ຂ່າວຫຼ້າສຸດ

ມີຫຼາຍບັນຫາທີ່ປະຊາຊົນບ້ານດອນຕິ້ວ ສະເໜີໃຫ້ເຈົ້າຄອງແກ້ໄຂ

183 13 ສ.ຫ. 2018 ຂ່າວໜ້າ​ໜຶ່ງ
ມີຫຼາຍບັນຫາທີ່ປະຊາຊົນບ້ານດອນຕິ້ວ ສະເໜີໃຫ້ເຈົ້າຄອງແກ້ໄຂ

    ວັນ​ທີ 10 ສິງ­ຫາ 2018 ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ໄດ້​ລົງ​ພົບ​ປະ​ໂອ້​ລົມ​ປະ­ຊາ­ຊົນ​ບ້ານ​ດອນ​ຕິ້ວ ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ ໃຫ້​ກຽດ​ຕ້ອນ­ຮັບ​ໂດຍ​ທ່ານ ຈັນ­ທະ​ລາ ອິນ​ທະ­ລັງ​ສີ ເຈົ້າ­ເມືອງ​ໄຊ​ທາ­ນີ ມີ​ຫົວ­ໜ້າ​ພະ​ແນກ ຫົວ­ໜ້າ​ຫ້ອງ­ການ​ກ່ຽວ­ຂ້ອງ ນາຍ­ບ້ານ ແລະ ປະ­ຊາ­ຊົນ​ເຂົ້າ​ຮ່ວມ.

   ທ່ານ ບົວ​ຜັນ ໄຊ​ຍະ​ສິນ ນາຍ­ບ້ານ​ດອນ​ຕິ້ວ ໄດ້​ລາຍ​ງານ​ສະ­ພາບ​ການ​ພັດ­ທະ­ນາ​ບ້ານ​ດອນ​ຕິ້ວ​ໂດຍ​ຫຍໍ້​ວ່າ: ບ້ານ​ດອນ​ຕິ້ວ​ມີ 682 ຄອບ­ຄົວ ມີ​ພົນ­ລະ­ເມືອງ 3.324 ຄົນ ຍິງ 1.669 ຄົນ ແບ່ງ​ເປັນ 54 ໜ່ວຍ ອາ­ຊີບ​ຕົ້ນ­ຕໍ​ຂອງ​ປະ­ຊາ­ຊົນ​ເປັນ​ພະ­ນັກ­ງານ​ລັດ ວິ​ສາ​ຫະ​ກິດ 1.316 ຄົນ ກຳ­ມະ­ກອນ​ທົ່ວ​ໄປ 636 ຄົນ ຄ້າ­ຂາຍ-ບໍ­ລິ­ການ​ກວມ 7,09% ແລະ ປູກ­ຝັງ-ລ້ຽງ­ສັດ​ກວມ 5,8%  ມີ​ເນື້ອ­ທີ່​ກະ­ສິ­ກຳ 45 ເຮັກ­ຕາ ມີ​ກຸ່ມ​ການ​ຜະ­ລິດ​ກະ­ສິ­ກຳ 3 ກຸ່ມ ຄື: ກຸ່ມ​ປູກ​ເຂົ້າ ກຸ່ມ​ລ້ຽງ​ປາ ແລະ ກຸ່ມ​ປູກ​ຜັກ ພົ້ນ​ເດັ່ນ​ກວ່າ​ໝູ່​ການ​ລ້ຽງ​ນົກ​ກະ­ທາ ແລະ ລ້ຽງ​ປາ ພາຍ​ໃນ​ບ້ານ​ມີ​ໂຮງ­ງານ​ອຸດ­ສາ­ຫະ­ກຳ 8 ໂຮງ­ງານ ຂາຍ­ເຄື່ອງ​ຍ່ອຍ 24 ຮ້ານ ຮ້ານ​ອາ­ຫານ 2 ຮ້ານ ຮ້ານ​ເສີມ​ຄວາມ​ງາມ-ຮ້ານ​ຕັດ​ຜົມ 7 ຮ້ານ ຮ້ານ​ຂາຍ​ຢາ 4 ຮ້ານ ແລະ ອື່ນໆ.

    ໃນ​ໂອ­ກາດ​ທີ່​ເຈົ້າ​ຄອງ​ລົງ​ມາ​ພົບ​ປະ​ຄັ້ງ​ນີ້ ນາຍ­ບ້ານ​ດອນ​ຕິ້ວ​ໄດ້​ສະ­ເໜີ​ໃຫ້​ພາກ​ລັດ ກໍ່​ຄື ພາກ­ສ່ວນ​ກ່ຽວ­ຂ້ອງ​ຊ່ວຍ​ແກ້​ໄຂ​ບັນ­ຫາ​ທີ່​ເກີດ​ຂຶ້ນ​ຢູ່​ພາຍ​ໃນ​ບ້ານ ຄື: ສະ­ເໜີ​ຂໍ​ທີ່​ດິນ​ເພື່ອ​ປຸກ​ສ້າງ​ຫ້ອງ­ການ​ບ້ານ ແລະ ສະ­ໂມ­ສອນ​ຂອງ​ບ້ານ ຂໍ​ສ້ອມ­ແປງ ຫຼື ຍົກ​ລະ­ດັບ​ເສັ້ນ­ທາງ​ຮ່ອມ 2 ເຊິ່ງ​ເປັນ​ເສັ້ນ­ທາງ​ເຊື່ອມ​ຕໍ່​ຈາກ​ບ້ານ​ດອນ​ຕິ້ວ​ໃສ່​ບ້ານ​ຫ້ວຍ​ແດນ​ເມືອງ ອອກ​ໄປ​ຫາ​ດົງ​ໂດກ (ເສັ້ນ​ຫໍ​ພັກ​ນັກ­ກີ­ລາ​ຊີ­ເກມ) ປັດ­ຈຸ­ບັນ​ເສັ້ນ­ທາງ​ດັ່ງ­ກ່າວ​ເປ່​ເພ​ຫຼາຍ ສະ­ເໜີ​ພາກ­ສ່ວນ​ຮັບ­ຜິດ­ຊອບ​ກ່ຽວ​ກັບ​ການ​ລວງ​ຮ່ອງ​ລະ­ບາຍ​ນ້ຳ​ໃນ​ໂຄງ­ການ​ຕ້ານ​ແລ້ງ-ຕ້ານ​ຖ້ວມ ໃຫ້​ກວດ­ກາ​ນຳ​ພາກ­ສ່ວນ​ທີ່​ເຮັດ​ຕົວ​ຈິງ ຍ້ອນ​ການ​ຈົກ​ຮ່ອງ​ລະ­ບາຍ​ນ້ຳ​ພາຍ​ໃນ​ບ້ານ​ເຫັນ​ວ່າ​ມີ​ລັກ­ສະ­ນະ​ຈົກ​ຕາມ­ໃຈ ບາງ​ບ່ອນ​ມີ​ການ​ຈົກ​ເລິກ ແລະ ກວ້າງ​ໂພດ ບໍ່​ເປັນ​ໄປ​ຕາມ​ສັນ­ຍາ​ທີ່​ໄດ້​ກຳ­ນົດ​ໄວ້ ການ​ຊົມ­ໃຊ້​ໄຟ­ຟ້າ​ຂອງ​ປະ­ຊາ­ຊົນ​ພາຍ​ໃນ​ບ້ານ​ເຂດ​ໜ່ວຍ 33 ແລະ 34 ບໍ່​ພຽງ­ພໍ (ໄຟ­ຟ້າ​ມັກ​ຕົກ​ເລື້ອຍໆ) ຍ້ອນ​ປະ­ຊາ­ຊົນ​ບ້ານ​ອື່ນ​ມາ​ໃຊ້​ນຳ (ປັດ­ຈຸ­ບັນ​ໄດ້​ເຮັດ​ໃບ​ສະ­ເໜີ​ຫາ​ໄຟ­ຟ້າ​ແລ້ວ ແຕ່​ຍັງ​ບໍ່​ທັນ​ໄດ້​ຮັບ​ຄຳ​ຕອບ) ແລະ ບັນ­ຫາ​ນ້ຳ​ຖ້ວມ​ຂັງ​ໃນ​ເວ­ລາ​ຝົນ­ຕົກ​ໝັກ​ເຂດ​ໜ່ວຍ 33 ແລະ 34 ຍ້ອນ​ຖົມ​ດິນ​ຕັນ​ທາງ­ນ້ຳ ແລະ ເປັນ​ເຂດ​ເຊື່ອມ​ຕໍ່​ຊາຍ​ແດນ​ລະ­ຫວ່າງ​ບ້ານ​ດອນ​ຕິ້ວ-ບ້ານ​ດອນ​ໜູນ ແລະ ບ້ານ​ຫ້ວຍ​ແດນ​ເມືອງ.

    ສ່ວນ​ຄຳ​ສະ­ເໜີ​ຂອງ​ອຳ­ນາດ​ການ​ປົກ­ຄອງ​ບ້ານ ກໍ່​ຄື​ປະ­ຊາ­ຊົນ ທ່ານ​ເຈົ້າ​ຄອງ​ໄດ້​ມອບ​ໃຫ້​ຂະ­ແໜງ­ການ​ກ່ຽວ­ຂ້ອງ​ນຳ­ໄປ​ຄົ້ນ­ຄວ້າ​ພິ­ຈາ­ລະ­ນາ ເພື່ອ​ແກ້​ໄຂ​ໃນ­ຕໍ່­ໜ້າ​ໃຫ້​ດີ​ຂຶ້ນ ພ້ອມ​ນີ້ ທ່ານ​ຍັງ​ໄດ້​ສະ­ເໜີ​ໃຫ້​ພາກ­ສ່ວນ​ທີ່​ກ່ຽວ­ຂ້ອງ​ຈັດ​ສັນ​ທີ່​ດິນ​ທີ່​ເຫັນ​ວ່າ​ເໝາະ​ສົມ ເພື່ອ​ປຸກ​ຫ້ອງ­ການ​ບ້ານ ແລະ ສະ­ໂມ­ສອນ​ບ້ານ​ດອນ​ຕິ້ວ ພ້ອມ​ທັງ​ຍົກ​ລະ­ດັບ​ເສັ້ນ­ທາງ​ທີ່​ເປ່​ເພ​ໜັກ ເຊິ່ງ​ອາດ​ຈະ​ຂໍ​ໃຊ້​ງົບ­ປະ­ມານ​ຈາກ​ກອງ​ທຶນ​ທາງ ຫຼື ການ​ປຸກ­ລະ­ດົມ​ຈາກ​ປະ­ຊາ­ຊົນ​ພາຍ​ໃນ​ບ້ານ​ທີ່​ເຫັນ​ວ່າ​ມີ​ທ່າ­ແຮງ ແລະ ອື່ນໆ.

ຂ່າວທີ່ກ່ຽວຂ້ອງ