ດ່ານພາສີໜອງດາ ເກັບລາຍຮັບໄດ້ເກີນແຜນ ຄາດໝົດປີລາຍຮັບຈະບັນລຸ 2 ຕື້ກວ່າກີບ

171 14 ສ.ຫ. 2018 ຂ່າວໜ້າ​ໜຶ່ງ
ດ່ານພາສີໜອງດາ ເກັບລາຍຮັບໄດ້ເກີນແຜນ ຄາດໝົດປີລາຍຮັບຈະບັນລຸ 2 ຕື້ກວ່າກີບ

    ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ວິ­ຊາ​ສະ­ເພາະ ເກັບ​ລາຍ​ຮັບ​ເຂົ້າ​ງົບ­ປະ­ມານ​ແຫ່ງ​ລັດ​ປີ 2018 ຂອງ​ດ່ານ​ພາ­ສີ​ປະ­ເພ­ນີ​ໜອງ​ດາ ເມືອງ​ສີ​ໂຄດ​ຕະ­ບອງ ນະ­ຄອນ­ຫຼວງ​ວຽງ​ຈັນ ຂຶ້ນ​ກັບ​ກອງ​ຄຸ້ມ​ຄອງ​ພາ­ສີ V ນັບ​ແຕ່​ເດືອນ​ມັງ­ກອນ-ກໍ­ລະ­ກົດ 2018 ສາ­ມາດ​ປະ­ຕິ­ບັດ​ລາຍ​ຮັບ​ໄດ້​ທັງ​ໝົດ 1,12 ຕື້​ກວ່າ​ກີບ ເທົ່າ​ກັບ 108,27% ຂອງ​ແຜນ­ການ​ປີ ຄິດ​ເປັນ​ເງິນ​ເກືອບ 100 ລ້ານ​ກີບ ຊຶ່ງ​ລາຍ​ຮັບ​ສ່ວນ​ໃຫຍ່​ໄດ້​ຈາກ​ການ​ນຳ​ເຂົ້າ​ປະ­ເພດ​ໝາກ​ໄມ້​ຕາມ​ລະ­ດູ​ການ ເຄື່ອງ​ອຸ­ປະ­ໂພກ-ບໍ­ລິ­ໂພກ ແລະ ອື່ນໆ.

    ທ່ານ ທອງ​ວັນ ສີ​ທອງ​ມາ ຫົວ­ໜ້າ​ດ່ານ​ພາ­ສີ​ປະ­ເພ­ນີ​ໜອງ​ດາ ໃຫ້​ຮູ້​ວ່າ: ດ່ານ​ພາ­ສີ​ປະ­ເພ­ນີ​ໜອງ​ດາ ເປັນ​ດ່ານ​ປະ­ເພ­ນີ​ຂຶ້ນ​ກັບ​ກອງ​ຄຸ້ມ​ຄອງ​ພາ­ສີ V ຕັ້ງ​ຢູ່​ເມືອງ​ສີ​ໂຄດ​ຕະ­ບອງ ນະ­ຄອນ­ຫຼວງ​ວຽງ​ຈັນ ປະ­ກອບ​ມີ​ພະ­ນັກ ງານ​ເຈົ້າ​ໜ້າ­ທີ່​ພາ­ສີ ທັງ​ໝົດ 9 ຄົນ ຍິງ 1 ຄົນ ໃນ​ນັ້ນ ມີ​ຫົວ­ໜ້າ​ດ່ານ 1 ຄົນ ຮອງ​ຫົວ­ໜ້າ​ດ່ານ 2 ຄົນ ພະ­ນັກ­ງານ​ວິ­ຊາ​ການ 4 ຄົນ ແລະ ພະ­ນັກ­ງານ​ຕາມ​ສັນ­ຍາ 2 ຄົນ ມີ​ສະ­ມາ­ຊິກ​ພັກ 07 ຄົນ ຍິງ 1 ຄົນ.

    ສຳ­ລັບ​ປີ 2018 ດ່ານ​ພາ­ສີ​ປະ­ເພ­ນີ​ໜອງ​ດາ ໄດ້​ຮັບ​ຕົວ​ເລກ​ຈັດ​ເກັບ​ລາຍ​ຮັບ​ເຂົ້າ​ງົບ­ປະ­ມານ​ແຫ່ງ​ລັດ​ທັງ​ໝົດ 1,03 ຕື້​ກີບ ພາຍ­ຫຼັງ​ໄດ້​ຕົວ​ເລກ​ມອບ​ໝາຍ​ໃຫ້​ຈັດ​ເກັບ​ລາຍ​ຮັບ ຄະ­ນະ​ຮັບ­ຜິດ­ຊອບ​ພາຍ​ໃນ​ດ່ານ ໄດ້​ສັບ​ຊ້ອນ​ພະ­ນັກ­ງານ​ວິ­ຊາ​ການ​ເຂົ້າ​ວຽກ​ງານ​ຕົວ​ຈິງ ແລະ ໄດ້​ແບ່ງ​ຕົວ​ເລກ​ຈັດ​ເກັບ​ລາຍ​ຮັບ​ປະ­ຈຳ​ເດືອນ ເດືອນ​ລະ 86 ລ້ານ​ກີບ ແບ່ງ​ເປັນ​ງວດ​ລະ 259 ລ້ານ​ກີບ ແຕ່​ຜ່ານ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຕົວ​ຈິງ 7 ເດືອນ 2018 (ນັບ​ແຕ່​ວັນ​ທີ 1 ມັງ­ກອນ 2018-ວັນ​ທີ 31 ກໍ­ລະ­ກົດ 2018) ສາ­ມາດ​ຈັດ​ເກັບ​ລາຍ​ຮັບ​ເຂົ້າ​ງົບ­ປະ­ມານ​ໄດ້​ທັງ​ໝົດ ຈຳ­ນວນ 1,12 ຕື້​ກວ່າ​ກີບ ເທົ່າ​ກັບ 108,27% ຂອງ​ແຜນ­ການ​ປີ ລື່ນ​ແຜນ­ການ​ປີ 8,27% ຄິດ​ເປັນ​ເງິນ​ປະ­ມານ 85 ລ້ານ​ກວ່າ​ກີບ ຊຶ່ງ​ລາຍ​ຮັບ​ສ່ວນ​ໃຫຍ່​ໄດ້​ຈາກ​ການ​ເກັບ​ພາ­ສີ​ການ​ນຳ​ເຂົ້າ​ສິນ­ຄ້າ​ປະ­ເພດ​ເຄື່ອງ​ອຸ­ປະ­ໂພກ-ບໍ­ລິ­ໂພກ ປະ­ເພດ​ໝາກ​ໄມ້​ຕາມ​ລະ­ດູ​ການ ປະ­ເພດ​ຜັກ ແລະ ອື່ນໆ.

    ສາ­ເຫດ​ທີ່​ເຮັດ​ໃຫ້­ການ​ຈັດ​ເກັບ​ລາຍ​ຮັບ​ໃນ 7 ເດືອນ 2018 ລື່ນ​ແຜນ­ການ​ປີ ເນື່ອງ​ຈາກ​ດ່ານ​ພາ­ສີ​ປະ­ເພ­ນີ​ໜອງ​ດາ ເປັນ​ດ່ານ​ທີ່​ມີ​ໂຄງ​ສ້າງ​ຄ້າຍ­ຄື​ກັບ​ດ່ານ​ສາ­ກົນ ປະ­ກອບ​ມີ​ຫຼາຍ​ພາກ­ສ່ວນ ເປັນ­ຕົ້ນ ແມ່ນ​ຕຳ­ຫຼວດ​ກວດ​ຄົນ​ເຂົ້າ​ເມືອງ (ຕມ) ມີ​ພາ­ສີ​ປະ­ຈຳ​ດ່ານ ໜ່ວຍ​ງານ​ກັກ​ກັນ​ພືດ ໜ່ວຍ​ງານ​ສາ­ທາ­ລະ­ນະ​ສຸກ ແລະ ຜູ້​ສຳ​ປະ­ທານ​ເອື້ອ​ອຳ­ນວຍ​ຄວາມ​ສະ­ດວກ​ສະ­ຖານ­ທີ່​ຕ່າງໆ​ພາຍ​ໃນ​ດ່ານ ການ​ເຂົ້າ-ອອກ​ຂອງ​ຜູ້​ປະ­ກອບ​ການ ແລະ ປະ­ຊາ ຊົນ​ທີ່​ເຂົ້າ-ອອກ​ຜ່ານ​ດ່ານ​ດັ່ງ­ກ່າວ.

    ຄຽງ​ຄູ່​ກັນ​ນີ້ ຍ້ອນ​ມີ​ກົດ­ໝາຍ​ວ່າ​ດ້ວຍ​ພາ­ສີ ບັນ­ດາ​ບົດ​ແນະ­ນຳ ແຈ້ງ​ການ​ຕ່າງໆ​ເປັນ​ບ່ອນ​ອີງ​ໃນ​ການ​ຈັດ ຕັ້ງ​ປະ­ຕິ­ບັດ​ວຽກ​ງານ​ວິ­ຊາ​ສະ­ເພາະ ແລະ ມີ​ການ​ຊີ້​ນຳ-ນຳ­ພາ​ຈາກ​ກອງ​ຄຸ້ມ​ຄອງ​ພາ­ສີ V ມີ​ແບບ­ແຜນ​ວິ­ທີ​ເຮັດ​ວຽກ ໂດຍ​ຖື​ເອົາ​ການ​ເຮັດ​ວຽກ​ເປັນ​ໝູ່​ຄະ­ນະ ບຸກ­ຄົນ​ຮັບ­ຜິດ­ຊອບ ມີ​ການ​ສ້າງ​ແຜນ​ກວດ­ກາ​ຕິດ­ຕາມ​ຢ່າງ​ເປັນ​ປົກ­ກະ­ຕິ ແລະ ມີ​ການ​ປະ­ສານ​ສົບ​ທົບ​ກັບ​ພາກ­ສ່ວນ​ຕ່າງໆ​ທີ່​ກ່ຽວ­ຂ້ອງ​ພາຍ​ໃນ​ດ່ານ​ຢ່າງ​ວ່ອງ­ໄວ ທັນ​ກັບ​ສະ­ພາບ​ການ​ທີ່​ເກີດ​ຂຶ້ນ ຈຶ່ງ​ບໍ່­ເກີດ​ມີ​ປາ­ກົດ­ການ​ຫຍໍ້​ທໍ່​ຕ່າງໆ​ພາຍ​ໃນ​ດ່ານ.

    ເພື່ອ​ເຮັດ​ໃຫ້​ແຜນ­ການ​ຄາດ​ຄະ­ເນ​ເກັບ​ລາຍ​ຮັບ​ໝົດ​ປີ ຢ່າງ​ໜ້ອຍ​ລື່ນ​ແຜນ 100% ຫຼື ຄິດ​ເປັນ​ເງິນ​ປະ­ມານ 2 ຕື້​ກວ່າ​ກີບ ຈະ​ໄດ້​ສືບ­ຕໍ່​ໃນ​ການ​ສຶກ​ສາ​ອົບ­ຮົມ​ທາງ​ດ້ານ​ແນວ​ຄິດ-ການ­ເມືອງ ໃຫ້​ສະ­ມາ­ຊິກ​ພັກ-ພະ­ນັກ­ງານ​ທີ່­ຢູ່​ໃນ​ຄວາມ​ຮັບ­ຜິດ­ຊອບ​ຂອງ​ຕົນ​ຢ່າງ​ເປັນ​ປົກ­ກະ­ຕິ ປັບ­ປຸງ​ແບບ­ແຜນ​ເຮັດ​ວຽກ​ໃຫ້​ມີ​ຄວາມ​ຊັດ​ເຈນ​ຂຶ້ນ​ຕື່ມ ເປັນ­ຕົ້ນ​ແມ່ນ​ການ​ກວດ­ກາ​ການ​ປະ­ຈຳ­ການ ການ​ປະ­ຕິ­ບັດ​ໜ້າ­ທີ່​ຂອງ​ພະ­ນັກ­ງານ​ທີ່­ຢູ່​ໃນ​ຄວາມ​ຮັບ­ຜິດ­ຊອບ​ໃຫ້​ສູງ​ຂຶ້ນ ເຂັ້ມ​ງວດ​ໃນ​ການ​ກວດ­ກາ​ສິນ­ຄ້າ ເຄື່ອງ​ຂອງ ແລະ ປະ­ຕິ­ບັດ​ພັນ­ທະ​ເສຍ​ພາ­ສີ-ອາ­ກອນ​ໃຫ້​ຄົບ​ຖ້ວນ ແລະ ທັນ​ເວ­ລາ ນຳ​ໃຊ້​ມາດ​ຕະ­ການ​ຕໍ່​ຜູ້​ຝ່າ­ຝືນ​ລະ­ບຽບ​ກົດ­ໝາຍ ຈັດ​ລະ­ບຽບ​ການ​ກວດ​ປ່ອຍ​ສິນ­ຄ້າ​ຢ່າງ​ເຂັ້ມ​ງວດ ບໍ່​ໃຫ້​ບັນ­ທຸກ​ສິນ­ຄ້າ​ສູງ​ເກີນ​ກຳ­ນົດ​ຂອງ​ລະ­ບຽບ​ການ​ຂົນ­ສົ່ງ​ທາງ­ບົກ-ທາງ­ນ້ຳ ເພື່ອ​ຄວາມ​ເປັນ​ລະ­ບຽບ ແລະ ຄວາມ​ປອດ​ໄພ​ໃນ​ການ​ສັນ­ຈອນ​ຕາມ​ເສັ້ນ­ທາງ ເຂັ້ມ​ງວດ​ໃນ​ການ​ປະ­ຕິ­ບັດ​ຕາມ​ລະ­ບຽບ​ເວ­ລາ​ເປີດ-ປິດ (ວັນ​ເປີດ​ດ່ານ: ວັນ​ອັງ­ຄານ ພະ­ຫັດ ວັນ​ເສົາ ເວ­ລາ 7:30-17:00 ໂມງ) ຕາມ​ຄະ­ນະ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ​ເຊັນ​ກັນ​ລະ­ຫວ່າງ ນະ­ຄອນ­ຫຼວງ​ວຽງ​ຈັນ ແລະ ຈັງ­ຫວັດ​ໜອງ​ຄາຍ (ເມືອງ​ສີ​ໂຄດ​ຕະ­ບອງ ແລະ ອຳ​ເພີ​ສີ​ຊຽງ​ໃໝ່ ລາ­ຊະ​ອາ­ນາ­ຈັກ​ໄທ) ແລະ ບັນ­ຫາ​ອື່ນ ທີ່​ຕິດ​ພັນ​ກັບ​ຂະ­ແໜງ​ພາ­ສີ.

ຂ່າວທີ່ກ່ຽວຂ້ອງ