ໄປສຳຜັດກັບຕະຫຼາດສາລະຄຳໃໝ່ ທີ່ໄດ້ມາດຕະຖານ

150 14 ສ.ຫ. 2018 ຂ່າວໜ້າ​ໜຶ່ງ
ໄປສຳຜັດກັບຕະຫຼາດສາລະຄຳໃໝ່ ທີ່ໄດ້ມາດຕະຖານ

    ເພື່ອ​ສ້າງ​ຄວາມ​ສະ­ດວກ​ໃຫ້​ແກ່​ການ​ຊື້-ຂາຍ ແກ້​ໄຂ​ການ​ຂາຍ­ເຄື່ອງ​ຊະ­ຊາຍ​ຕາມ​ແຄມ​ທາງ ແລະ ການ​ສັນ​ຈອດ​ແອ​ອັດ​ໃນ​ຕົວ​ເມືອງ ພັກ-ລັດ ກໍ່​ຄື ຂະ­ແໜງ­ການ​ກ່ຽວ­ຂ້ອງ ແລະ ອຳ­ນາດ​ການ​ປົກ­ຄອງ​ທ້ອງ­ຖິ່ນ​ໄດ້​ອະ­ນຸ­ຍາດ​ໃຫ້​ພາກ​ເອ­ກະ​ຊົນ​ພາຍ​ໃນ​ສ້າງ​ຕະ­ຫຼາດ​ທີ່​ໄດ້​ມາດ­ຕະ­ຖານ​ຂຶ້ນ​ຫຼາຍ​ແຫ່ງ ໃນ​ປັດ­ຈຸ­ບັນ​ຢູ່​ນະ­ຄອນ­ຫຼວງ​ວຽງ​ຈັນ ເພື່ອ​ຮອງ​ຮັບ​ແມ່​ຄ້າ​ຊາວ​ຂາຍ ໃນ​ນັ້ນ ກໍ່​ມີ​ຕະ­ຫຼາດ​ສາ­ລະ​ຄຳ​ໃໝ່​ທີ່​ຕັ້ງ​ຢູ່​ຕິດ​ກັບ​ບຶງ​ສາ­ລະ​ຄຳ ບ້ານ​ສາ­ລະ​ຄຳ ເມືອງ​ຫາດ​ຊາຍ​ຟອງ ເຊິ່ງ​ເປັນ​ຕະ­ຫຼາດ​ແຫ່ງ​ໜຶ່ງ​ທີ່​ໄດ້​ມາດ­ຕະ­ຖານ ແລະ ໄດ້​ເປີດ​ໃຫ້​ບໍ­ລິ­ການ​ໃນ​ວັນ​ທີ 25 ກໍ­ລະ­ກົດ 2018 ເປັນ­ຕົ້ນ​ມາ.

     ທ່ານ ພູ­ທອນ ກໍ​ລະ​ສັກ ຜູ້­ອຳ­ນວຍ­ການ​ຕະ­ຫຼາດ​ສາ­ລະ​ຄຳ​ໃໝ່ ໄດ້​ໃຫ້​ສຳ­ພາດ​ວັນ​ທີ 1 ສິງ­ຫາ 2018 ວ່າ: ຕະ­ຫຼາດ​ສາ­ລະ​ຄຳ​ໃໝ່​ມີ​ເນື້ອ­ທີ່ 7 ເຮັກ­ຕາ ເປັນ​ຕະ­ຫຼາດ​ຂາຍ­ຍ່ອຍ ຂາຍ­ຍົກ ແລະ ຂາຍ​ສົ່ງ ແບບ​ຄົບ​ວົງ​ຈອນ ເພື່ອ​ຮອງ​ຮັບ​ຊາວ​ຄ້າ­ຂາຍ​ເຂດ​ເມືອງ​ຫາດ​ຊາຍ​ຟອງ ແລະ ຕະ­ຫຼາດ​ແຫ່ງ​ນີ້​ຈະ​ພັດ­ທະ­ນາ​ໃຫ້​ສຳ­ເລັດ​ປີ 2021 ໂດຍ​ພັດ­ທະ­ນາ​ໄປ​ແຕ່​ລະ​ໄລ­ຍະ​ມີ 4 ອາ­ຄານ​ຂາຍ ປັດ­ຈຸ­ບັນ​ໄດ້​ສ້າງ​ສຳ­ເລັດ​ອາ­ຄານ​ທີ 1 ເພື່ອ​ຮອງ​ຮັບ​ຊາວ​ຄ້າ­ຂາຍ​ທີ່​ຍົກ­ຍ້າຍ​ມາ​ແຕ່​ຕະ­ຫຼາດ​ສາ­ລະ​ຄຳ​ເກົ່າ​ຕັ້ງ​ຢູ່​ຕິດ​ກັບ​ຖະ­ໜົນ​ທ່າ​ເດື່ອ​ທີ່​ບໍ່​ເໝາະ​ສົມ​ດ້ານ​ສະ­ຖານ­ທີ່ ເຮັດ​ໃຫ້­ການ​ສັນ­ຈອນ​ແອ​ອັດ​ຍ້ອນ​ບໍ່​ມີ​ສະ­ຖານ­ທີ່​ຈອດ​ລົດ ເຊິ່ງ​ອາ­ຄານ​ທີ 1 ໄດ້​ເລີ່ມ​ກໍ່­ສ້າງ​ມາ​ແຕ່​ເດືອນ​ກໍ­ລະ­ກົດ 2017 ແລະ ສຳ­ເລັດ​ເດືອນ​ກໍ­ລະ­ກົດ 2018  ສ່ວນ​ອາ­ຄານ​ທີ 2 ຈະ​ສ້າງ​ທ້າຍ​ປີ 2018 ແລະ ຈະ​ໃຫ້​ສຳ­ເລັດ​ກາງ​ປີ 2019 ສ່ວນ​ອີກ 2 ອາ­ຄານ​ກໍ່​ຈະ​ສ້າງ​ຕໍ່ໆ​ໄປ​ຕາມ​ລຳ­ດັບ​ທີ່​ເປັນ​ອາ­ຄານ​ຂາຍ­ຍົກ​ສະ­ເພາະ​ສິນ­ຄ້າ​ກະ­ສິ­ກຳ ແລະ ເຄື່ອງ​ອຸ­ປະ­ໂພກ-ບໍ­ລິ­ໂພກ​ທີ່​ນຳ​ເຂົ້າ​ມາ​ຈາກ​ປະ­ເທດ​ໃກ້​ຄຽງ​ມາ​ຄັດ​ເລືອກ​ແຍກ​ສິນ­ຄ້າ​ຢູ່​ຕະ­ຫຼາດ​ແຫ່ງ​ນີ້​ກ່ອນ​ທີ່​ຈະ​ສົ່ງ​ໄປ​ຍັງ​ຕະ­ຫຼາດ​ແຫ່ງ​ອື່ນໆ ແລະ ອາ­ຄານ​ຂາຍ​ສິນ­ຄ້າ​ພາຍ​ໃນ​ທີ່​ເປັນ​ສິນ­ຄ້າ​ໂອ​ດ໋ອບ.

      ສຳ­ລັບ​ອາ­ຄານ​ທີ 1 ດ້ານ​ພື້ນ­ຖານ​ໂຄງ​ລ່າງ​ໄດ້​ມາດ­ຕະ­ຖານ​ເປັນ​ອາ­ຄານ​ໂລ່ງ​ອາ­ກາດ​ປອດ­ໂປ່ງ ໂຕະ​ຂາຍ­ເຄື່ອງ​ເຮັດ​ດ້ວຍ​ເບ​ຕົງ​ເສີມ​ເຫຼັກ ປູ​ດ້ວຍ​ກະ​ໂລ​ເພື່ອ​ອະ­ນາ­ໄມ​ງ່າຍ​ມີ​ຄວາມ​ສະ­ອາດ ມີ​ໂຕະ​ຂາຍ​ປະ­ມານ 120 ໂຕະ ແລະ ຫ້ອງ​ຂາຍ­ເຄື່ອງ​ທົ່ວ​ໄປ​ປະ­ມານ 100 ຫ້ອງ ປັດ­ຈຸ­ບັນ​ໄດ້​ມີ​ຊາວ​ຄ້າ­ຂາຍ​ມາ​ຈັບ­ຈອງ​ໂຕະ​ຂາຍ​ເຕັມ​ແລ້ວ ສ່ວນ​ຫ້ອງ​ຂາຍ­ເຄື່ອງ​ທົ່ວ​ໄປ​ມາ​ຈອງ​ແລ້ວ​ປະ­ມານ 50% ຜູ້​ທີ່​ມາ​ຈອງ​ນອກ­ຈາກ​ແມ່​ຄ້າ​ຕະ­ຫຼາດ​ສາ­ລະ​ຄຳ​ເກົ່າ​ແລ້ວ ກໍ່​ຍັງ​ມີ​ປະ­ຊາ­ຊົນ​ບ້ານ​ອ້ອມ​ຂ້າງ ນອກ​ນີ້ ຍັງ​ມີ​ສິ່ງ​ອຳ­ນວຍ​ຄວາມ​ສະ­ດວກ​ອື່ນໆ ເປັນ­ຕົ້ນ ມີ​ຫ້ອງ​ນ້ຳ​ສະ­ອາດ​ແຍກ​ເປັນ​ຫຼັງ ສະ­ຖານ­ທີ່​ຈອດ​ລົດ​ເທ​ດ້ວຍ​ເບ​ຕົງ​ກວ້າງ­ຂວາງ​ສາ­ມາດ​ຮອງ​ຮັບ​ໄດ້​ຈຳ­ນວນ​ຫຼວງ­ຫຼາຍ ເຊິ່ງ​ໃນ​ໄລ­ຍະ​ເບື້ອງ​ຕົ້ນ​ນີ້ ຜູ້​ມາ​ຈັບ­ຈອງ​ໂຕະ ແລະ ຫ້ອງ​ຂາຍ­ເຄື່ອງ​ຈະ​ບໍ່​ເກັບ​ຄ່າ​ເຊົ່າ ແລະ ຄ່າ​ບໍ­ລິ­ການ​ອື່ນໆ ເປັນ­ຕົ້ນ ຄ່າ​ນ້ຳ ຄ່າ​ໄຟ­ຟ້າ ເປັນ​ໄລ­ຍະ​ເວ­ລາ 3 ເດືອນ ພ້ອມ​ນີ້ ລົດ​ໃຫຍ່ ແລະ ລົດ­ຈັກ​ກໍ່​ບໍ່​ໄດ້​ເສຍ​ຄ່າ​ຝາກ.

    ທ່ານ ພູ­ທອນ ກໍ​ລະ​ສັກ ຍັງ​ກ່າວ​ຕື່ມ​ວ່າ: ເພື່ອ​ສ້າງ​ຄວາມ​ສະ­ດວກ​ໃຫ້​ແກ່​ຜູ້​ທີ່​ເຂົ້າ​ມາ​ຊື້​ເຄື່ອງ ແລະ ປະ­ຕິ­ບັດ​ຄວາມ​ສະ­ອາດ​ໃຫ້​ເປັນ​ອັນ​ດັບ​ຕົ້ນ​ນັ້ນ ທາງ​ຕະ­ຫຼາດ​ຍັງ​ໄດ້​ຈັດ​ເປັນ​ໂຊນ​ຂາຍ­ເຄື່ອງ​ຄື:ໂຊນ​ສີ­ຂຽວ ຈະ​ຂາຍ​ສະ­ເພາະ​ພືດ​ຜັກ ແລະ ໝາກ​ໄມ້ ໂຊນ​ສີ­ຟ້າ​ຈະ​ຂາຍ​ປະ­ເພດ​ເຄື່ອງ​ແຫ້ງ​ເຄື່ອງ​ອຸ­ປະ­ໂພກ-ບໍ­ລິ­ໂພກ  ແລະ ໂຊນ​ສີ​ສົ້ມ​ຈະ​ຂາຍ​ປະ­ເພດ ເຄື່ອງ​ຄາວ ເປັນ­ຕົ້ນ ຊີ້ນ ປາ ແລະ ອາ­ຫານ​ທະ­ເລ ໂດຍ​ສິນ­ຄ້າ​ແຕ່​ລະ​ປະ­ເພດ​ຈະ​ບໍ່​ປົນ​ເປ​ກັນ ນອກ​ນີ້ ຕະ­ຫຼາດ​ຍັງ​ມີ​ທາງ​ເຂົ້າ-ອອກ 3 ເສັ້ນ​ຄື: ຈາກ​ເສັ້ນ​ທ່າ​ເດື່ອ​ບ້ານ​ສາ­ລະ​ຄຳ​ເໜືອ ເຂົ້າ​ທາງ​ກົງ­ກັນ­ຂ້າມ​ກັບ​ວັດ​ສາ­ລະ​ຄຳ ແລະ ເຂົ້າ​ທາງ​ເສັ້ນ­ທາງ​ເຊື່ອມ​ຕໍ່​ຈາກ​ບ້ານ​ນາ​ໄຫ​ສະ­ຖາ­ນີ​ໄຟ­ຟ້າ ດັ່ງ­ນັ້ນ ເຊີນ­ຊວນ​ຊາວ​ຄ້າ­ຂາຍ ແລະ ປະ­ຊາ­ຊົນ​ເຂົ້າ​ໄປ​ຈັບ​ຈ່າຍ​ຊື້​ສິນ­ຄ້າ​ສຳ­ຜັດ​ກັບ​ຕະ­ຫຼາດ​ສາ­ລະ​ຄຳ​ໃໝ່ ເປີດ​ບໍ­ລິ­ການ​ແຕ່​ເວ­ລາ 7:00-20:00 ໂມງ.

ຂ່າວທີ່ກ່ຽວຂ້ອງ