ຂ່າວຫຼ້າສຸດ

ຊີ​ເລ​ປະກາດ​ໃຊ້​ກົດໝາຍ ກ່ຽວ​ກັບ​ຄ່າ​ປັບ​ໃໝ​ໃນ​ການ​ໃຊ້​ຖົງ​ຢາງ

137 13 ສ.ຫ. 2018 ຂ່າວຕ່າງປະເທດ
ຊີ​ເລ​ປະກາດ​ໃຊ້​ກົດໝາຍ ກ່ຽວ​ກັບ​ຄ່າ​ປັບ​ໃໝ​ໃນ​ການ​ໃຊ້​ຖົງ​ຢາງ

     ເມື່ອ​ວັນ​ສຸກ​ທີ່​ຜ່ານ​ມາ ປະ​ທາ​ນາ​ທິ​ດີ​ຊີ​ເລ ເຊ​ບາ​​ສ​ຕຽນ ພີ​ເນ​ຣາ ໄດ້​ລົງ​ນາມ​ປະກາດ​ໃຊ້​ກົດໝາຍວ່າ​ດ້ວຍ​ການ​ຫ້າມ​ໃຊ້​ຖົງ​ຢາງ ຢູ່​ໃນ​ທຸກໆ​ພື້ນຖານ​ທຸລະ​ກິດ​ການ​ຄ້າ​ໃນ​ທົ່ວ​ປະເທດ ໂດຍ​ຜ່ານ​ນັ້ນ​ກໍ​ເຮັດ​ໃຫ້​ຊີ​ເລ​ເປັນ​ປະເທດ​ທຳ​ອິດ​ໃນ​ອາ​ເມ​ຣິ​ກາ ລາ​ຕິນ ທີ່​ນຳ​ໃຊ້​ນະໂຍບາຍ​ການ​ອະນຸລັກ​ສິ່ງແວດລ້ອມ​ດັ່ງກ່າວ​ຢູ່​ໃນ​ພາກ​ພື້ນ​ນີ້.

    ໃນ​ຮອບ​ເວລາ 6 ເດືອນ ນັບ​ແຕ່​ວັນ​ທີ່​ກົດໝາຍ​ດັ່ງກ່າວ​ມີ​ຜົນ​ບັງຄັບ​ໃຊ້​ເປັນຕົ້ນ​ໄປ ບັນດາ​ພື້ນຖານ​ການ​ຄ້າ​ຢູ່​ໃນ​ຊີ​ເລ ຍັງ​ຄົງ​ໄດ້​ຮັບ​ອະນຸຍາດ​ໃຊ້​ຖົງ​ຢາງ​ສູງ​ສຸດ​ທີ່ 2 ຖົງ ສຳລັບ​ລູກ​ຄ້າ​ແຕ່ລະຄົນ​ທີ່​ເຂົ້າ​ໄປ​ຊື້​ສິນຄ້າ. ຫຼັງ​ຈາກ​ກຳນົດ​ເວລາ​ດັ່ງກ່າວ​ແລ້ວ ການ​ນຳ​ໃຊ້​ຖົງ​ຢາງ​ຈະ​ຖືກ​ຫ້າມ​ຢ່າງ​ເດັດຂາດ ຢູ່​ໃນ​ຮ້ານ​ສັບພະ​ສິນຄ້າ ຮ້ານ​ຂາຍ​ຢາ ແລະ​ສູນ​ການ​ຄ້າ​ໃຫຍ່​ທຸກໆ​ແຫ່ງ.

    ໃນ​ຂະນະ​ດຽວ​ກັນ ສຳລັບ​ຮາກ​ຖານ​ການ​ຄ້າຂາຍ​ຂະໜາດ​ນ້ອຍ ຢູ່​ໃນ​ຍ່ານ​ເມືອງ​ຕ່າງໆ​ນັ້ນ ການ​ຫ້າມ​ໃຊ້​ຖົງ​ຢາງ​ຢ່າງ​ສິ້ນ​ເຊີງ ແມ່ນ​ຈະ​ໄດ້​ນຳ​ໃຊ້​ພາຍ​ໃນ​ຮອບ​ເວລາ 2 ປີ ຫຼັງ​ຈາກ​ທີ່​ກົດໝາຍ​ດັ່ງກ່າວ​ມີ​ຜົນ​ບັງຄັບ​ໃຊ້.

    ກົດໝາຍ​ໃໝ່​ດັ່ງກ່າວ ກໍ​ໄດ້​ກຳນົດ​ໄວ້​ວ່າ ຖ້າ​ຮາກ​ຖານ​ໃດ​ລະເມີດ ແມ່ນ​ຈະ​ຕ້ອງ​ໄດ້​ຈ່າຍ​ຄ່າ​ປັບ​ໃໝ 370 ໂດ​ລາ​ສະຫະລັດ ສຳລັບ​ການ​ປ່ອຍ​ຖົງ​ຢາງ​ອອກ​ໄປ​ແຕ່​ລະ​ຖົງ.

    ປະທານາທິບໍດີ ພີ​ເນ​ຣາ ກ່າວ​ຫຼັງ​ພິທີ​ລົງ​ນາມ​ປະກາດ​ໃຊ້​ກົດໝາຍ​ດັ່ງກ່າວ​ວ່າ ການ​ຜະລິດ​ຖົງ​ຢາງ​ໜຶ່ງ​ຖົງ ໃຊ້​ເວລາ​ພຽງ​ບໍ່​ເທົ່າໃດ​ວິນາທີ ແລະ ກໍ​ໄດ້​ໃຊ້​ມັນ​ພຽງ​ໃນ​ເວລາ​ທີ່​ແນ່ນອນ​ເພື່ອ​ບັນຈຸ​ສິ່ງ​ຂອງ​ທີ່​ຊື້​ຢູ່​ໃນ​​​ຮ້ານ​ສັບພະ​ສິນຄ້າ ແຕ່​ວ່າ​ຕ້ອງ​ເສຍ​ເວລາ​ໄປ​ເຖິງ 400 ປີ ຈຶ່ງ​ສາມາດ​ຍ່ອຍ​ສະຫຼາຍ​ຖົງ​ຢາງ​ນັ້ນ​ໄປ​ໄດ້.

    ອົງການ​ສິ່ງແວດລ້ອມ​ຂອງ​ສະຫະ​ປະຊາ​ຊາດ (​ສປຊ) ໃຫ້​ຮູ້​ວ່າ ອາ​ເມ​ຣິ​ກາ ລາ​ຕິນ ເປັນ​ໜຶ່ງ​ໃນ​ບັນດາ​ພາກ​ພື້ນ ທີ່​ເດີນ​ໜ້າ​ໃນ​ການ​ໃຊ້​ມາດ​ຕະການ​ຈຳກັດ​ການ​ນຳ​ໃຊ້​ຖົງ​ຢາງ. ນອກຈາກ​ຊີ​ເລ ທີ່​ໄດ້​ປະກາດ​ໃຊ້​ກົດໝາຍ​ວ່າ​ດ້ວຍ​ການ​ຫ້າມ​ໃຊ້​ຖົງ​ຢາງ​ໄປ​ແລ້ວ​ນັ້ນ ກໍ​ຍັງ​ມີ​ປະເທດ​ອື່ນໆ​ອີກ ເຊັ່ນ ໂກ​ລົມ​ບີ ອັງ​ຕີ​ກົວ​ແລະ​ບາ​ບູ​ດາ ​ກົສ​ຕາ​ຣີ​ກາ ປາ​ນາ​ມາ ບາ​ຮາ​ມາ​​ສ ແລະ ​ເບ​ລິ​​ສ ຕ່າງ​ກໍ​ໄດ້​ມີ​ມາດ​ຕະການ​ຢ່າງ​ຈິງ​ຈັງ ໃນ​ການ​ຕ້ານ​ກັບ​ການ​ໃຊ້​ຖົງ​ຢາງ.

    ສະຖິຕິ​ຂອງ ​ສປຊ ໃຫ້​ຮູ້​ວ່າ ຖົງ​ຢາງ​ປະມານ 5.000 ຕື້​ຖົງ ໄດ້​ຖືກ​ນຳ​ໃຊ້​ໃນ​ແຕ່​ລະ​ປີ ຢູ່​ໃນ​ໂລກ ແລະ ມີ​ຢາງ 13 ລ້ານ​ໂຕນ ຖືກ​ເທ​ອອກ​ສູ່​ມະຫາ​ສະໝຸດ ເຮັດ​ໃຫ້​ສິ່ງແວດລ້ອມ​ຖືກເສຍ​ຫາຍ​ຢ່າງ​ຮ້າຍ​ແຮງ.

 

ຂ່າວທີ່ກ່ຽວຂ້ອງ