ລາວຍາດໄດ້ລາງວັນ ເຄືອຄ່າຍຜູ້ປະກອບການແມ່ຍິງອາຊຽນດີເດັ່ນ

209 14 ສ.ຫ. 2018 ຂ່າວໜ້າ​ໜຶ່ງ
ລາວຍາດໄດ້ລາງວັນ ເຄືອຄ່າຍຜູ້ປະກອບການແມ່ຍິງອາຊຽນດີເດັ່ນ

    ຄະ­ນະ​ບໍ­ລິ­ຫານ​ງານ​ສະ­ມາ­ຄົມ​ນັກ­ທຸ­ລະ­ກິດ​ແມ່­ຍິງ​ລາວ ຮ່ວມ​ກັບ ບໍ­ລິ­ສັດ​ເສດ​ຖາ​ຜັກ​ປອດ​ສານ­ພິດ ຈັດ​ພິ­ທີ​ສະ­ເຫຼີມ­ສະ­ຫຼອງ​ລາ­ງວັນ​ເຄືອ​ຄ່າຍ​ຜູ້​ປະ­ກອບ​ການ​ແມ່­ຍິງ​ອາ​ຊຽນ​ດີ­ເດັ່ນ (AWEN Award) ຂຶ້ນ​ວັນ​ທີ 11 ສິງ­ຫາ 2018 ຢູ່​ສວນ​ສາ­ທາ­ລະ­ນະ​ໜອງ​ສະ­ພັງ​ເລນ ນະ­ຄອນ­ຫຼວງ​ວຽງ​ຈັນ (ນວ) ໂດຍ​ມີ​ທ່ານ ນາງ ບົວ​ຈັນ ສີ​ຫາ​ນາດ ຮອງ​ປະ­ທານ​ສູນ​ກາງ​ສະ­ຫະ­ພັນ​ແມ່­ຍິງ​ລາວ ທ່ານ ພັນ​ຄຳ ມາ­ລາ​ບັນ­ດິດ ຫົວ­ໜ້າ​ພະ­ແນກ­ການ​ເງິນ ນວ ພ້ອມ​ດ້ວຍ​ຄະ­ນະ​ບໍ­ລິ­ຫານ​ງານ ສະ­ມາ­ຊິກ​ສະ­ມາ­ຄົມ ແລະ ແຂກ​ຖືກ​ເຊີນ​ເຂົ້າ​ຮ່ວມ.

    ທ່ານ​ນາງ ຈັນ­ທະ​ຈອນ ວົງ​ໄຊ ປະ­ທານ​ສະ­ມາ­ຄົມ​ນັກ­ທຸ­ລະ­ກິດ​ແມ່­ຍິງ​ລາວ ກ່າວ​ວ່າ: ການ​ຈັດ​ງານ​ຄັ້ງ​ນີ້ ເພື່ອ​ສະ­ແດງ​ຄວາມ​ເອກ­ອ້າງ​ທະ​ນົງ​ໃຈ ຍ້ອງ­ຍໍ-ຊົມ­ເຊີຍ ຜົນ­ສຳ­ເລັດ​ຂອງ​ສະ­ມາ­ຊິກ​ນັກ­ທຸ­ລະ­ກິດ​ແມ່ ຍິງ​ລາວ ທີ່​ສາ­ມາດ​ພັດ­ທະ­ນາ​ທຸ­ລະ​ກິດ​ຂອງ​ຕົນ​ທັງ​ປະ­ລິ­ມານ ແລະ ຄຸ­ນະ­ພາບ ໃຫ້​ທຽບ​ເທົ່າ​ກັບ​ທຸ­ລະ​ກິດ ອື່ນໆ​ໃນ​ລະ­ດັບ​ອາ​ຊຽນ ສະ­ແດງ​ອອກ​ປີ 2015-2018 ສະ­ມາ­ຄົມ​ນັກ­ທຸ­ລະ­ກິດ​ແມ່­ຍິງ​ລາວ ສາ­ມາດ​ຍາດ​ໄດ້​ລາ­ງວັນ​ດັ່ງ­ກ່າວ 21 ທ່ານ ໃນ​ນີ້​ປີ 2015 ມີ 1 ບໍ­ລິ­ສັດ ຄື: ກຸ່ມ​ບໍ­ລິ­ສັດ​ດາວ­ເຮືອງ ປີ 2016 ມີ 9 ບໍ­ລິ­ສັດ ຄື: ບໍ­ລິ­ສັດ K&C ກຣຸບ ຮ້ານ​ອາ­ຫານ​ຄົວ​ລາວ ຮ້ານ​ຫັດ­ຖະ­ກຳ​ອຳ​ມະ​ລິນ​ໄໝ​ລາວ ບໍ­ລິ­ສັດ SC ອອກ​ແບບ ຮ້ານ​ອາ­ຫານ​ແຊບ​ອີ່­ຫຼີ ບໍ­ລິ­ສັດ​ເກືອ​ເວີນ​ຄຳ ວາ­ລະ­ສານ​ທາ​ເກັດ ບໍ­ລິ­ສັດ ແລະ ຮຸ່ງ​ອາ​ລຸນ​ຂາ​ເຂົ້າ-ຂາ​ອອກ (ຫຼວງ​ນ້ຳ​ທາ) ປີ 2017 ມີ 3 ບໍ­ລິ­ສັດ ຄື: ໂຮງ­ຮຽນ​ນາ­ນາ​ຊາດ​ປັນ­ຍາ​ທິບ ຮ້ານ​ປະ­ຕູ​ໄຊ​ກາ­ເຟ ແລະ ບໍ­ລິ­ສັດ​ດາວ​ສະ­ຫວັນ​ກາ​ເມັນ ປີ 2018 ມີ 9 ບໍ­ລິ­ສັດ ຄື: ບໍ­ລິ­ສັດ​ຫົງ​ຄຳ​ພາກ​ໃຕ້ ແຂວງ​ຈຳ­ປາ​ສັກ ກຸ່ມ​ບໍ­ລິ­ສັດ​ດີ​ເອັມ​ກໍ່­ສ້າງ-ການ​ຄ້າ ບໍ­ລິ­ສັດ​ເສດ​ຖາ ຜັກ​ປອດ​ສານ­ພິດ ບໍ­ລິ­ສັດ​ພູນ​ເງິນ​ການ​ຄ້າ ຂາ​ອອກ-ຂາ​ເຂົ້າ ລາວ​ອິນ​ເຕີ​ຄຣີ​ນິກ ບໍ­ລິ­ສັດ ລື​ໄຊ​ກໍ່­ສ້າງ ບໍ­ລິ­ສັດ INFOTECH ບໍ­ລິ­ຫານ​ເຕັກ​ໂນ​ໂລ​ຊີ ບໍ­ລິ­ສັດ Lao INTERTRADE ຈຳ­ກັດ​ຜູ້​ດຽວ ແລະ ຮ້ານ​ນາ​ຣີ​ກະ­ເປົາ​ປະ­ຍຸກ ການ​ຮັບ​ລາ­ງວັນ AWEN Award ໄດ້​ນຳ​ເອົາ​ຄຸນ­ງາມ­ຄວາມ­ດີ​ອັນ​ຊົງ​ກຽດ​ໃນ​ລະ­ດັບ​ອາ​ຊຽນ​ມາ­ສູ່​ຄອບ­ຄົວ ການ­ຈັດ­ຕັ້ງ ສູ່​ສັງ­ຄົມ ແລະ ປະ­ເທດ​ຊາດ ອັນ​ໄດ້​ສ້າງ​ສີ­ສັນ​ອັນ​ໃໝ່​ໃນ​ວົງ​ການ​ທຸ­ລະ​ກິດ​ລາວ ໂດຍ​ສະ­ເພາະ ທຸ­ລະ​ກິດ​ແມ່­ຍິງ​ລາວ.

    ໃນ​ພິ­ທີ​ຄັ້ງ​ນີ້ ຍັງ​ໄດ້​ມອບ​ໃບ​ຍ້ອງ­ຍໍ​ປະ­ທານ​ຄະ­ນະ​ບໍ­ລິ­ຫານ​ງານ​ສະ­ມາ­ຄົມ​ນັກ­ທຸ­ລະ­ກິດ​ແມ່­ຍິງ​ລາວ ໃຫ້​ສະ­ມາ­ຊິກ​ສະ­ມາ­ຄົມ​ນັກ­ທຸ­ລະ­ກິດ​ແມ່­ຍິງ​ລາວ ທີ່​ສາ­ມາດ​ຍາດ​ໄດ້​ລາ­ງວັນ AWEN Award ນອກ​ນີ້ ຍັງ​ໄດ້​ຈັດ​ກິດ­ຈະ­ກຳ​ລະ­ດົມ​ທຶນ ເພື່ອ​ຊ່ວຍ­ເຫຼືອ​ຜູ້​ປະ­ສົບ​ໄພ­ພິ­ບັດ​ນ້ຳ​ຖ້ວມ​ຢູ່​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື​ນຳ​ຜູ້​ທີ່​ເຂົ້າ​ຮ່ວມ​ງານ ໃນ​ນີ້​ສາ­ມາດ​ລະ­ດົມ​ທຶນ 50 ລ້ານ​ກີບ ແລະ 9.000 ບາດ.

ຂ່າວທີ່ກ່ຽວຂ້ອງ