ຂ່າວຫຼ້າສຸດ

ຂ່າວ​ສັ້ນ

118 15 ສ.ຫ. 2018 ຂ່າວຕ່າງປະເທດ
ຂ່າວ​ສັ້ນ

    ມຽນ​ມາ: ເຫດການ​ໄຟ​ໄໝ້​ລາຍ​ໜຶ່ງ ໄດ້​ເກີດ​ຂຶ້ນ​ເມື່ອ​ວັນ​ທີ 13 ສິງຫາ​ນີ້ ຢູ່​ທີ່​ໂຮງໝໍ​ແຫ່ງ​ໜຶ່ງ ໃນ​ນະຄອນ​ຢາງ​ກຸງ ຂອງ​ມຽນ​ມາ ເຮັດ​ໃຫ້​ຖັນ​ແຖວ​ພະນັກງານ​ຢູ່​ໃນ​ໂຮງໝໍ​ນີ້ ຕ້ອງ​ໄດ້​ອົບ​ພະ​ຍົບ​ຄົນ ເຈັບ​ທີ່​ພວມ​ປິ່ນປົວ​ພະຍາດ​ອອກ​ໄປ​ທັງ​ໝົດ. ໃນ​ເວລາ​ທີ່​ລາຍ​ງານ​ຂ່າວ​ນັ້ນ ແມ່ນ​ຍັງ​ບໍ່​ມີ​ຂໍ້​ມູນ​ກ່ຽວ​ກັບ ຈຳນວນ​ຜູ້​ບາດເຈັບ ຫຼື​ເສຍ​ຊີວິດ ແຕ່​ກອງ​ກຳລັງ​ກູ້​ໄພ​ໃຫ້​ຮູ້​ວ່າ ໄດ້​ອົບ​ພະ​ຍົບ​ຄົນ​ເຈັບ​ອອກ​ໄປ​ປະມານ 60 ຄົນ.

    ປາ​ກິດ​ສະຖານ: ກຳມະກອນ​ຂຸດ​ຄົ້ນ​ບໍ່​ແຮ່ ເສຍ​ຊີວິດ​ຢ່າງ​ໜ້ອຍ 8 ຄົນ ຈາກ​ເຫດການ​ລະເບີດ ທີ່​ເກີດ​ຂຶ້ນ​ຢູ່​ໃນ​ບໍ່​ຖ່ານ​ຫີນ​ແຫ່ງ​ໜຶ່ງ ຊຶ່ງ​ເກີດ​ຂຶ້ນ​ເມື່ອ​ວັນ​ທີ 13 ສິງຫາ​ນີ້ ທີ່​ບໍລິເວນ​ຊານເມືອງ​ນະຄອນ ເກດ​ຕາ ໃນ​ແຂວງ ບາ​ໂລ​ຈິ​​ສ​ຖານ (ທິດຕາເວັນຕົກ​ສ່ຽງ​ໃຕ້​ປາ​ກິດ​ສະຖານ). ເຈົ້າ​ໜ້າທີ່​ໃນ​ທ້ອງຖິ່ນ ໃຫ້​ຮູ້​ວ່າ ບໍ່​ຖ່ານ​ຫີນ​ດັ່ງກ່າວ ພັງ​ຖະ​ຫຼົ່ມ​ລົງ​ຫຼັງ​ຈາກ​ທີ່​ກຳມະກອນ​ຈຸດ​ສະ​ນວນ​ລະເບີດ ຢູ່​ໃນ​ຂະ​ບວນ ການ​ຂຸດ​ຄົ້ນ​ຖ່ານ​ຫີນ. ໃນ​ເວລາ​ທີ່​ເກີດ​ເຫດ​ລະເບີດ​ຂຶ້ນ​ນັ້ນ ມີ​ກຳມະກອນ​ປະມານ 22 ຄົນ ເຮັດ​ວຽກ ຢູ່​ໃນ​ອຸ​ໂມງ​ຂອງ​ບໍ່​ຖ່ານ​ຫີນ ໃນ​ນັ້ນ​ມີ​ກຳມະກອນ​ຈຳນວນ​ໜຶ່ງ ຢູ່​ໃນ​ລະດັບ​ເລິກ​ກວ່າ 1.200 ແມັດ.

    ອາ​ຟະ​ກາ​ນິດ​ສະຖານ: ໂທລະພາບ​ຊ່ອງ Tolonews ຢູ່​ໃນ​ທ້ອງຖິ່ນ​ໃນ​ອາ​ຟະ​ກິດ​ສະຖານ ລາຍ​ງານ​ເມື່ອ​ວັນ​ທີ 13 ສິງຫາ​ນີ້​ວ່າ ຕະຫຼອດ 2 ວັນ​ທີ່​ຜ່ານ​ມາ ສະມາຊິກ​ຂອງ​ກອງ​ກຳລັງ ປະຕິບັດ​ງານ​ພິເສດ​ຂອງ​ອາ​ຟະ​ກາ​ນິດ​ສະຖານ ຈຳນວນ​ປະມານ  100 ຄົນ ຍັງ​ຄົງ​ຫາຍ​ສາບ​ສູນ ຢູ່​ໃນ​ແຂວງ ກາ​​ສ​ນີ (ພາກ​ຕາເວັນ​ອອກ​ອາ​ຟະ​ກາ​ນິດ​ສະຖານ). ໃນ​ຂະນະ​ດຽວ​ກັນ ເຈົ້າ​ໜ້າທີ່ ດ້ານ​ຮັກສາ​ຄວາມ​ສະຫງົບ​ຂອງ​ອາ​ຟະ​ກາ​ນິດ​ສະຖານ ເວົ້າ​ວ່າ  ນັບ​ແຕ່​ເກີດ​ການ​ຍິງ​ຕໍ່ສູ້​ມາ​ເປັນ ເວລາ​ຫຼາຍ​ວັນ ກໍ​ມີ​ທະຫານ ແລະ​ຕຳຫຼວດ​ເສຍ​ຊີວິດ​ໄປ​ປະມານ 100 ຄົນ ແລະ​ບາດເຈັບ​ອີກ​ຫຼາຍ​ຄົນ ໃນ​ຂະນະ​ທີ່​ກຸ່ມ​ມື​ປືນ​ຕາ​ລີ​ບັນ ໄດ້​ຖືກ​ສັງຫານ​ຊີວິດ​ໄປ​ປະມານ 50 ຄົນ ຈາກ​ການ​ປະຕິບັດ​ການ ໂຈມ​ຕີ​ທາງ​ອາກາດ ໃນ​ວັນ​ທີ 12 ສິງຫາ. ໃນ​ຂະນະ​ດຽວ​ກັນ ກະຊວງ​ພາຍ​ໃນ ຂອງ​ອາ​ຟະ​ກາ​ນິດ​ສະຖານ ໃຫ້​ຮູ້​ວ່າ ມີ​ສາມັນ​ຊົນ​ເສຍ​ຊີວິດ​ຢ່າງ​ໜ້ອຍ 15 ຄົນ ແລະ ບາດເຈັບ​ກວ່າ 400 ຄົນ ຈາກ​ການ​ຍິງ​ຕໍ່ສູ້​ໃນ​ຫຼາຍ​ວັນ​ທີ່​ຜ່ານ​ມາ.

    ຣັດ​ເຊຍ: ອົງການ​ສື່​ມວນ​ຊົນ​ໃນ​ເຂດ​ຕາເວັນ​ອອກ​ໄກ​ຂອງ​ຣັດ​ເຊຍ ລາຍ​ງານ​ເມື່ອ​ວັນ​ທີ 13 ສິງຫາ​ນີ້​ວ່າ ພົນທະຫານ​ຂອງ​ທະຫານ​ເຂດ​ພາກ​ຕາເວັນ​ອອກ​ຂອງ​ຣັດ​ເຊຍ ຈຳນວນ 3.000 ກວ່າ​ຄົນ ໄດ້​ເຂົ້າ​ຮ່ວມ​ການ​ຝຶກ​ຊ້ອມ​ຍຸດທະວິທີ​ຢູ່​ໃນ ຊາ​ຄາ​ລິນ ໃນ​ເຂດ​ຕາເວັນ​ອອກ​ໄກ​ຂອງ​ຣັດ​ເຊຍ. ເຂົ້າ​ຮ່ວມ ໃນ​ການ​ຝຶກ​ຊ້ອມ​ນີ້ ມີ​ບັນດາ​ກົມ​ກອງ​ປືນ​ເຫຼັກ​ຍາວ ແລະ ກຸ່ມ​ທະຫານ​ອາກາດ​ຂອງ​ທະຫານ ເຂດ​ພາກ​ຕາເວັນ​ອອກ ຕະຫຼອດ​ຮອດ​ກອງ​ກຳລັງ​ປືນ​ໃຫຍ່ ແລະ ຝູງ​ເຮືອບິນ​ແບບ​ບໍ່​ມີ​ຄົນ​ຂັບ (UAV).  UAV ມີໜ້າ​ທີ່​ກຳນົດ​ເບິ່ງ​ທີ່​ຕັ້ງ​ຂອງ​ສັດຕູ​ທີ່​ສົມ​ໝຸດ​ໄວ້ ແລະ ສົ່ງ​ຂໍ້​ມູນ​ໄປ​ໃຫ້​ກອງ​ກຳລັງ​ປືນ​ໃຫຍ່ ເພື່ອ​ທຳລາຍ​ເປົ້າ​ໝາຍ.

 

ຂ່າວທີ່ກ່ຽວຂ້ອງ