ສື່ມວນຊົນລາວ ມີຄວາມພ້ອມໃນການປະຕິບັດໜ້າທີ່ຮັບໃຊ້ຊາດ

122 13 ສ.ຫ. 2018 ຂ່າວໜ້າ​ໜຶ່ງ
ສື່ມວນຊົນລາວ ມີຄວາມພ້ອມໃນການປະຕິບັດໜ້າທີ່ຮັບໃຊ້ຊາດ

    ເນື່ອງ​ໃນ​ໂອ­ກາດ​ສະ­ເຫຼີມ­ສະ­ຫຼອງ​ວັນ​ສື່​ມວນ​ຊົນ ຄົບ­ຮອບ 68 ປີ (13 ສິງ­ຫາ 1950-13 ສິງ­ຫາ 2018) ທ່ານ ສະ­ຫວັນ​ຄອນ ຣາ​ຊ​ມຸນ­ຕີ ຮອງ​ລັດ­ຖະ­ມົນ­ຕີ​ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ທັງ​ເປັນ​ປະ­ທານ​ສະ­ມາ­ຄົມ​ນັກ​ຂ່າວ ແຫ່ງ ສປປ ລາວ ໄດ້​ໃຫ້​ສຳ­ພາດ​ຕໍ່​ສື່​ມວນ​ຊົນ ໃນ​ວັນ​ທິ 10 ສິງ­ຫາ 2018 ນີ້​ວ່າ: ໃນ​ຍຸກ​ການ​ເຊື່ອມ​ໂຍງ ຫຼື​ໃນ​ຍຸກ​ໂລ­ກາ​ພິ​ວັດ ສື່​ມວນ​ຊົນ​ລາວ ໄດ້​ມີ​ໂອ­ກາດ​ໃນ​ການ​ພັດ­ທະ­ນາ​ຕົນ​ເອງ​ໃນ​ທຸກ​ດ້ານ ໄດ້​ມີ​ຜົນ​ປະ­ໂຫຍດ​ຈາກ​ການ​ເຊື່ອມ​ໂຍງ​ສາ­ກົນ ໂດຍ​ສະ­ເພາະ​ໄດ້​ຮັບ​ການ​ພັດ­ທະ­ນາ​ທາງ​ດ້ານ​ເຄື່ອງ­ມື ອຸ­ປະ­ກອນ ໃຫ້​ທັນ​ສະ­ໄໝ​ຂຶ້ນ ບຸ​ຄະ­ລາ​ກອນ​ດ້ານ​ສື່​ມວນ​ຊົນ​ກໍ​ໄດ້​ມີ​ໂອ­ກາດ ໄດ້​ພັດ­ທະ­ນາ​ຕົນ​ເອງ​ໃຫ້​ມີ​ຄວາມ​ຮູ້ ມີ​ຄວາມ​ສາ­ມາດ ທາງ​ດ້ານ​ວິ­ຊາ​ສະ­ເພາະ ວິ­ຊາ​ຊີບ ແລະ ມີ​ໂອ­ກາດ​ໄດ້​ເຂົ້າ​ຮ່ວມ​ເວ­ທີ​ປຶກ­ສາ​ຫາ­ລື​ໃນ​ວຽກ​ງານ​ຂອງ​ຕົນ ຢູ່​ໃນ​ພາກ​ພື້ນ ແລະ ສາ­ກົນ. ພ້ອມ​ນີ້ ໃນ​ຍຸກ​ແຫ່ງ​ການ​ເຊື່ອມ​ໂຍງ​ຢູ່​ໃນ​ສາ­ກົນ ສື່​ມວນ​ຊົນ​ລາວ​ມີ​ຄວາມ​ພ້ອມ​ໃນ​ການ​ທີ່​ຈະ​ປະ­ຕິ­ບັດ​ຫນ້າ­ທີ່​ຮັບ​ໃຊ້​ພາ­ລະ­ກິດ ປົກ​ປັກ​ຮັກ­ສາ ແລະ ພັດ­ທະ­ນາ​ປະ­ເທດ​ຊາດ ໃນ​ໄລ­ຍະ​ໃໝ່ ຕາມ​ພາ­ລະ​ບົດ­ບາດ​ຂອງ​ສື່​ມວນ​ຊົນ ແລະ ເຮັດ​ຫນ້າ­ທີ່​ໃນ​ການ​ສື່­ສານ ລະ­ຫວ່າງ ລາວ​ກັບ​ພາກ​ພື້ນ ແລະ ບັນ­ດາ​ປະ­ເທດ ສື່­ສານ​ໃຫ້​ເກີດ​ມີ​ຄວາມ​ເຂົ້າ­ໃຈ​ກ່ຽວ​ກັບ​ປະ­ເທດ​ລາວ​ເຮົາ​ທີ່​ມີ​ການ​ພັດ­ທະ­ນາ​ໃນ​ຫຼາຍ​ດ້ານ ແລະ ມີ​ຜົນ­ສຳ­ເລັດ​ໃນ​ຫຼາຍ​ດ້ານ​ໃນ​ແຕ່​ລະ​ປີ ຈາກ​ການ​ລາຍ​ງານ​ຂ່າວ ຈາກ​ການ​ສື່­ສານ​ຜ່ານ​ສື່​ມວນ​ຊົນ​ຂອງ​ລາວ​ເຮົາ ເຮັດ​ໃຫ້​ບັນ­ດາ​ປະ­ເທດ​ເພື່ອນ​ມິດ ກໍ​ຄື​ວົງ​ຄະ­ນະ​ຍາດ​ສາ­ກົນ ໄດ້​ມີ​ຄວາມ​ຮັບ​ຮູ້ ເຂົ້າ­ໃຈ​ກ່ຽວ​ກັບ​ການ​ປ່ຽນ­ແປງ​ການ​ພັດ­ທະ­ນາ​ຂອງ​ປະ­ເທດ​ເຮົາ ພ້ອມ​ດຽວ​ກັນ ກໍ​ມີ​ຄວາມ​ສາ­ມາດ​ໃນ​ການ​ຊີ້​ແຈງ​ອະ­ທິ­ບາຍ​ຄວາມ​ບໍ່​ເຂົ້າ­ໃຈ​ກ່ຽວ​ກັບ​ປະ­ເທດ​ເຮົາ ວັດ­ທະ­ນະ­ທຳ-ສັງ­ຄົມ​ຂອງ​ປະ­ເທດ​ລາວ ລະ­ບອບ​ການ­ເມືອງ ແລະ ສາ­ມາດ​ຕອບ​ໂຕ້​ຄວາມ​ພະ­ຍາ­ຍາມ​ໂຄ­ສະ­ນາ​ໃສ່​ຮ້າຍ​ປ້າຍ​ສີ ການ​ໂຄ­ສະ­ນາ​ທິດ​ບິດ​ເບືອນ​ຄວາມ​ຈິງ ຂອງ​ກຸ່ມ​ທີ່​ບໍ່​ຫວັງ​ດີ​ຕໍ່​ປະ­ເທດ​ຂອງ​ເຮົາ ໄດ້​ໃນ​ລະ­ດັບ​ທີ່​ແນ່­ນອນ.

ຂ່າວທີ່ກ່ຽວຂ້ອງ