ຂ່າວຫຼ້າສຸດ

ລະດົມແນວຄວາມຄິດເຫັນກ່ຽວກັບຊື່ເອີ້ນວ່າ ບຣູ

288 14 ສ.ຫ. 2018 ຂ່າວໜ້າ​ໜຶ່ງ

    ກຳ­ມາ​ທິ​ການ​ບັນ­ດາ­ເຜົ່າ​ສະ­ພາ​ແຫ່ງ​ຊາດ ສູນ​ກາງ​ແນວ​ລາວ​ສ້າງ​ຊາດ ກະ­ຊວງ​ພາຍ​ໃນ ແລະ ສະ​ຖາ​ບັນ​ວິ­ທະ­ຍາ­ສາດ​ສັງ­ຄົມ​ແຫ່ງ​ຊາດ ໄດ້​ຈັດ​ກອງ​ປະ­ຊຸມ​ເປີດ​ກວ້າງ​ປະ­ກອບ​ຄຳ​ເຫັນ​ກ່ຽວ​ກັບ​ຊົນ­ເຜົ່າ​ທີ່​ມີ​ຊື່​ເອີ້ນ​ວ່າ ບຣູ ຂຶ້ນ​ວັນ​ທີ 9 ສິງ­ຫາ 2018 ທີ່​ສູນ​ເຝິກ­ອົບ­ຮົມ​ແນວ​ລາວ​ສ້າງ​ຊາດ ໂດຍ​ເປັນ​ປະ­ທານ​ຂອງ​ທ່ານ ພົນ​ໂທ ແສງ​ນວນ ໄຊ​ຍະ​ລາດ ຮອງ​ປະ­ທານ​ສະ­ພາ​ແຫ່ງ​ຊາດ ມີ​ທ່ານ ຄຳ​ແພງ ທິບ​ມູນ​ຕາ​ລີ ຫົວ­ໜ້າ​ສະ​ຖາ​ບັນ​ຄົ້ນ­ຄວ້າ​ສັງ­ຄົມ​ສາດ ສະ​ຖາ​ບັນ​ວິ­ທະ­ຍາ­ສາດ​ສັງ­ຄົມ​ແຫ່ງ​ຊາດ ທ່ານ​ນາງ ບົວ​ພັນ ລີ​ໄກ​ຢາ ປະ­ທານ​ກຳ­ມາ​ທິ​ການ​ບັນ­ດາ­ເຜົ່າ ທ່ານ ຄຳ­ໃບ ດຳ­ລັດ ຮອງ​ປະ­ທານ​ສູນ​ກາງ​ແນວ​ລາວ​ສ້າງ​ຊາດ ແລະ ພາກ­ສ່ວນ​ທີ່​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ແສງ​ນວນ ໄຊ​ຍະ​ລາດ ກ່າວ​ວ່າ: ປະ­ເທດ​ລາວ​ປະ­ກອບ​ດ້ວຍ​ຫຼາຍ​ຊົນ­ເຜົ່າ​ທີ່​ມີ​ພາ­ສາ​ປາກ​ເວົ້າ ຮີດ ຄອງ​ປະ­ເພ­ນີ ແລະ ການ​ເຊື່ອ​ຖື​ທີ່​ແຕກ​ຕ່າງ​ກັນ ເຊິ່ງ​ຍາມ​ໃດ ພັກ-ລັດ ກໍ່​ໄດ້​ເອົາ­ໃຈ­ໃສ່ ແລະ ຖື​ສຳ­ຄັນ​ຕໍ່​ວຽກ​ງານ​ຊົນ­ເຜົ່າ ໂດຍ​ສະ­ເພາະ ແມ່ນ​ຊື່​ເອີ້ນ​ຂອງ​ແຕ່​ລະ​ຊົນ­ເຜົ່າ​ໃຫ້​ຖືກ​ກັບ​ຈຸດ​ພິ­ເສດ​ຂອງ​ຊົນ­ເຜົ່າ​ຢູ່​ໃນ​ລາວ ຖືກ​ກັບ​ຊື່​ຕົວ​ຈິງ​ຂອງ​ເຂົາ­ເຈົ້າ​ມັກ  ພ້ອມ​ກັນ​ນີ້ ກໍ່​ເພື່ອ​ກຳ­ຈັດ​ແກ້​ໄຂ ແລະ ກ້າວ​ໄປ​ເຖິງ​ການ​ລຶ­ບລ້າງ​ຊື່​ຊົນ­ເຜົ່າ​ທີ່​ມີ​ລັກ​ສະ ນະ​ສຽດ​ສີ ດູ​ຖູກ​ໝິ່ນ­ປະ­ໝາດ ແລະ ພາ­ໃຫ້​ເກີດ​ມີ​ການ​ອາ​ຄາດ​ບາດ­ໝາງ​ກັນ ສະ­ນັ້ນ ກອງ​ປະ­ຊຸມ​ຄັ້ງ​ນີ້ ໄດ້​ຮັບ​ຟັງ​ລາຍ​ງານ​ຜົນ​ການ​ຈັດ​ກອງ​ປະ­ຊຸມ​ຄົ້ນ­ຄວ້າ​ປະ­ກອບ​ຄຳ​ຄິດ​ຄຳ​ເຫັນ​ກ່ຽວ​ກັບ​ຊົນ­ເຜົ່າ​ທີ່​ມີ​ຊື່​ເອີ້ນ​ວ່າ: ບຣູ ຢູ່​ແຂວງ​ສະ­ຫວັນ​ນະ​ເຂດ ເພື່ອ​ໃຫ້​ຜູ້​ເຂົ້າ​ຮ່ວມ​ປະ­ຊຸມ​ໄດ້​ຮັບ​ຊາບ ແລະ ຜູ້​ເຂົ້າ​ຮ່ວມ​ໄດ້​ສຸມ​ສະ­ຕິ​ປັນ­ຍາ ປະ­ກອບ​ຄຳ​ຄິດ​ເຫັນ ເຮັດ​ໃຫ້​ກອງ​ປະ­ຊຸມ​ໄດ້​ຮັບ​ຜົນ­ສຳ­ເລັດ ເພື່ອ​ນຳ​ເຂົ້າ​ພິ­ຈາ­ລະ­ນາ​ໃນ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 6 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ທີ່​ຈະ​ຈັດ​ຂຶ້ນ​ທ້າຍ​ປີ 2018.

ຂ່າວທີ່ກ່ຽວຂ້ອງ