ຂ່າວຫຼ້າສຸດ

ຄອບຄົວທ່ານປະທານປະເທດ ມອບເງິນຊ່ວຍເຫຼືອຜູ້ປະສົບໄພນ້ຳຖ້ວມ ຢູ່ແຂວງອັດຕະປື

214 14 ສ.ຫ. 2018 ຂ່າວໜ້າ​ໜຶ່ງ

    ໃນ​ຕອນ​ແລງ​ຂອງ​ວັນ​ທີ 10 ສິງ­ຫາ 2018 ທ່ານ​ນາງ ຄຳ​ເມິງ ວໍ­ລະ​ຈິດ ພັນ​ລະ​ຍາ​ທ່ານ​ປະ­ທານ​ປະ­ເທດ ບຸນ​ຍັງ ວໍ­ລະ​ຈິດ ພ້ອມ​ລູກ​ຫຼານຈາກ​ນະ­ຄອນ­ຫຼວງ​ວຽງ​ຈັນ ໄດ້​ນຳ​ເອົາ​ວັດ­ຖຸ​ສິ່ງ​ຂອງ ແລະ ເງິນ ສົດ​ຈຳ­ນວນ 270 ລ້ານ​ກີບ ໄປ​ຊ່ວຍ­ເຫຼືອ​ຜູ້​ປະ­ສົບ​ໄພ​ນ້ຳ​ຖ້ວມ ຢູ່​ແຂວງ​ອັດ​ຕະ​ປື.

    ໃນ​ຈຳ­ນວນ​ເງິນ​ຊ່ວຍ­ເຫຼືອ ໃນ​ນີ້ 150 ລ້ານ​ກີບ ແມ່ນ​ມອບ​ທ່ານ​ນາງ ນິ​ພາ​ພອນ ໄຊ​ສົມ​ພູ ຮອງ​ເລ­ຂາ​ພັກ​ແຂວງ ຄະ­ນະ​ປະ­ຈຳ​ພາກ​ສະ­ໜາມ​ແກ້​ໄຂ​ໄພ­ພິ­ບັດ​ຢູ່​ເມືອງ​ສະ­ໜາມ​ໄຊ ແລະ ອີກ 120 ລ້ານກີບ ພ້ອມ​ເຄື່ອງ­ໃຊ້​ໃນ​ເຮືອນ ຈຳ­ນວນ 1.800 ຊຸດ ແມ່ນ​ໃຫ້​ທ່ານ ບຸນ​ໂຮມ ພົມ​ມະ​ສານ ເຈົ້າ­ເມືອງ​ສະ­ໜາມ​ໄຊ ໂດຍມີ​ຄະ­ນະ​ນຳ​ແຂວງ​ອັດ​ຕະ​ປື ເມືອງ​ສະ­ໜາມ​ໄຊ ແລະ ພີ່­ນ້ອງ​ລູກ​ຫຼານ​ເຂົ້າ​ຮ່ວມ ໂອ­ກາດ​ນີ້ ທ່ານ​ນາງ ຄຳເມິງ ວໍ­ລະ​ຈິດ ໄດ້​ກ່າວ​ສະ­ແດງ​ຄວາມ​ເຫັນ​ອົກ​ເຫັນ­ໃຈ​ຕໍ່​ພໍ່​ແມ່​ປະ­ຊາ­ຊົນ ແລະ ລູກ​ຫຼານ​ຊາວ​ເມືອງ​ສະ­ໜາມ​ໄຊ ທີ່​ຖືກ​ໄພ­ພິ­ບັດ​ນ້ຳ​ຖ້ວມ​ຢ່າງ​ຮ້າຍ​ໃນ​ຄັ້ງ​ນີ້ ແລະ ຂໍ​ສະ­ແດງ​ຄວາມ​ເສຍ​ໃຈ ຂໍ​ແບ່ງ​ເບົາ​ຄວາມ­ທຸກ​ໂສກ​ນຳພໍ່​ແມ່​ປະ­ຊາ­ຊົນ​ທຸກ​ຄອບ­ຄົວ ແລະ ຂໍ​ເປັນ​ກຳ­ລັງ​ໃຈ​ໃຫ້​ພີ່­ນ້ອງ​ປະ­ຊາ­ຊົນ​ທີ່​ປະ­ສົບ​ໄພ ​ຈົ່ງ​ຜ່ານ​ພົ້ນ​ຄວາມ​ເສົ້າໂສກ​ຄັ້ງ​ນີ້​ໄປ​ໂດຍ​ໄວ.

    ຈາກ​ນັ້ນ ທ່ານ ບຸນ​ໂຮມ ພົມ​ມະ​ສານ ເຈົ້າ­ເມືອງ​ສະ­ໜາມ​ໄຊ ກໍ່​ໄດ້​ກ່າວ​ສະ­ແດງ​ຄວາມ​ຂອບ­ໃຈ ແລະ ຮັບ​ຮູ້​ບຸນ­ຄຸນ​ເປັນ​ຢ່າງ​ສູງ​ຕໍ່​ທ່ານ​ນາງ ຄຳ​ເມິງ ແລະ ຄອບ­ຄົວ​ລູກ​ຫຼານ​ທີ່​ມີ​ນ້ຳ­ໃຈ​ສູງ​ສົ່ງ ມີ​ຄວາມ​ເຫັນ​ອົກ​ເຫັນໃຈ​ຕໍ່​ພໍ່​ແມ່​ປະ­ຊາ­ຊົນ​ຊາວ​ແຂວງ​ອັດ​ຕະ​ປື ກໍ່​ຄື ປະ­ຊາ­ຊົນ​ເມືອງ​ສະ­ໜາມ​ໄຊ ຜູ້​ປະ­ສົບ​ໄພ­ພິ­ບັດ​ນ້ຳ​ຖ້ວມ​ໃນຄັ້ງ​ນີ້ ແລະ ຢືນ­ຢັນ​ຈະ​ນຳ​ເອົາ​ວັດ­ຖຸ​ສິ່ງ​ຂອງ​ຕ່າງໆ ແລະ ເງິນ​ຊ່ວຍ­ເຫຼືອ​ໄປ​ມອບ​ໃຫ້​ປະ­ຊາ­ຊົນ​ຜູ້​ປະ­ສົບ​ໄພຢ່າງ​ທົ່ວ​ເຖິງ​ກັນ.

ຂ່າວທີ່ກ່ຽວຂ້ອງ