ສາມັນ​ຊົນ​ເສຍ​ຊີວິດ​ເກືອບ 40 ຄົນ ຈາກ​ເຫດການ​ສາງ​ອາວຸດ​ລະເບີດ​ຢູ່​ໃນ​ຊີ​ຣີ

99 14 ສ.ຫ. 2018 ຂ່າວຕ່າງປະເທດ
ສາມັນ​ຊົນ​ເສຍ​ຊີວິດ​ເກືອບ 40 ຄົນ ຈາກ​ເຫດການ​ສາງ​ອາວຸດ​ລະເບີດ​ຢູ່​ໃນ​ຊີ​ຣີ

     ຂ່າວສານ AFP ລາຍ​ງານ​ວ່າ ໄດ້​ເກີດ​ເຫດ​ລະເບີດ​ຂຶ້ນ​ເມື່ອ​ວັນ​ທີ 12 ສິງຫາ​ນີ້ ທີ່​ສາງ​ອາວຸດ​ແຫ່ງ​ໜຶ່ງ ຢູ່​ໃນ​ແຂວງ ອິດ​ລິບ (ພາກ​ຕາເວັນຕົກ​ສ່ຽງ​ເໜືອ​ປະເທດ​ຊີ​ຣີ) ເປັນ​ເຫດ​ໃຫ້​ມີ​ສາມັນ​ຊົນ​ເສຍ​ຊີວິດ 39 ຄົນ ໃນ​ນັ້ນ​ມີ​ເດັກນ້ອຍ​ລວມ​ຢູ່​ນຳ 12 ຄົນ.

    ອົງການ​ຕິດຕາມ​ສິດທິ​ມະນຸດ​ຊີ​ຣີ (SOHR) ໃຫ້​ຮູ້​ວ່າ ຈຳນວນ​ຜູ້​ເສຍ​ຊີວິດ​ໄດ້​ເພີ່ມ​ຂຶ້ນ​ອີກ ຫຼັງ​ຈາກ​ທີ່​ຮ່າງ​ຜູ້​ເສຍ​ຊີວິດ ຖືກ​ນຳ​ອອກ​ມາ​ຈາກ​ຊາກ​ຫັກ​ພັງ​ທີ່​ເກີດ​ຈາກ​ເຫດ​ລະເບີດ ຊຶ່ງ​ຍັງ​ບໍ່​ທັນ​ໄດ້​ຮັບ​ການ​ກຳນົດ​ເຖິງ​ສາເຫດ ທີ່​ໄດ້​ເກີດ​ຂຶ້ນ​ຢູ່​ໃນ​ສາງ​ເກັບ​ມ້ຽນ​ອາວຸດ ຢູ່​ໃນ​ອາຄານ​ໃນ​ເຂດ​ຊຸມ​ຊົນ ໃນ​ເມືອງ ຊາ​ມາດາ.

    ກ່ອນ​ໜ້າ​ນັ້ນ ໃນ​ວັນ​ທີ 9 ສິງຫາ ກອງ​ກຳລັງ​ຂອງ​ຝ່າຍ​ລັດຖະບານ​ຊີ​ຣີ ໄດ້​ຍິງ​ປືນ​ໃຫຍ່​ໃສ່​ທີ່​ໝັ້ນ​ຂອງ​ກອງ​ກຳລັງ​ລຸກ​ຮື​ຂຶ້ນ ແລະ​ ພວກ​ນັກຮົບ​ສັກສິດ ຢູ່​ໃນ​ແຂວງ​ອິດ​ລິບ ທ່າມກາງ​ທີ່​ທະຫານ​ກອງ​ໜູນ​ໄດ້​ໄປ​ເຖິງ​ທີ່​ນັ້ນ ຊຶ່ງ​ເບິ່ງ​ໄປ​ແລ້ວ​ກໍ​ຄ້າຍຄື​ກັບ​ວ່າ​ເປັນ​ການ​ກະກຽມ​ໃຫ້​ແກ່​ການ​ໂຈມ​ຕີ.

 

ຂ່າວທີ່ກ່ຽວຂ້ອງ