ການ​ສົ່ງ​ອອກ​ເຂົ້າຂອງ​ກຳປູເຈຍ ສືບຕໍ່​ຫຼຸດ​ລົງ

193 13 ສ.ຫ. 2018 ຂ່າວຕ່າງປະເທດ
ການ​ສົ່ງ​ອອກ​ເຂົ້າຂອງ​ກຳປູເຈຍ ສືບຕໍ່​ຫຼຸດ​ລົງ

    ຕົວ​ເລກ​ຈາກ​ຫ້ອງການ​ເລຂາ​ການ​ບໍລິການ​ປະຕູ​ດຽວ ກ່ຽວ​ກັບ​ການ​ສົ່ງ​ອອກ​ເຂົ້າ ຂອງ​ກຳປູເຈຍ ໃຫ້​ຮູ້​ວ່າ ການ​ສົ່ງ​ອອກ​ເຂົ້າຂອງ​ກຳປູເຈຍ ສືບຕໍ່​ຫຼຸດ​ລົງ​ໃນ​ເດືອນ​ກໍລະກົດ​ທີ່​ຜ່ານ​ມາ ຊຶ່ງ​ເປັນ​ຍ້ອນ​ວ່າ ບັນດາ​ປະ​ເດ​ທີ່​ມີ​ທ່າແຮງ​ກ່ຽວ​ກັບ​ການ​ສົ່ງ​ອອກ​ເຂົ້າ​ຢູ່​ໃນ​ພາກ​ພື້ນ ປັບ​ຫຼຸດ​ລາຄາ​ການ​ສົ່ງ​ອອກ ເຮັດ​ໃຫ້​ເພີ່ມ​ການ​ແກ້ງ​ແຍ່ງ​ຢູ່​ໃນ​ຕະຫຼາດ​ສາກົນ.

    ໃນ​ນັ້ນ ພາຍ​ໃນ 7 ເດືອນ​ຕົ້ນ​ປີ​ນີ້ ກຳປູເຈຍ ສົ່ງ​ອອກ​ເຂົ້າ (ເຂົ້າສານ) ໄດ້​ພຽງ 297.080 ໂຕນ ຫຼຸດ​ລົງ 6,3% ເມື່ອ​ທຽບໃສ່​ໄລຍະ​ເວລາ​ດຽວ​ກັນ​ຂອງ​ປີ​ກາຍ. ກະຊວງ​ກະສິກຳ​ຂອງ​ກຳປູເຈຍ ໃຫ້​ຮູ້​ວ່າ ການ​ສົ່ງ​ອອກ​ເຂົ້າຂອງ​ປະເທດ​ນີ້​ຫຼຸດ​ລົງ ແມ່ນ​ເປັນ​ຍ້ອນ​ປະລິມານ​ເຂົ້າເປືອກ​ທີ່​ເກັບ​ຊື້ ບໍ່​ພຽງພໍ ເພື່ອ​ນຳ​ເຂົ້າ​ສູ່​ໂຮງສີ ແລະ ປະລິມານ​ເຂົ້າເປືອກ​ທີ່​ສຳຮອງ​ໄວ້​ມີ​ຈຳກັດ.

    ໃນ​ປີ 2017 ກຳປູເຈຍ ສົ່ງ​ອອກ​ເຂົ້າ​ໄດ້​ກວ່າ 600.000 ໂຕນ ໂດຍ​ທີ່​ລູກ​ຄ້າ​ທີ່​ຈັດ​ຊື້​ເຂົ້າຂອງ​ກຳປູເຈຍ ລາຍ​ໃຫຍ່​ສຸດ​ກໍ​ແມ່ນ​ຈີນ. ຈີນ​ໄດ້​ກຳນົດ​ການ​ຊື້​ເຂົ້າ​ຈາກ​ກຳປູເຈຍ​ໄວ້​ທີ່ 300.000 ໂຕນ/ປີ.

 

ຂ່າວທີ່ກ່ຽວຂ້ອງ