ຂ່າວຫຼ້າສຸດ

ລາວລ້ານຊ້າງ ຄອງເຈົ້າຫຼຽນຄຳ ເທຄວັນໂດ ຊີງຂັນເຈົ້າຄອງ

196 14 ສ.ຫ. 2018 ວົງຈອນກີລາ
ລາວລ້ານຊ້າງ ຄອງເຈົ້າຫຼຽນຄຳ ເທຄວັນໂດ ຊີງຂັນເຈົ້າຄອງ

    ການ​ແຂ່ງ­ຂັນ​ກິ­ລາ​ເທ​ຄວັນ​ໂດ ທົ່ວ​ນະ­ຄອນ­ຫຼວງ​ວຽງ​ຈັນ (ນວ) ຊີງ​ຂັນ​ທ່ານ​ເຈົ້າ​ຄອງ ນວ ປະ­ຈຳ​ປີ 2018 ຈັດ​ຂຶ້ນ​ວັນ​ທີ 11 ສິງ­ຫາ 2018 ຢູ່​ສູນ​ກີ­ລາ​ບຶງ​ຂະ​ຫຍອງ ໂດຍ​ມີ​ທ່ານ ສົມ​ພູ ພົງ­ສາ ຜູ້​ຊ່ວຍ​ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ ທ່ານ ຊົມ​ພູ ແກ້ວ​ປັນ­ຍາ ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ທ່ານ ຈິນ​ຮັນ ໂອ ຜູ້​ຊ່ຽວ­ຊານ​ກີ­ລາ​ເທ​ຄວັນ​ໂດ ສ ເກົາ­ຫຼີ ຜູ້​ສະ­ໜັບ­ສະ­ໜູນ​ຫຼັກ ພ້ອມ​ດ້ວຍ​ຄະ­ນະ​ນຳ ແລະ ນັກ­ກີ­ລາ​ເຂົ້າ​ຮ່ວມ.

    ການ​ແຂ່ງ­ຂັນ​ຄັ້ງ​ນີ້ ເພື່ອ​ເປັນ​ການ​ສ້າງ​ຂະ​ບວນ​ການ​ຄຳ­ນັບ​ຮັບ​ຕ້ອນ ວັນ​ລັດ​ຖະ​ທຳ​ມະ­ນູນ​ແຫ່ງ​ຊາດ ຄົບ­ຮອບ 27 ປີ ແລະ ວັນ​ຍຶດ​ອຳ­ນາດ ຄົບ­ຮອບ 43 ປີ ທັງ​ເປັນ​ການ​ກຽມ​ຄວາມ​ພ້ອມ​ໃຫ້​ທີມ​ນັກ­ກີ­ລາ​ເທ​ຄວັນ​ໂດ ນວ ໃນ​ການ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ 11 ຢູ່​ແຂວງ​ຊຽງ​ຂວາງ ໃນ​ທ້າຍ​ປີ​ນີ້ ສຳ­ລັບ​ການ​ແຂ່ງ­ຂັນ​ລາຍ­ການ​ນີ້​ມີ 18 ພາກ­ສ່ວນ 54 ລາຍ­ການ ໃນ​ຮຸ່ນ​ເຍົາ­ວະ​ຊົນ ໃນ​ນີ້ ປະ­ເພດ​ຟ້ອນ​ປຸ້ມ​ເຊ້ ມີ 3 ຮຸ່ນ ຄື: ຮຸ່ນ​ອາ­ຍຸ​ບໍ່​ເກີນ 12 ປີ 15 ປີ ແລະ 17 ປີ ສ່ວນ​ປະ­ເພດ​ຕໍ່­ສູ້​ປ້ອງ​ກັນ​ຕົວ ມີ 4 ຮຸ່ນ ປະ­ກອບ​ມີ​ຮຸ່ນ​ອາ­ຍຸ​ບໍ່​ເກີນ 10 ປີ 12 ປີ 15 ປີ ແລະ 17 ປີ.

    ຜ່ານ​ການ​ແຂ່ງ­ຂັນ ອັນ​ດັບ 1 ແມ່ນ​ສະ­ໂມ­ສອນ​ເທ​ຄວັນ​ໂດ​ລາວ​ລ້ານ​ຊ້າງ ຍາດ​ໄດ້ 13 ຫຼຽນ​ຄຳ 5 ຫຼຽນ​ເງິນ ແລະ 7 ຫຼຽນ​ທອງ ອັນ​ດັບ 2 ສະ­ໂມ­ສອນ​ມາ​ສ​ເຕີ​ເລ້ 13 ຫຼຽນ​ຄຳ 5 ຫຼຽນ​ເງິນ ແລະ 4 ຫຼຽນ​ທອງ ອັນ​ດັບ 3 ສະ­ໂມ­ສອນ​ຕະ​ວັນ 6 ຫຼຽນ​ຄຳ 10 ຫຼຽນ​ເງິນ 9 ຫຼຽນ​ທອງ ອັນ​ດັບ 4 ສະ­ໂມ­ສອນ​ເສືອ​ນ້ອຍ 5 ຫຼຽນ​ຄຳ 5 ຫຼຽນ​ເງິນ ແລະ 9 ຫຼຽນ​ທອງ ອັນ​ດັບ 5 ສະ­ໂມ­ສອນ​ກະ­ຊວງ​ປ້ອງ​ກັນ​ປະ­ເທດ 4 ຫຼຽນ​ຄຳ 5 ຫຼຽນ​ເງິນ ແລະ 4 ຫຼຽນ​ທອງ.

ຂ່າວທີ່ກ່ຽວຂ້ອງ