ຮອງນາຍົກ ລົງກວດກາເຂື່ອນໄຟຟ້ານ້ຳຂອງໄຊຍະບູລີ

266 13 ສ.ຫ. 2018 ຂ່າວໜ້າ​ໜຶ່ງ
ຮອງນາຍົກ ລົງກວດກາເຂື່ອນໄຟຟ້ານ້ຳຂອງໄຊຍະບູລີ

    ພາຍ­ຫຼັງ​ທີ່​ລົງ​ເຄື່ອນ​ໄຫວ​ກວດ­ກາ​ບັນ­ດາ​ເຂື່ອນ​ຢູ່​ແຂວງ​ຫຼວງ​ພະ​ບາງ​ແລ້ວ ໃນ​ວັນ​ທີ 10 ສິງ­ຫາ 2018 ທ່ານ ບຸນ​ທອງ ຈິດ​ມະ­ນີ  ຮອງ​ນາ­ຍົກ­ລັດ­ຖະ­ມົນ­ຕີ ໄດ້​ເດີນ­ທາງ​ໄປ​ຕິດ­ຕາມ​ກວດ­ກາ​ກ່ຽວ​ກັບ​ການ ຈັດ​ຕັ້ງ​ປະ­ຕິ­ບັດ​ການ​ຄຸ້ມ​ຄອງ-ຈັດ​ສັນ-ຍົກ­ຍ້າຍ ການ​ຊົດ​ເຊີຍ​ຜົນ​ກະ­ທົບ​ຕໍ່​ສິ່ງ­ແວ­ດລ້ອມ ແລະ ສັງ­ຄົມ​ຂອງ​ເຂື່ອນ​ໄຟ­ຟ້າ ແລະ ຜົນ​ກະ­ທົບ​ໄພ­ພິ­ບັດ​ທີ່​ເຂື່ອນ​ພະ­ລັງ­ງານ​ໄຟ­ຟ້າ​ນ້ຳ­ຂອງ​ໄຊ​ຍະ​ບູ​ລີ ມີ​ທ່ານ ຄຳ​ມະ­ນີ ອິນ​ທິ​ລາດ ລັດ­ຖະ­ມົນ­ຕີ​ກະ­ຊວງ​ພະ­ລັງ­ງານ ແລະ ບໍ່​ແຮ່ ແລະ ພາກ­ສ່ວນ​ທີ່​ກ່ຽວ­ຂ້ອງ​ເດີນ­ທາງ​ລົງ​ໄປ​ຕິດ ຕາມ​ນຳ ໂດຍ​ໄດ້​ຮັບ​ການ​ຕ້ອນ­ຮັບ​ຈາກ​ທ່ານ ພົງ​ສະ­ຫວັນ ສິດ​ທະ​ວົງ ເຈົ້າ­ແຂວງ​ໄຊ​ຍະ​ບູ​ລີ ພ້ອມ​ດ້ວຍ​ຄະ­ນະ.

    ໂອ­ກາດ​ນີ້ ທ່ານ​ຮອງ​ນາ­ຍົກ​ໄດ້​ຮັບ​ຟັງ​ລາຍ​ງານ​ຈາກ​ຄະ­ນະ​ນຳ​ເຂື່ອນ​ໄຟ­ຟ້າ​ໄຊ​ຍະ​ບູ​ລີ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ການ​ຄຸ້ມ​ຄອງ-ຈັດ​ສັນ-ຍົກ­ຍ້າຍ ການ​ຊົດ​ເຊີຍ​ຜົນ​ກະ­ທົບ​ຕໍ່​ສິ່ງ­ແວ­ດລ້ອມ ແລະ ສັງ­ຄົມ​ຂອງ​ເຂື່ອນ​ໄຟ­ຟ້າ ແລະ ຜົນ​ກະ­ທົບ​ໄພ­ພິ­ບັດ​ການ​ບໍ­ລິ­ຫານ​ຈັດ­ການ​ນ້ຳ ລະ­ບົບ​ການ​ຈັດ­ການ​ສິ່ງ­ແວ­ດລ້ອມ​ໂດຍ​ນັບ​ແຕ່​ເຂື່ອນ​ໄຟ­ຟ້າ​ໄຊ​ຍະ​ບູ​ລີ​ເລີ່ມ​ລົງ­ມື​ກໍ່­ສ້າງ​ມາ​ຕັ້ງ­ແຕ່​ປີ 2012 ມາ​ຮອດ​ປັດ­ຈຸ­ບັນ​ສ້າງ​ສຳ­ເລັດ​ແລ້ວ 96% ຖື​ວ່າ​ສ້າງ​ສຳ­ເລັດ​ໄວ​ເກີນ​ຄາດ­ໝາຍ ໃນ​ເດືອນ​ຕຸ­ລາ 2018 ຈະ​ທົດ​ລອງ​ຜະ­ລິດ​ໄຟ­ຟ້າ 1 ເຄື່ອງ​ຈັກ ແລະ ຈະ​ເປີດ​ທຳ​ການ​ຜະ­ລິດ​ທັງ​ໝົດ​ໃນ​ທ້າຍ​ປີ 2019 ເຂື່ອນ​ໄຟ­ຟ້າ​ໄຊ​ຍະ​ບູ​ລີ​ເປັນ​ເຂື່ອນ​ໄຟ­ຟ້າ​ນ້ຳ​ລົ້ນ​ທີ່​ນຳ​ເອົາ​ເຕັກ­ນິກ​ການ​ກໍ່­ສ້າງ​ລະ­ດັບ​ສາ­ກົນ​ຍອມ­ຮັບ ມີ​ແລວ​ທາງ­ນ້ຳ​ໃຫ້​ປາ​ທຽວ​ຂຶ້ນ​ລົງ ທາງ​ໃຫ້​ເຮືອ​ສິນ­ຄ້າ​ທຽວ​ໄດ້​ທຸກ​ລະ­ດູ​ການ ປັດ­ຈຸ­ບັນ​ມີ​ການ​ຈັດ​ສັນ​ບ່ອນ­ຢູ່​ໃຫ້​ປະ­ຊາ­ຊົນ​ທີ່​ໄດ້​ຮັບ​ຜົນ​ກະ­ທົບ​ໄດ້​ສຳ­ເລັດ 100%.

    ຈາກ​ນັ້ນ ທ່ານ​ຮອງ​ນາ­ຍົກ​ໄດ້​ໃຫ້​ທິດ​ຊີ້​ນຳ​ຕໍ່​ຄະ­ນະ​ຮັບ­ຜິດ­ຊອບ​ສ້າງ​ເຂື່ອນ ແລະ ອຳ­ນາດ​ການ​ປົກ­ຄອງ​ທ້ອງ­ຖິ່ນ ໂດຍ​ໄດ້​ເນັ້ນ​ໃຫ້​ສູ້​ຊົນ​ກໍ່­ສ້າງ​ເຂື່ອນ​ໃຫ້​ສຳ­ເລັດ​ຕາມ​ຄາດ­ໝາຍ​ກຳ­ນົດ​ເວ­ລາ ແລະ ຮັບ​ປະ ກັນ​ຄວາມ​ປອດ​ໄພ ຊຸກ­ຍູ້​ສົ່ງ­ເສີມ​ວຽກ​ເຮັດ​ງານ​ທຳ​ໃຫ້​ແກ່​ປະ­ຊາ­ຊົນ​ຢູ່​ທ້ອງ­ຖິ່ນ ກໍ່​ຄື​ແຮງ​ງານ​ຂອງ​ຄົນ​ລາວ​ໃຫ້​ໄດ້​ຫຼາຍ​ກວ່າ 60% ໃນ​ຈຳ­ນວນ​ແຮງ​ງານ 5 ພັນ​ກວ່າ​ແຮງ​ງານ ພ້ອມ​ທັງ​ສ້າງ​ບຸ​ຄະ­ລາ​ກອນ​ຄົນ​ລາວ​ເພື່ອ​ປະ­ກອບ​ເຂົ້າ​ຕຳ­ແໜ່ງ​ງານ​ຕ່າງໆ​ແຕ່​ລະ​ຂະ­ແໜງ­ການ​ຄຸ້ມ​ຄອງ​ເຂື່ອນ​ໃນ​ໄລ­ຍະ​ຍາວ ເປັນ​ເຈົ້າ​ການ​ໃນ​ການ​ຮັກ­ສາ​ຄວາມ​ປອດ​ໄພ​ໃນ​ບໍ­ລິ­ເວນ​ໜ້າ​ເຂື່ອນ ສັນ​ເຂື່ອນ ບໍ­ລິ­ເວນ​ອື່ນໆ ແລະ ພິ­ເສດ​ແມ່ນ​ໃຫ້​ຕິດ­ຕາມ​ການ​ເໜັງ​ຕີງ-ການ​ຂຶ້ນ​ລົງ​ຂອງ​ນ້ຳ​ໃນ​ແຕ່​ລະ​ມື້ ການ​ບໍ­ລິ­ຫານ​ຈັດ­ການ​ນ້ຳ​ໃຫ້​ຢູ່​ໃນ​ລະ­ດັບ​ປົກ­ກະ­ຕິ ແລະ​ປອດ​ໄພ ເພື່ອ​ບໍ່​ໃຫ້​ມີ​ຜົນ​ກະ­ທົບ​ຕໍ່​ກັບ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ທີ່­ຢູ່​ໃກ້​ຄຽງ ນັບ​ທັງ​ເທິງ​ໜ້າ​ເຂື່ອນ​ແລະ ບໍ­ລິ­ເວນ​ລຸ່ມ​ເຂື່ອນ.

ຂ່າວທີ່ກ່ຽວຂ້ອງ