ສ ອາ​ເມ​ຣິ​ກາ ງົດ​ໂຄງການ​ຝຶກ​ຊ້ອມ​ດ້ານ​ການ​ທະຫານ​ກັບ​ປາ​ກິດ​ສະຖານ

69 14 ສ.ຫ. 2018 ຂ່າວຕ່າງປະເທດ
ສ ອາ​ເມ​ຣິ​ກາ ງົດ​ໂຄງການ​ຝຶກ​ຊ້ອມ​ດ້ານ​ການ​ທະຫານ​ກັບ​ປາ​ກິດ​ສະຖານ

     ຂ່າວສານ PTI ລາຍ​ງານ​ເມື່ອ​ວັນ​ທີ 11 ສິງຫາ​ທີ່​ຜ່ານ​ມາ​ວ່າ ອຳນາດ​ການ​ປົກຄອງ​ຂອງ​ປະທານາທິບໍດີ ສ ອາ​ເມ​ຣິ​ກາ ໂດ​ນາ​​ລ ທຣຳ ໄດ້​ງົດ​ໂຄງການ​ຝຶກ​ຊ້ອມ​ດ້ານ​ການ​ທະຫານ ທີ່​ແກ່ຍາວ​ມາ​ກວ່າ 1 ທົດ​ສະ​ວັດ ໃຫ້​ແກ່​ກອງທັບ​ປາ​ກິດ​ສະຖານ ຢູ່​ໃນ​ຮາກ​ຖານ​ຕ່າງໆ​ຂອງ ສ ອາ​ເມ​ຣິ​ກາ ຊຶ່ງ​ການ​ງົດ​ດັ່ງກ່າວ ມີ​ຂຶ້ນ​ບໍ່​ພໍ​ເທົ່າໃດ​ມື້ ຫຼັງ​ຈາກ​ທີ່​ປາ​ກິດ​ສະຖານ ແລະ ​ຣັດ​ເຊຍ ລົງ​ນາມ​ຂໍ້​ຕົກລົງ​ສະບັບ​ໜຶ່ງ ກ່ຽວ​ກັບ​ການ​ອະນຸຍາດ​ໃຫ້​ພົນທະຫານ​ຂອງ​ປາ​ກິດ​ສະຖານ ສາມາດ​ບຳລຸງ​ສ້າງ​ຢູ່​ໃນ​ສູນ​ປ້ອງ​ກັນ​ຊາດ​ແຫ່ງ​ຕ່າງ​ຂອງ​ຣັດ​ເຊຍ.

    ກ່ອນ​ໜ້າ​ນັ້ນ ເມື່ອ​ວັນ​ທີ 7 ສິງຫາ​ທີ່​ຜ່ານ​ມາ ປາ​ກິດ​ສະຖານ ແລະ​ຣັດ​ເຊຍ ໄດ້​ລົງ​ນາມ​ຂໍ້​ຕົກລົງ​ສະບັບ​ໜຶ່ງ ຢູ່​ໃນ​ກອງ​ປະຊຸມ​ທາບ​ທາມ​ດ້ານ​ການ​ທະຫານ​ປະສົມ​ເປັນ​ເທື່ອ​ທຳ​ອິດ ຊຶ່ງ​ຈັດ​ຂຶ້ນ​ທີ່​ປາ​ກິດ​ສະຖານ ໃນ​ນັ້ນ​ສອງ​ຝ່າຍ​ໄດ້​ປຶກສາ​ຫາລື ກ່ຽວ​ກັບ​ສະພາບ​ການ​ໃນ​ປັດຈຸບັນ ຂອງ​ການ​ພົວພັນ​ດ້ານ​ປ້ອງ​ກັນ​ຊາດ​ແບບ​ສອງ​ຝ່າຍ ແລະ ​ເຫັນ​ດີ​ເປັນ​ເອກະສັນ​ກັນ​ວ່າ ພົນທະຫານ​ຂອງ​ປາ​ກິດ​ສະຖານ ຈະ​ໄດ້​ບຳລຸງ​ສ້າງ​ຢູ່​ໃນ​ຮາກ​ຖານ​ການ​ຝຶກ​ຊ້ອມ​ການ​ທະຫານ​ແຫ່ງ​ຕ່າງໆ​ຂອງ​ຣັດ​ເຊຍ.

    ການ​ພົວພັນ​ລະຫວ່າງ​ປາ​ກິດ​ສະຖານ ກັບ ສ ອາ​ເມ​ຣິ​ກາ ໄດ້​ຫຼຸດ​ໜ້ອຍ​ຖອຍ​ລົງ​ມາ​ຕັ້ງແຕ່​ເດືອນ​ມັງກອນ​ປີ​ນີ້ ຫຼັງ​ຈາກ​ທີ່​ປະທານາທິບໍດີ ທຣຳ ກ່າວ​ຫາ​ປາ​ກິດ​ສະຖານ​ວ່າ ບໍ່​ໄດ້​ເຮັດ​ຫຍັງ​ໃຫ້​ແກ່ ສ ອາ​ເມ​ຣິ​ກາ ນອກ​ເໜືອ​ຈາກ “ຄຳ​ເວົ້າ​ຂີ້​ຕົວະ ແລະ​ຫຼອກ​ລວງ” ພ້ອມ​ກັນ​ນັ້ນ​ກໍ ສະໜອງ “ບ່ອນ​ລີ້​ຊ່ອນ​ທີ່​ປອດ​ໄພ” ໃຫ້​ແກ່​ພວກ​ກໍ່​ການ​ຮ້າຍ.

    ສະພາ​ແຫ່ງ​ຊາດ ສ ອາ​ເມ​ຣິ​ກາ ກໍ​ໄດ້​ຮັບຮອງ​ຮ່າງ​ກົດໝາຍ​ສະບັບ​ໜຶ່ງ ວ່າ​ດ້ວຍ​ການ​ຫຼຸດ​ການ​ຊ່ວຍເຫຼືອ​ດ້ານ​ປ້ອງ​ກັນ​ຊາດ​ໃຫ້​ແກ່​ປາ​ກິດ​ສະຖານ ລົງ​ໄປ​ຍັງ​ເຫຼືອ​ທີ່ 150 ລ້ານ​ໂດ​ລາ​ສະຫະລັດ ເປັນ​ການ​ຕ່ຳ​ກວ່າ​ຫຼາຍ​ສົມຄວນ ເມື່ອ​ທຽບໃສ່​ລະດັບ​ກວ່າ 1 ຕື້ ໂດ​ລາ​ສະຫະລັດ ໃນ​ແຕ່​ລະ​ປີ​ນັ້ນ.

 

ຂ່າວທີ່ກ່ຽວຂ້ອງ