ສ ເກົາຫຼີ ແລະ ​ສປປ ເກົາຫຼີ ເຈລະຈາ​ລະດັບ​ອາວຸໂສ​ເພື່ອ​ກະກຽມ​ໃຫ້​ແກ່​ການ​ພົບ​ປະ​ສຸດ​ຍອດ​ຄັ້ງ​ທີ 3

105 14 ສ.ຫ. 2018 ຂ່າວຕ່າງປະເທດ
ສ ເກົາຫຼີ ແລະ ​ສປປ ເກົາຫຼີ ເຈລະຈາ​ລະດັບ​ອາວຸໂສ​ເພື່ອ​ກະກຽມ​ໃຫ້​ແກ່​ການ​ພົບ​ປະ​ສຸດ​ຍອດ​ຄັ້ງ​ທີ 3

     ຂ່າວສານ AFP ລາຍ​ງານ​ວ່າ ຜູ້​ແທນ​ຈາກ ສ ເກົາຫຼີ ແລະ ​ສປປ ເກົາຫຼີ ໄດ້​ຈັດ​ຕັ້ງ​ການ​ເຈລະຈາ​ລະດັບ​ອາວຸໂສ ໃນ​ວັນ​ທີ 13 ສິງຫາ​ນີ້ ທີ່​ບ້ານ​ສະຫງົບ​ເສິກ ປານ​ມູນ​ຈອມ ທີ່ຢູ່​ໃນ​ເບື້ອງ​ຂອງ ​ສປປ ເກົາຫຼີ ທັງ​ນີ້​ກໍ​ເພື່ອ​ເປັນ​ການ​ກະກຽມ​ໃຫ້​ແກ່​ການ​ປະຊຸມ​ສຸດ​ຍອດ​ຄັ້ງ​ທີ 3 ລະຫວ່າງ​ປະທານາທິບໍດີ ສ ເກົາຫຼີ ມູນ​ເຈ​ອິນ ກັບ​ທ່ານ ກິງ​ເຈິງ​ອູນ ຜູ້ນຳ​ຂອງ ​ສປປ ເກົາຫຼີ.

   ທ່ານ ໂຈ ມຽງ ກີ​ຢອນ ລັດຖະມົນຕີ​ກະຊວງ​ລວມ​ຊາດ​ຂອງ ສ ເກົາຫຼີ ທີ່​ເປັນ​ຫົວໜ້າ​ຄະນະ​ຜູ້​ແທນ​ຂອງ ສ ເກົາຫຼີ ກ່າວ​ຕໍ່​ສື່​ມວນ​ຊົນ​ກ່ອນ​ການ​ປະຊຸມ​ວ່າ ໃນ​ການ​ປະຊຸມ​ນີ້ ຈະ​ໄດ້​ມີ​ການ​ຕີ​ລາຄາ​ເບິ່ງ​ຄວາມ​ຄືບ​ໜ້າ​ທັງ​ໝົດ ໃນ​ການ​ປະຕິບັດ​ຕາມ​ຖະແຫຼງການ ປານ​ມູນ​ຈອມ ພ້ອມ​ກັນ​ນັ້ນ​ກໍ​ປຶກສາ​ຫາລື​ເຖິງ​ບາດກ້າວ​ຕໍ່​ໄປ.

    ໃນ​ຂະນະ​ດຽວ​ກັນ ຂ່າວສານ​ຢອນ​ຮັບ ອ້າງ​ຕາມ​ແຫຼ່ງ​ຂ່າວ​ທີ່​ໜ້າ​ເຊື່ອ​ຖື ໃຫ້​ຮູ້​ວ່າ ສ ເກົາຫຼີ ແລະ ​ສປປ ເກົາຫຼີ ໄດ້​ເຫັນ​ດີ​ນຳ​ກັນ​ຢ່າງ​ບໍ່​ເປັນ​ທາງ​ການ ວ່າ​ກອງ​ປະຊຸມ​ສຸດ​ຍອດ​ເທື່ອ​ທີ 3 ນັ້ນ​ຈະ​ມີ​ຂຶ້ນ​ທີ່​ນະຄອນຫຼວງ​ພຽງ​ຢາງ ຂອງ ​ສປປ ເກົາຫຼີ ໃນ​ທ້າຍ​ເດືອນ​ສິງຫາ​ນີ້ ຫຼື​ບໍ່​ກໍ​ໃນ​ຕົ້ນ​ເດືອນ​ກັນຍາ​ໜ້າ​ນີ້.

 

ຂ່າວທີ່ກ່ຽວຂ້ອງ