ຂ່າວ​ສັ້ນ

227 14 ສ.ຫ. 2018 ຂ່າວຕ່າງປະເທດ
ຂ່າວ​ສັ້ນ

    ເປ​ຣູ - ອຸບັດເຫດ: ທາງ​ການ​ຕຳຫຼວດ​ເປ​ຣູ ແຈ້ງ​ໃຫ້​ຮູ້​ວ່າ ມີ​ຜູ້​ເສຍ​ຊີວິດ​ຢ່າງ​ໜ້ອຍ 15 ຄົນ ແລະ​ບາດເຈັບ​ອີກ​ຫຼາຍ​ຄົນ ເມື່ອ​ລົດ​ບັດ​ຄັນ​ໜຶ່ງ ແລ່ນ​ພຸ່ງ​ລົງ​ເຫວ​ເລິກ​ປະມານ 100 ແມັດ ຢູ່​ໃນ​ເຂດ ອານ​ກາ​​ສ (ພາກ​ຕາເວັນຕົກ​ປະເທດ​ເປ​ຣູ) ຊຶ່ງ​ເກີດ​ຂຶ້ນ​ເມື່ອ​ວັນ​ທີ 12 ສິງຫາ​ນີ້.

    ຢ້ອນ​ຄືນ​ຫຼັງ ເມື່ອ​ເດືອນ​ມັງກອນ 2018 ກໍ​ມີ​ຜູ້​ເສຍ​ຊີວິດ 48 ຈາກ​ອຸບັດເຫດ​ທີ່​ລົດ​ບັດ​ໂດຍສານ​ຄັນ ​ໜຶ່ງຕຳ​ກັບ​ລົດ​ຂົນສົ່ງ​ອີກ​ຄັນ​ໜຶ່ງ ແລະ​ຕົກລົງ​ຈາກ​ແທ່ນ​ຫີນ ໃນ​ເຂດ​ແຄມ​ຝັ່ງ​ທະເລ ໃນ​ປະເທດ​ເປ​ຣູ. ໃນ​ຂະນະ​ດຽວ​ກັນ ຕົວ​ເລກ​ຢ່າງ​ເປັນ​ທາງ​ການ ໃຫ້​ຮູ້​ວ່າ ໃນ​ປີ 2016 ຢູ່​ໃນ​ເປ​ຣູ ມີ​ຜູ້​ເສຍ​ຊີວິດ​ຈາກ​ອຸບັດເຫດ​ການ​ຄົມມະນາຄົມ​ທາງບົກ ປະມານ 2.600 ຄົນ.

    ໄຕ້​ຫວັນ (ຈີນ) - ອັກຄີ​ໄພ: ເຈົ້າ​ໜ້າທີ່​ໄຕ້​ຫວັນ (ຈີນ) ແຈ້ງ​ໃຫ້​ຮູ້​ໃນ​ຕອນ​ເຊົ້າ​ຂອງ​ວັນ​ທີ 13 ສິງຫາ​ນີ້​ວ່າ ໄດ້​ເກີດ​ໄຟ​ໄໝ້​ຢູ່​ໃນ​ໂຮງໝໍ​ແຫ່ງ​ໜຶ່ງ ຢູ່​ໃນ​ພື້ນ​ທີ່​ນະຄອນ​ໄທ​ເປ​ໃໝ່. ລາຍ​ງານ​ເບື້ອງ​ຕົ້ນ​ໃຫ້​ຮູ້​ວ່າ ຕົ້ນ​ໄຟ​ເກີດ​ຂຶ້ນ​ຈາກ​ຫ້ອງ​ຄົນ​ເຈັບ​ຢູ່​ເທິງ​ຊັ້ນ​ທີ 7 ຂອງ​ໂຮ​ໝໍ ຊຶ່ງ​ໃນ​ເວລາ​ເກີດ​ໄຟ​ໄໝ້​ນັ້ນ ມີ​ຄົນ​ເຈັບ​ທັງ​ໝົດ 32 ຄົນ​ຢູ່​ໃນ​ຊັ້ນ​ທີ 7. ເບື້ອງ​ຕົ້ນ ພະນັກງານ​ມອດ​ໄຟ ໄດ້​ຄົ້ນ​ພົບ 16 ຄົນ ທີ່​ຍັງ​ມີ​ຊີວິດ ຢູ່​ໃນ​ຈຸດ​ທີ່​ເກີດ​ໄຟ​ໄໝ້ ແຕ່​ບໍ່​ປະກົດ​ເຫັນ​ການ​ມີ​ຊີວິດ​ລອດ​ຕື່ມ​ອີກ.

    ຈີນ - ເຫດການ​ແຜ່ນດິນ​ໄຫວ: ສູນ​ເຄືອ​ຂ່າຍ​ແຜ່ນດິນ​ໄຫວ​ຂອງ​ຈີນ ແຈ້ງ​ໃຫ້​ຮູ້​ວ່າ ໄດ້​ເກີດ​ເຫດການ​ແຜ່ນດິນ​ໄຫວ ແທກ​ຄວາມ​ແຮງ​ສັ່ນ​ສະເທືອນ​ໄດ້ 5 ອົງສາ​ຣິກ​ເຕີ ຢູ່​ໃນ​ພື້ນ​ທີ່​ແຂວງ​ຢຸນ​ນ່ານ ຂອງ​ຈີນ ຊຶ່ງ​ເກີດ​ຂຶ້ນ​ໃນ​ຕອນ​ເຊົ້າ​ຂອງ​ວັນ​ທີ 13 ສິງຫາ​ນີ້ ແລະ ໃນ​ເວລາ​ຕໍ່​ມາ ກໍ​ໄດ້​ສືບຕໍ່​ເກີດ​ເຫດການ​ແຜ່ນດິນ​ໄຫວ​ຕາມ​ມາ​ອີກ 2 ເທື່ອ ຢູ່​ໃນ​ຈຸດ​ດຽວ​ກັນ.

 

ຂ່າວທີ່ກ່ຽວຂ້ອງ