ຂ່າວຫຼ້າສຸດ

ກະສິກອນ​ອາ​ຟະ​ກາ​ນິດ​ສະຖານ ປະ​ເຊີນ​ກັບ​ສະພາບ​ແຫ້ງແລ້ງ​ຢ່າງ​ຮ້າຍ​ແຮງ

85 15 ສ.ຫ. 2018 ຂ່າວຕ່າງປະເທດ
ກະສິກອນ​ອາ​ຟະ​ກາ​ນິດ​ສະຖານ ປະ​ເຊີນ​ກັບ​ສະພາບ​ແຫ້ງແລ້ງ​ຢ່າງ​ຮ້າຍ​ແຮງ

     ໄພ​ແຫ້ງແລ້ງ​ທີ່​ຮ້າຍ​ແຮງ​ທີ່​ສຸດ​ໃນ​ຮອບ​ຫຼາຍ​ສິບ​ປີ ພວມ​ເກີດ​ຜົນ​ກະທົບ​ຢ່າງ​ໜັກໜ່ວງ ຕໍ່​ການ​ຜະລິດ​ທາງ​ດ້ານ​ກະສິກຳ ຊຶ່ງ​ເປັນ​ຂະແໜງການ​ກະດູກ​ສັນຫຼັງ​ຂອງ​ພື້ນຖານ​ເສດຖະກິດ​ອາ​ຟະ​ກາ​ນິດ​ສະຖານ ແລະ​ເຮັດ​ໃຫ້​ປະເທດ​ນີ້​ຕົກ​ຢູ່​ໃນ​ສະພາບ “ຂາດ​ຄວາມ​ໝັ້ນ​ຄົງ​​​ທາງ​ດ້ານ​ສະບຽງ​ອາຫານ.”

    ສະພາບ​ຝົນຕົກ​ໜ້ອຍ ແລະ​ຫິມະ​ບໍ່​ຕົກ​ເປັນ​ເວລາ​ຫຼາຍ​ເດືອນ​ຢູ່​ໃນ​ເນື້ອທີ່​ສ່ວນ​ໃຫຍ່​ຂອງ​ອາ​ຟະ​ກາ​ນິດ​ສະຖານ ໄດ້​ເຮັດ​ໃຫ້​ເກີດ​ໄພ​ແຫ້ງແລ້ງ​ຢ່າງ​ຮ້າຍ​ແຮງ. ມີ​ຫຼາຍ​ພື້ນ​ທີ່​ເກືອບ​ວ່າ​ບໍ່​ມີ​ຝົນຕົກ​ໃນ​ຮອບ 3 ປີ ເຮັດ​ໃຫ້​ປະລິມານ​ການ​ຜະລິດ​ໃນ​ລະດູ​ໜາວ​ທີ່​ຜ່ານ​ມາ ຫຼຸດ​ລົງ 10% ສັດລ້ຽງ​ຕາຍ​ເປັນ​ຈຳນວນ​ຫຼາຍ ໃນ​ຂະນະ​ທີ່​ກະສິກອນ​ປະ​ເຊີນ​ກັບ​ສະພາບ​ບໍ່​ໝັ້ນ​ທ່ຽງ.

ເຄືອ​ຂ່າຍ​ແຈ້ງ​ເຕືອນ​ສະພາບ​ອ່ອນ​ດ້ອຍ ຊຶ່ງ​ເປັນ​ໜ່ວຍ​ງານ​ຂຶ້ນ​ກັບ​ອົງການ​ພັດທະນາ​ສາກົນ​ຂອງ ສ ອາ​ເມ​ຣິ​ກາ (USAID) ທີ່​ໄດ້​ສ້າງຕັ້ງ​ຂຶ້ນ​ມາ​ເມື່ອ​ປີ 1985 ໃຫ້​ຮູ້​ວ່າ ໄພ​ແຫ້ງແລ້ງ​ອາດ​ເຮັດ​ໃຫ້​ປະລິມານ​ການ​ຜະລິດ​ເຂົ້າ​ເບຼ​ຢູ່​ໃນ​ອາ​ຟະ​ກາ​ນິດ​ສະຖານ ໃນ​ປີ 2018 ລົງ​ສູ່​ລະດັບ​ຕ່ຳ​ສຸດ ນັບ​ແຕ່​ປີ 2011 ເປັນຕົ້ນ​ມາ ໂດຍ​ຄາດ​ວ່າ​ອາ​ຟະ​ກາ​ນິດ​ສະຖານ ຈະ​ຂາດ​ດຸນ​ເຂົ້າ​ເບຼ​ໄປ 2,5 ລ້ານ​ໂຕນ​ໃນ​ປີ​ນີ້ ອາດ​ເຮັດ​ໃຫ້​ປະຊາຊົນ 2 ລ້ານ​ກວ່າ​ຄົນ ຢູ່​ໃນ​ປະເທດ​ນີ້ ປະ​ເຊີນ​ກັບ​ສະພາບ “ຂາດ​ຄວາມ​ໝັ້ນຄົງ​ທາງ​ດ້ານ​ສະບຽງ​ອາຫານ” ແລະ​ຕ້ອງ​ໄດ້​ມີ​ຄວາມ​ຕ້ອງການ​ຄວາມ​ຊ່ວຍເຫຼືອ​ມະນຸດສະທຳ​ພາຍ​ໃນ​ເວລາ 6 ເດືອນ​ຕໍ່ໜ້າ.

    ສະຖິຕິ​ຂອງ​ສະຫະ​ປະຊາ​ຊາດ (​ສປຊ) ຊີ້​ໃຫ້​ເຫັນ​ວ່າ ໄພ​ແຫ້ງແລ້ງ​ພວມ​ເປັນ​ຜົນ​ກະທົບ​ຕໍ່​ແຮງ​ງານ​ເກືອບ 15 ລ້ານ​ຄົນ ໃນ​ຂະແໜງ​ກະສິກຳ ຢູ່​ພາຍ​ໃນ​ກວ່າ 20 ແຂວງ​ຂອງ​ອາ​ຟະ​ກາ​ນິດ​ສະຖານ. ກະສິກອນ​ຕ້ອງ​ໄດ້​ນຳ​ເອົາ​ແນວ​ປູກ​ຂອງ​ລະດູ​ການ​ຜະລິດ​ຕໍ່ໜ້າ​ມາ​ກິນ​ເພື່ອ​ເອົາ​ຊີວິດ​ຢູ່​ລອດ. ໃນ​ຂະນະ​ດຽວ​ກັນ ແກະ ແລະ​ແບ້​ຫຼາຍ​ພັນ​ໂຕ​ກໍ​ໄດ້​ຕາຍ​ໄປ​ຍ້ອນ​ບໍ່​ມີ​ນ້ຳ​ດື່ມ ແລະ​ຫຍ້າ​ກໍ​ກາຍເປັນ​ຂີ້ຝຸ່ນ​ຍ້ອນ​ຖືກ​ແດດ​ເຜົາ​ໄໝ້.

    ທ່ານ ໂທ​ນີ ລັນ​ເຊີ ຜູ້​ປະສານ​ງານ​ຂອງ​ອົງການ​ໃຫ້​ຄວາມ​ຊ່ວຍເຫຼືອ​ມະນຸດສະທຳ​ຂອງ ​ສປຊ ແຈ້ງ​ເຕືອນ​ວ່າ ຖ້າ​ຫາ​ກວ່າ​ອຳນາດ​ການ​ປົກຄອງ​ອາ​ຟະ​ກາ​ນິດ​ສະຖານ ແລະ​ປະຊາ​ຄົມ​ສາກົນ ຊັກ​ຊ້າ​ໃນ​ການ​ແກ້​ໄຂ ກໍ​ຈະ​ເຮັດ​ໃຫ້​ອາ​ຟະ​ກາ​ນິດ​ສະຖານ ປະ​ເຊີນ​ກັບ​ໄພພິບັດ​ພາຍ​ໃນ​ລະດູ​ໜາວ​ທີ​ຈະ​ມາ​ເຖິງ ໃນ​ຂະນະ​ທີ່​ຄວາມ​ຕ້ອງການ​ດ້ານ​ສະບຽງ​ອາຫານ​ນັບ​ມື້​ນັບ​ເພີ່ມ​ຂຶ້ນ. ມາ​ຮອດ​ເວລາ​ນີ້ ຫາ​ກໍ​ມີ​ພຽງ​ປະມານ 460.000 ຄົນ ຫຼື​ເທົ່າ​ກັບ 25% ຂອງ​ຈຳນວນ​ຊາວ​ອາ​ຟະ​ກາ​ນິດ​ສະຖານ ຜູ້​ຊຶ່ງ​ຕ້ອງການ​ຄວາມ​ຊ່ວຍເຫຼືອ ທີ່​ໄດ້​ຮັບ​ສະບຽງ​ອາຫານ ແລະ​ສິ່ງ​ຂອງ​ຊ່ວຍເຫຼືອ​ຂອງ ​ສປຊ. ເມື່ອ​ບໍ່​ດົນ​ມາ​ນີ້ ອົງການ​ຊ່ວຍເຫຼືອ​ຂອງ​ສາກົນ ແລະ​ລັດຖະບານ​ອາ​ຟະ​ກາ​ນິດ​ສະຖານ ໄດ້​ບັນລຸ​ຂໍ້​ຕົກລົງ ກ່ຽວ​ກັບ​ການ​ເບີກ​ຈ່າຍ​ເຂົ້າ​ເບຼ​ຢູ່​ໃນ​ສ່າງ​ສຳຮອງ​ໃນ​ອາ​ຟະ​ກາ​ນິດ​ສະຖານ 60.000 ໂຕນ ເພື່ອ​ນຳໄປ​ຊ່ວຍເຫຼືອ​ປະຊາຊົນ.

    ສະພາບ​ການ​ຂາດແຄນ​ດັ່ງກ່າວ ໄດ້​ເຮັດ​ໃຫ້​ກະສິກອນ​ອາ​ຟະ​ກາ​ນິດ​ສະຖານ ຫຼາຍ​ພັນ​ຄົນ​ຕ້ອງ​ໄດ້​ໜີ​ປະ​ເຮືອນ​ຊານ ເພື່ອ​ເຂົ້າ​ໄປ​ຢູ່​ໃນ​ຕົວ​ເມືອງ​ທີ່​ບໍ່ເກີດ​ໄພ​ແຫ້ງແລ້ງ. ​ສປຊ ໃຫ້ການ​ຄາດ​ຄະເນ​ວ່າ ກະສິກອນ​ອາ​ຟະ​ກາ​ນິດ​ສະຖານ 70.000 ກວ່າ​ຄົນ ໄດ້​ໜີ​ປະ​ເຮືອ​ຊານ​ເພື່ອ​ເຂົ້າ​ໄປ​ອາໄສ​ຢູ່​ໃນ​ຕົວ​ເມືອງ.

ຂ່າວທີ່ກ່ຽວຂ້ອງ