ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 14/08/2018

190 14 ສ.ຫ. 2018 ຫົວຂໍ້ຂ່າວອື່ນໆ

    ມື້­ນີ້​ທ່ານ​ຜູ້​ອ່ານ​ຈະ​ໄດ້​ຮູ້​ກ່ຽວ​ກັບ​ປະ­ເພ­ນີ​ລ້າ​ຫຼັງ ​ທີ່​ຈຳ­ແນກ​ເພດ​ຍິງ ໃນ​ເນ​ປານ ເລື່ອງ​ໂປ​ໂລຍ (ໂປ​ແລນ) ປັບ​ຫຼັກ​ເກນ​ອາ­ຍຸ​ບຳ­ນານ ແລະ ເລື່ອງ​ການ​ເປີດ​ຮັບ​ຂໍ້​ຂ້ອງ​ໃຈ​ຂອງ​ປະ­ຊາ­ຊົນ ຢູ່ ມຽນ​ມາ.

    ທີ່ ເນ​ປານ: ໃນ​ຕົ້ນ​ເດືອນ​ສິງ­ຫາ ປີ 2017 ລັດ​ຖະ​ສະ­ພາປະເທດ​ເນ​ປານ ໄດ້​ອອກ​ກົດ­ໝາຍ​ລຶ­ບລ້າງ​ປະ­ເພ­ນີ​ລ້າ​ຫຼັງ​ ຕາມຄວາມ​ເຊື່ອ​ໃນ​ສາ­ສະ­ໜາ​ຮິນ​ດູ ເຊິ່ງ​ປະ­ຕິ­ບັດ​ມາ​ເປັນ​ເວ­ລາຫຼາຍ​ສະ­ຕະ­ວັດ ປະ­ເພ­ນີ​ທີ່​ລ້າ​ຫຼັງ​ທີ່​ເອີ້ນ​ກັນ​ວ່າ: ຈາວ​ປາ​ດີ (Chhaupadi) ນັ້ນ ບັງ­ຄັບ​ໃຫ້​ແມ່­ຍິງ​ທີ່­ຢູ່​ໃນ​ໄລ­ຍະ​ເປັນ​ປະ­ຈຳ​ເດືອນ ຫຼື ຫຼັງ​ເກີດ​ລູກ​ໜີ​ອອກ​ຈາກ​ເຮືອນ ໄປ​ອາ­ໄສ ແລະ ນອນຢູ່​ຄອກ​ງົວ ຈົນ​ໝົດ​ກຳ­ນົດ​ຈຶ່ງ​ສາມາດ​ກັບ​ຄືນ​ເຮືອນ​ຢູ່​ນຳ​ຄອບ­ຄົວ ປະ­ເພ­ນີ​ຈຳ­ແນກ ແລະ ບີບ­ບີ້​ນີ້ ໄດ້​ເຮັດ​ໃຫ້​ແມ່­ຍິງ​ເນ​ປານ ຖືກ​ລວນ​ລາມ​ທາງ​ເພດ ເຈັບ​ປ່ວຍ​ລົ້ມ​ຕາຍ​ເປັນ​ຈຳ­ນວນ​ຫຼວງ­ຫຼາຍ ຕົວ­ຢ່າງ ໃນ​ເດືອນ​ກໍ­ລະ­ກົດ ປີ 2017 ຍິງ​ສາວ​ຄົນ​ໜຶ່ງ​ຖືກ​ງູ​ພິດ​ກັດ​ຕາຍ​ເວ­ລາ​ນອນ​ຢູ່​ຄອກ​ງົວ ແລະ ໃນ​ປີ 2016 ແມ່­ຍິງ​ສອງ​ຄົນ​ກໍ່​ເສຍ​ຊີ­ວິດ​ຍ້ອນ​ສາ­ເຫດ​ດຽວ​ກັນ ເມື່ອ 10 ປີ­ຜ່ານ­ມາ ສານ​ສູງ​ຂອງ​ເນ​ປານ ກໍ່​ໄດ້​ອອກ​ຄຳ​ສັ່ງ​ຍົກ­ເລີກ​ປະ­ເພ­ນີ ຈາວ​ປາ​ດີ ແຕ່​ກໍ່​ບໍ່​ມີ​ຜົນ​ສັກ­ສິດ​ໃນ​ທາງ​ປະ­ຕິ­ບັດ ດັ່ງ­ນັ້ນ ລັດ​ຖະ​ສະ­ພາ​ຈຶ່ງ​ໄດ້​ຮັບ­ຮອງ​ເອົາ​ກົດ­ໝາຍ​ລຶ­ບລ້າງ​ປະ­ເພ­ນີ​ດັ່ງ­ກ່າວ ໂດຍ​ໄດ້​ກຳ­ນົດ​ໂທດ​ທາງ​ອາ­ຍາ​ຕໍ່​ຜູ້​ທີ່​ບັງ­ຄັບ​ໃຫ້​ແມ່­ຍິງ​ໄປ​ນອນ​ຢູ່​ຄອກ​ງົວ ເວ­ລາ​ເປັນ​ປະ­ຈຳ​ເດືອນ ແລະ ເກີດ​ລູກ ຜູ້​ລະ­ເມີດ​ຈະ​ໄດ້​ຮັບ​ໂທດ​ຕິດ​ຄຸກເປັນ​ເວ­ລາ 3 ເດືອນ ແລະ ຖືກ​ປັບ​ໃໝ​ເປັນ​ເງິນ 3.000 ຣູ​ປີ ເນ​ປານ ຫຼື ທັງ​ຕິດ​ຄຸກ ທັງ​ຖືກ​ປັບ​ໃໝ ກົດ­ໝາຍ​ໄດ້​ກຳ­ນົດ​ແຈ້ງ­ວ່າ: “ແມ່­ຍິງ​ຈະ​ບໍ່​ຖືກ​ບັງ­ຄັບ​ໃຫ້​ປະ­ຕິ­ບັດ​ປະ­ເພ­ນີ ຈາວ​ປາ​ດີ ຫຼື ຖືກ​ຈຳ­ແນກ​ດ້ວຍ​ຮູບ​ການ​ໃດ​ໜຶ່ງ”.

    ທີ່ ໂປ​ໂລຍ (ໂປ​ແລນ): ໃນ​ຂະ­ນະ​ທີ່​ຫຼາຍໆ​ປະ­ເທດຢູ່ເອີ​ຣົບ ແລະ ອາ­ຊີ​ຕາ­ເວັນ​ອອກ ໄດ້​ປັບ​ຂຶ້ນ​ອາ​ຍະ​ໄວ​ເຂົ້າ​ບຳ­ນານ ຍ້ອນ​ບັນ­ຫາ​ຄົນ​ອາ­ຍຸ​ສູງ​ເພີ່ມ​ຂຶ້ນ ເຮັດ​ໃຫ້​ຂາດ​ແຮງ​ງານ ແລະ ຍ້ອນ​ຄົນ​ມີ​ອາ­ຍຸ​ຍືນ​ຂຶ້ນ ແຕ່​ສຳ­ລັບ​ຢູ່​ໂປ​ໂລຍ ຜັດ​ເຮັດ​ແນວ​ກົງ­ກັນ­ຂ້າມ ຄື ໄດ້​ຫຼຸດ​ອາ­ຍຸ​ໄວ​ບຳ­ນານ​ລົງ ຜູ້​ຊາຍ​ຫຼຸດ​ຈາກ 67 ປີ ເປັນ 65 ປີ ແມ່­ຍິງ​ຈາກ 65 ປີ ເປັນ 60 ປີ ນະ­ໂຍ­ບາຍ​ປັບ​ລົງ​ອາ­ຍຸ​ບຳ­ນານ​ນີ້ ໄດ້​ຮັບ​ການ​ສະ­ໜັບ­ສະ­ໜູນ​ຈາກ​ປະ­ຊາ­ຊົນເປັນ​ຈຳ­ນວນ​ຫຼວງ­ຫຼາຍ ສ່ວນ​ກຸ່ມ​ທຸ­ລະ​ກິດ​ນັ້ນ ໄດ້​ອອກສຽງ​ຄັດ­ຄ້ານ ໂດຍ​ອ້າງ​ວ່າ: ນະໂຍ​ບາຍ​ນີ້ ຈະ​ສົ່ງ​ຜົນ​ກະ­ທົບ​ຕໍ່​ເສດຖະ​ກິດ​ຂອງ​ປະ­ເທດ​ທີ່​ພວມ​ຂະຫຍາຍ​ຕົວ ຈະ​ສ້າງ​ແຮງ​ກົດ​ດັນ​ຕໍ່​ງົບ­ປະ­ມານ​ຂອງ​ລັດ ແລະ ຄ່າ​ແຮງ​ງານລັດ­ຖະ­ບານ ໂປ​ໂລຍ ໄດ້​ປະ​ເມີນ​ຄ່າ​ໃຊ້​ຈ່າຍ​ໃນ​ການຫຼຸດ​ເກນ​ອາ­ຍຸ​ບຳ­ນານ​ວ່າ ຈະ​ຕົກ​ຢູ່​ປະ­ມານ 10 ພັນ​ລ້ານ​ຊະ​ໂລ​ຕີ (ສະ­ກຸນ​ເງິນ​ໂປ​ໂລຍ 1 ຊະ​ໂລ​ຕີ ເທົ່າ​ກັບ​ເງິນ​ລາວ 2.300 ກີບ).

    ທີ່ ມຽນ​ມາ: ໃນ​ປັດ­ຈຸ­ບັນ​ການ ສ້າງ­ຕັ້ງ​ລະ­ບົບ​ສາຍ​ດ່ວນ ເພື່ອຮັບ​ຄຳ​ຮ້ອງ­ທຸກ​ຄວາມ​ຂັດ­ຂ້ອງໝອງ​ໃຈ​ຂອງ​ປະ­ຊາ­ຊົນ ​ຕໍ່​ກັບການ​ບໍ­ລິ­ຫານ​ບ້ານ​ເມືອງ ໂດຍ​ພະ­ນັກ­ງານ ແລະ ໜ່ວຍ​ງານ​ຕ່າງໆ​ຂອງ​ລັດ​ນັ້ນ ໄດ້​ກາຍເປັນ​ກະ­ແສ​ນິ­ຍົມ​ໃນ​ປະ­ເທດ​ຕ່າງໆ ທີ່​ຕ້ອງ­ການ​ຄວາມ​ໂປ່ງ​ໃສ ຄວາມ​ຮັບ­ຜິດ­ຊອບ ແລະ ປະ­ສິດ­ທິ­ພາບ​ໃນ​ການ​ຄຸ້ມ​ຄອງ​ລັດ ຄຸ້ມ​ຄອງ​ສັງ­ຄົມ ຢູ່​ມຽນ​ມາ ກະ­ຊວງ​ປະ­ຈຳ​ຫ້ອງ­ການທີ່​ປຶກສາ​ແຫ່ງ​ລັດ​ ໄດ້​ປະ­ກາດ​ຮັບ­ຮອງ​ເອົາ​ບັນ­ຫາ​ຂັດ­ຂ້ອງ​ໝອງ​ໃຈ​ຂອງ​ພົນ­ລະ­ເມືອງ ນັບ​ແຕ່​ຕົ້ນ​ເດືອນ​ພະ­ຈິກ ປີ 2016 ເປັນ­ຕົ້ນ​ມາ ໂດຍ​ເນັ້ນ​ເລື່ອງ​ຄວາມ​ຂັດຂ້ອງ​ໝອງ​ໃຈກ່ຽວ​ກັບ​ການ​ຮັບ​ສິນ​ບົນ ແລະ ບັນ­ຫາ​ສໍ້​ລາດ​ບັງຫຼວງ ໃນ​ໝູ່​ພະ­ນັກ­ງານ​ຂອງລັດ ເອ­ກະ­ສານ​ແຈ້ງ​ການ​ກ່ຽວກັບ​ບັນ­ຫາ​ນີ້​ເວົ້າວ່າ: ພົນ​ລະເມືອງ​ທຸກ​ຄົນ​ມີ​ສິດສະ­ເໜີ​ຄວາມ​ຂ້ອງ​ໃຈ​ທາງ​ຈົດ­ໝາຍ ແລະ ອີ​ເມວ ສົ່ງ​ຜ່ານ​ທ່ານ​ຮອງ​ລັດ­ຖະ­ມົນ­ຕີ​ກະ­ຊວງ​ປະ­ຈຳ​ຫ້ອງ­ການ​ທີ່​ປຶກ­ສາ​ແຫ່ງ​ລັດ ບັນ­ຫາ​ຂ້ອງ​ໃຈ​ກ່ຽວ​ກັບ​ສິນ​ບົນ ແລະ ການ​ສໍ້​ລາດ​ຫຼວງ​ຈະ​ຮັບ​ບຸ­ລິ­ມະ­ສິດ​ໃນ​ການ​ພິ­ຈາ­ລະ­ນາ ແລະ ທາງ​ກະ­ຊວງ​ຮັບ­ປະ­ກັນ​ຮັກ­ສາ​ຄວາມ​ລັບ​ຂອງເຈົ້າ​ຂອງ​ບັນ­ຫາ ພ້ອມ​ດຽວ​ກັນ ທາງ​ກະ­ຊວງ​ກໍ່​ໄດ້​ຮຽກ­ຮ້ອງ​ບໍ່​ໃຫ້​ສະເໜີ​ບັນ­ຫາ​ທີ່​ໄດ້​ຟ້ອງ​ຂຶ້ນ​ສານ​ແລ້ວ ແລະ ຄະ­ດີ​ທີ່​ພວມ​ໄດ້​ຮັບ​ການ​ພິ­ຈາ­ລະ­ນາ​ຢູ່.

ຂ່າວທີ່ກ່ຽວຂ້ອງ