ຂ່າວຫຼ້າສຸດ

ອາຊຽນ ມີຜົນສຳເລັດທີ່ສຸດໃນໂລກ ທີ່ມີການເປີດກວ້າງສູ່ໂລກພາຍນອກ

601 13 ສ.ຫ. 2018 ຂ່າວໜ້າ​ໜຶ່ງ
ອາຊຽນ ມີຜົນສຳເລັດທີ່ສຸດໃນໂລກ ທີ່ມີການເປີດກວ້າງສູ່ໂລກພາຍນອກ

    ສະ­ມາ­ຄົມ​ບັນ­ດາ​ປະ­ຊາ​ຊາດ​ອາ­ຊີ​ຕາ­ເວັນ​ອອກ­ສຽງ​ໃຕ້ ຫຼື ອາ​ຊຽນ ສ້າງ­ຕັ້ງ​ຂຶ້ນ​ວັນ​ທີ 8 ສິງ­ຫາ 1967 ປັດ​ຈຸບັນ ​ປະ­ກອບ​ມີ​ປະ­ເທດ​ສະ­ມາ­ຊິກ​ທັງ​ໝົດ 10 ປະ­ເທດ ໄດ້­ແກ່ ບຣູ​ໄນ ກຳ­ປູ­ເຈຍ ອິນ​ໂດ​ເນ​ເຊຍ ລາວ ມາ​ເລ​ເຊຍ ມຽນ​ມາ ຟິ​ລິບ​ປິນ ສິງ­ກະ­ໂປ ໄທ ແລະ ຫວຽດ­ນາມ.

    ວັນ​ທີ 10 ສິງ­ຫາ 2018 ທີ່​ກະ­ຊວງ​ການ​ຕ່າງ­ປະ­ເທດ ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ​ໄດ້​ເປັນ​ປະ­ທານ​ໃນ​ພິ­ທີ​ຊັກ​ທຸງ​ອາ​ຊຽນ​ຂຶ້ນ​ເສົາ ເພື່ອ​ສະ­ເຫຼີມ­ສະ­ຫຼອງ​ໂອ­ກາດ ຄົບ­ຮອບ 51 ປີ ແຫ່ງ​ວັນ​ສ້າງ­ຕັ້ງ​ອາ​ຊຽນ (8/8/1967-8/8/2018) ແລະ ຄົບ­ຮອບ 21 ປີ ສປປ ລາວ ເຂົ້າ​ເປັນ​ສະ­ມາ­ຊິກ​ອາ​ຊຽນ (23/7/1997-23/7/2018) ມີ​ບັນ­ດາ​ລັດ­ຖະ­ມົນ­ຕີ​ທັງ​ສາມ​ເສົາ­ຄ້ຳ​ປະ­ຊາ​ຄົມ​ອາ​ຊຽນ ຮອງ​ລັດ­ຖະ­ມົນ­ຕີ ທູດ​ປະ­ເທດ​ສະ­ມາ­ຊິກ​ອາ​ຊຽນ​ປະ­ຈຳ​ລາວ ຕາງ­ໜ້າ​ອົງ​ການ­ຈັດ­ຕັ້ງ​ສາ­ກົນ ຄະ­ນະ​ກົມ ແລະ ພະ­ນັກ­ງານ​ເຂົ້າ​ຮ່ວມ

   ໃນ​ພິ­ທີ ທ່ານ ສະ­ເຫຼີມ​ໄຊ ກົມ​ມະ​ສິດ ໄດ້​ຢ້ຳ​ເຖິງ​ຜົນ­ສຳ­ເລັດ​ຂອງ​ອາ​ຊຽນ​ໃນ​ໄລ­ຍະ​ກວ່າ​ເຄິ່ງ​ສະ­ຕະ­ວັດ​ທີ່​ຜ່ານ​ມາ ເຖິງ​ແມ່ນ​ວ່າ​ຈະ​ມີ​ຂໍ້​ຈຳ­ກັດ ແລະ ສິ່ງ​ທ້າ​ທາຍ​ຕ່າງໆ ແຕ່​ພາກ​ພື້ນ ແລະ ປະ­ຊາ­ຊົນ​ຂອງ​ພວກ​ເຮົາ​ກໍ່​ໄດ້​ຢູ່​ຮ່ວມ​ກັນ​ຢ່າງ​ມີ​ສັນ­ຕິ­ພາບ ສະ­ຖຽນ​ລະ​ພາບ ກໍ່​ຄື ໝາກ­ຜົນ​ຂອງ​ການ​ຮ່ວມ​ມື​ທີ່​ຮັດ​ແໜ້ນ​ລະ­ຫວ່າງ​ປະ­ເທດ​ສະ­ມາ­ຊິກ​ອາ​ຊຽນ ແລະ ລະ­ຫວ່າງ​ອາ​ຊຽນ​ກັບ​ປະ­ເທດ​ເພື່ອນ​ມິດ​ທົ່ວ​ໂລກ ໂດຍ​ສະ­ເພາະ ແມ່ນ​ປະ­ເທດ​ຄູ່​ເຈລະ­ຈາ  ເຊິ່ງ​ອາ​ຊຽນ​ໃນ​ປັດ­ຈຸ­ບັນ​ເປັນ​ໜຶ່ງ​ໃນ​ອົງ​ການ­ຈັດ­ຕັ້ງ​ພາກ​ພື້ນ​ທີ່​ປະ­ສົບ​ຜົນ­ສຳ­ເລັດ​ທີ່​ສຸດ​ໃນ​ໂລກ ທີ່​ມີ​ການ​ເປີດ​ກວ້າງ​ສູ່​ໂລກ​ພາຍ​ນອກ ແລະ ມີ​ບົດ­ບາດ​ສຳ­ຄັນ​ໃນ​ໂຄງ​ສ້າງ​ພາກ​ພື້ນ​ທີ່​ເປີດ​ກວ້າງ ກວມ​ລວມ ໂດຍ​ມີ​ອາ​ຊຽນ​ເປັນ­ໃຈ​ກາງ ສປປ ລາວ ມີ​ຄວາມ​ພາກ­ພູມ​ໃຈ​ທີ່​ໄດ້​ເປັນ​ສ່ວນ​ໜຶ່ງ​ໃນ​ຄອບ­ຄົວ​ອາ​ຊຽນ ຂອບ­ໃຈ​ຕໍ່​ການ​ຊ່ວຍ­ເຫຼືອ​ສະ­ໜັບ­ສະ­ໜູນ​ຮ່ວມ​ມື​ຂອງ​ບັນ­ດາ​ປະ­ເທດ​ສະ­ມາ­ຊິກ​ອາ​ຊຽນ ແລະ ທຸກ​ຄູ່​ຮ່ວມ​ມື​ຂອງ​ອາ​ຊຽນ​ທີ່​ໄດ້​ເຮັດ​ໃຫ້​ລາວ​ສາ­ມາດ​ປະ­ຕິ­ບັດ​ຄວາມ​ໝາຍ​ໝັ້ນ​ຂອງ​ຕົນ ໃນ​ຖາ­ນະ​ປະ­ເທດ​ສະ­ມາ­ຊິກ​ຕະ­ຫຼອດ​ໄລ­ຍະ 2 ທົດ​ສະ​ວັດ​ຜ່ານ​ມາ.

    ໂອ­ກາດ​ນີ້ ທ່ານ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ​ໄດ້​ສະ­ແດງ​ຄວາມ​ຂອບ­ໃຈ​ຕໍ່​ການ​ສະ­ໜັບ­ສະ­ໜູນ​ຢ່າງ​ລົ້ນ​ເຫຼືອ ການ​ຊ່ວຍ­ເຫຼືອ​ຢ່າງ​ທັນ​ການ ແລະ ຄວາມ​ພະ­ຍາ­ຍາມ​ໃນ​ການ​ຊ່ວຍ­ເຫຼືອ​ບັນ­ເທົາ​ທຸກ​ແກ່ ສປປ ລາວ ໂດຍ​ບັນ­ດາ​ປະ­ເທດ​ສະ­ມາ­ຊິກ​ອາ​ຊຽນ ກໍ່​ຄື ສູນ​ປະ­ສານ​ງານ​ອາ​ຊຽນ ເພື່ອ​ການ​ຊ່ວຍ­ເຫຼືອ​ທາງ​ດ້ານ​ມະ­ນຸດ­ສະ­ທຳ​ໃນ​ການ​ຄຸ້ມ​ຄອງ​ໄພ­ພິ­ບັດ ຄູ່​ຮ່ວມ​ເຈລະ­ຈາ​ອາ​ຊຽນ ບັນ­ດາ​ປະ­ເທດ​ເພື່ອນ​ມິດ ແລະ ອົງ​ການ­ຈັດ­ຕັ້ງ​ສາ­ກົນ​ຕ່າງໆ ​ຕໍ່​ເຫດ­ການ​ໄພ​ນ້ຳ​ຖ້ວມ​ທີ່​ເກີດ​ຂຶ້ນ​ຈາກ​ຄູ​ກັ້ນ​ນ້ຳ​ເຂື່ອນ​ເຊ​ປຽນ-ເຊ​ນ້ຳ​ນ້ອຍ​ຊຳ​ລຸດ ສິ່ງ​ດັ່ງ­ກ່າວ​ສະ­ທ້ອນ​ໃຫ້​ເຫັນ​ເຖິງ​ຄວາມ​ສາ­ມັກ­ຄີ ຄວາມ​ເອົາ­ໃຈ­ໃສ່ ແລະ ຄວາມ​ໂອບ​ເອື້ອ​ອາ­ລີ​ກັນ​ພາຍ​ໃນ​ຄອບ­ຄົວ​ອາ​ຊຽນ ກໍ່​ຄື ອາ​ຊຽນ​ບວກ​ກັບ​ຄູ່​ຮ່ວມ​ຈາກ​ພາຍ​ນອກ.

ຂ່າວທີ່ກ່ຽວຂ້ອງ