວາມ​ພ້ອມ​ເຂົ້າ​ຮ່ວມຍາດ​ເອົາ​ຜົນ­ງານ​ໃນ​ການ​ແຂ່ງຂັນ​ຄັ້ງ​ນີ້.

    ສຳ­ລັບ​ລາຍ­ການ​ດັ່ງ­ກ່າວ ຄາດ​ວ່າ​ຈະ​ມີ​ນັກ­ກີ­ລາ​ຈາກ​ທົ່ວໂລກ​ເຂົ້າ​ຮ່ວມ ເຊິ່ງ​ການ​ແຂ່ງຂັນ​ຍິງ​ປືນ​ລາຍ­ການ ເລ​ໂວ 4 ຈະ​ມີ​ການ​ແຂ່ງ­ຂັນ​ປືນ​ຫຼາຍ​ລາຍ­ການ ເປັນ­ຕົ້ນ ປະ­ເພດ​ປືນ ຣີ ໂວນ​ໂວ ປືນ​ໂອ​ເພັນ ປືນ​ສະແຕນ​ດາດ ປືນ​ຄາດ​ຊິກ ພີ​ດີ​ຊີ ອ໋ອບ​ຊັນ ແລະ ໂປ​ດັກ​ຊັນ.

ຂ່າວທີ່ກ່ຽວຂ້ອງ