ຂ່າວຫຼ້າສຸດ

ອູດ ຖືກສັງກັດຢູ່ໃນກອງກຳລັງຕຳຫຼວດເຄນຢາ

83 13 ສ.ຫ. 2018 ຂ່າວຕ່າງປະເທດ
ອູດ ຖືກສັງກັດຢູ່ໃນກອງກຳລັງຕຳຫຼວດເຄນຢາ

    ທາງການຕຳຫຼວດເຄນຢາ ແຈ້ງໃຫ້ຮູ້ເມື່ອວັນທີ 6 ສິງຫາທີ່ຜ່ານມາວ່າ ຈະໃຫ້ໂຕອູດສັງກັດຢູ່ໃນກອງກຳລັງເວນຍາມ ເພື່ອເພີ່ມທະວີກຳລັງຄວາມສາມາດ ໃນການປາບປາມກຸ່ມອາສະຍາກຳ ທີ່ນັບມື້ນັບເຄື່ອນໄຫວແຮງ ໂດຍສະເພາະແມ່ນຢູ່ໃນເຂດຫ່າງໄກຂອງເຄນຢາ.

    ແຫຼ່ງຂ່າວຈາກກົມໃຫຍ່ຕຳຫຼວດເຄນຢາ ໃຫ້ຮູ້ວ່າ ໄປພ້ອມໆກັບ “ໜ່ວຍທະຫານ” ໝາ ແລະ ມ້າ ທີ່ມີຢູ່ໃນປັດຈຸບັນແລ້ວ ອູດກໍຈະໄດ້ຮັບການຜັນຂະຫຍາຍການປະຕິບັດໜ້າທີ່ເວນຍາມຢູ່ລຽບຕາມຊາຍແດນ ທີ່ຕິດກັບ ໂຊມາລີ ຊູດານໃຕ້ ແລະອູກັນດາ ຊຶ່ງໃນຮອບສອງປີ່ຜ່ານມາ ຢູ່ໃນເຂດເຫຼົ່ານັ້ນ ມີນາຍຕຳຫຼວດເສຍຊີວິດໄປກວ່າ 70 ຄົນ ໃນຂະນະທີ່ປະທະກັບກຸ່ມອາສະຍາກຳ.

    ນອກຈາກນັ້ນແລ້ວ ດ້ວຍການທີ່ມີຄວາມສາມາດທົນທານຕໍ່ສະພາບແຫ້ງແລ້ງ ແລະຮ້ອນເອົ້ານັ້ນ ອູດຍັງຈະໄດ້ຮັບໜ້າທີ່ເວນຍາມ ແລະຕາມລ່າຈັບກຸ່ມທີ່ລັກເອົາສັດລ້ຽງ ທີ່ພວມເກີດຂຶ້ນຫຼາຍ ຢູ່ໃນເຂດຫ່າງໄກຂອງເຄນຢາ.

    ຫົວໜ້າກົມໃຫຍ່ຕຳຫຼວດເຄນຢາ ໃຫ້ຮູ້ວ່າ ໄດ້ສົ່ງຄະນະພະນັກງານໄປຍັງອິນເດຍ ເພື່ອເຂົ້າຮ່ວມຊຸດບຳລຸງວິຊາການທີ່ເວນຍາມດ້ວຍອູດ. ໃນຂະນະດຽວກັນ ຫຼັງຈາກທີ່ໄດ້ຄັດເລືອກຢ່າງລະອຽດແລ້ວ ອູດຊຸດທຳອິດ 50 ໂຕ ໃນເວລານີ້ພວມໄດ້ຮັບການຝຶກຊ້ອມຢູ່ໃນຄ້າຍແຫ່ງໜຶ່ງ ຢູ່ໃນລັດ ອີຊີໂອໂລ ຫ່າງຈາກນະຄອນຫຼວງ ໄນໂຣບີ 250ກມ ໄປທາງທິດເໜືອ.

    ຕົວເລກໃໝ່ຫຼ້າສຸດຈາກຕຳຫຼວດເຄນຢາ ໃຫ້ຮູ້ວ່າ ສະເພາະແຕ່ໃນໄຕມາດທີ I ຂອງປີ 2018 ນີ້ ມີກວ່າ 20.000 ເຫດການທີ່ພົວພັນເຖິງອາສະຍາກຳ ໄດ້ເກີດຂຶ້ນຢູ່ໃນເຄນຢາ ຊຶ່ງລວມມີກໍລະນີລະເມີດກົດໝາຍທາງອາຍາ ນັບແຕ່ຖານເບົາຮອດຖານໜັກ ເຊັ່ນຂີ້ລັກ ຄ້າເຖື່ອນ ກະຂົ່ມຂືນສຳເລົາ ໄປຈົນຮອດການຄ້າຂາຍຢາເສບຕິດ ແລະຂ້າຄົນ.

ຂ່າວທີ່ກ່ຽວຂ້ອງ