ເຈົ້າໜ້າທີ່ປິດຄ້າ-ຂາຍຜະລິດຕະພັນເຮັດຈາກສັດປ່າ ທີ່ຕະຫຼາດດອນຊາວ

115 13 ສ.ຫ. 2018 ຂ່າວໜ້າ​ໜຶ່ງ
ເຈົ້າໜ້າທີ່ປິດຄ້າ-ຂາຍຜະລິດຕະພັນເຮັດຈາກສັດປ່າ ທີ່ຕະຫຼາດດອນຊາວ

    ວັນ​ທີ 27 ກໍ­ລະ­ກົດ 2018 ເຈົ້າ​ໜ້າ­ທີ່​ຄະ­ນະ​ປະ­ສານ​ງານ​ບັງ­ຄັບ​ໃຊ້​ກົດ­ໝາຍ​ວ່າ​ດ້ວຍ​ສັດ​ນ້ຳ ສັດ­ປ່າ ແຂວງ​ບໍ່​ແກ້ວ ເຂົ້າ​ປິດ 4 ຮ້ານ​ທີ່​ມີ​ການ​ຄ້າ-ຂາຍ​ຜະ­ລິດ​ຕະ​ພັນ​ລອກ​ຮຽນ​ແບບ ແລະ ຄ້າຍ­ຄື​ຊິ້ນ​ສ່ວນ​ສັດ­ປ່າ ພ້ອມ​ຢຶດ​ຂອງ​ກາງ​ລວມ​ທັງ​ໝົດ 393 ຊິ້ນ​ສ່ວນ ທີ່​ຕະ­ຫຼາດ​ດອນ​ຊາວ ເມືອງ​ຕົ້ນ​ເຜິ້ງ ເຂດ​ເສດ­ຖະ­ກິດ​ພິ­ເສດ​ສາມ​ລ່ຽມ​ທອງ ແຂວງ​ບໍ່​ແກ້ວ.

    ສຳ­ລັບ​ຈຳ­ນວນ​ທີ່​ຢຶດ​ມາ​ໄດ້​ຈາກ 4 ຮ້ານ ລວມ​ມີ ປອກ​ແຂນ ສາຍ​ຄໍ ກີ້​ສາຍ​ຄໍ ເຂົາ ແລະ ແຂ້ວ​ສັດ ແກະ​ສະ ຫຼັກ​ຮູບ​ພະ​ແຫວນ ງາ​ຊ້າງ​ປອມ ແລະ ເຄື່ອງ​ປະ­ດັບ​ອື່ນໆ ທີ່​ຄ້າຍ­ຄື​ຊິ້ນ​ສ່ວນ​ສັດ­ປ່າ ເຊິ່ງ​ໃນ​ການ​ເຂົ້າ​ປິດ​ຕະ­ຫຼາດ ແລະ ຢຶດ​ຂອງ​ກາງ​ຄັ້ງ​ນີ້ ປະ­ກອບ​ມີ​ເຈົ້າ​ໜ້າ­ທີ່​ກອງ​ກວດ­ກາ​ປ່າ­ໄມ້​ແຂວງ​ບໍ່​ແກ້ວ ກົມ​ກວດ­ກາ​ປ່າ­ໄມ້ ຕຳ­ຫຼວດ ທະ­ຫານ ພາ­ສີ ສານ ຈັດ​ສັນ​ຕະ­ຫຼາດ​ດອນ​ຊາວ ແລະ ພາກ­ສ່ວນ​ທີ່​ກ່ຽວ­ຂ້ອງ​ແຂວງ ແລະ ເມືອງ​ຕົ້ນ​ເຜິ້ງ ໃນ​ໂອ­ກາດ​ນີ້​ເຈົ້າ​ໜ້າ­ທີ່​ຍັງ​ໄດ້​ນຳ​ເອົາ​ນິ­ຕິ​ກຳ ແລະ ເອ­ກະ­ສານ​ກ່າວ​ເຕືອນ ໂດຍ​ສະ­ເພາະ ຄຳ​ສັ່ງ​ເລກ​ທີ 05/ນຍ ວ່າ​ດ້ວ​ການ​ເພີ່ມ​ທະ­ວີ​ຄວາມ​ເຂັ້ມ​ງວດ​ໃນ​ການ​ຄຸ້ມ​ຄອງ ແລະ ກວດ­ກາ​ສັດ­ປ່າ ແລະ ພືດ​ປ່າ​ຫວງ​ຫ້າມ ລົງ​ເຜີຍ­ແຜ່ ພ້ອມ​ທັງ​ໃຫ້​ເຈົ້າ​ຂອງ​ຮ້ານ​ທີ່​ເປັນ​ຊາວ​ຈີນ 4 ຄົນ ເຊັນ​ບົດ​ບັນ­ທຶກ ແລະ ຂໍ້​ຫ້າມ​ທີ່​ບໍ່​ໃຫ້​ນຳ​ເອົາ​ຜະ­ລິດ​ຕະ​ພັນ​ນີ້​ມາ​ວາງ­ສະ­ແດງ ຫຼື ຂາຍ​ອີກ​ຕໍ່​ໄປ.

    ການ​ລົງ​ກວດ­ກາ​ເພື່ອ​ປິດ ແລະ ຢຶດ​ຂອງ​ກາງ​ຄັ້ງ​ນີ້​ບໍ່​ແມ່ນ​ແຕ່​ສະ­ເພາະ​ໃນ​ຕະ­ຫຼາດ​ດອນ​ຊາວ​ເທົ່າ​ນັ້ນ ແຕ່​ເຈົ້າ​ໜ້າ­ທີ່​ກອງ​ກວດ­ກາ​ປ່າ­ໄມ້​ຍັງ​ໄດ້​ລົງ​ກວດ­ກາ​ບັນ­ດາ​ຕະ­ຫຼາດ​ຕ່າງໆ​ທັງ​ນ້ອຍ ແລະ ໃຫຍ່​ທີ່​ມີ​ການ​ລັກ­ລອບ​ຄ້າ­ຂາຍ​ທັງ​ສັດ­ປ່າ ຊິ້ນ​ສ່ວນ​ສັດ­ປ່າ ແລະ ຜະ­ລິດ​ຕະ​ພັນ​ທີ່​ເຮັດ​ຈາກ​ສັດ­ປ່າ​ຕ່າງໆ​ໃນ​ແຂວງ​ບໍ່​ແກ້ວ ຕື່ມ​ອີກ ດັ່ງ­ນັ້ນ ຂໍ​ໃຫ້​ທຸກ​ພາກ­ສ່ວນ​ທີ່​ກ່ຽວ­ຂ້ອງ​ທົ່ວ​ປະ­ເທດ​ຈົ່ງ​ພ້ອມ​ກັນ​ຈັດ​ຕັ້ງ​ປະ­ຕິ­ບັດ ໂດຍ​ສະ­ເພາະ ຕາມ​ຄຳ​ສັ່ງ​ເລກ​ທີ 05/ນຍ ໄປ​ພ້ອມໆ​ກັນ.

   ທ່ານ ສົມ​ພອນ ບົວ​ສະ­ຫວັນ ຫົວ­ໜ້າ​ອົງ­ການ​ກອງ​ທຶນ​ອະ­ນຸ​ຮັກ​ທຳ​ມະ​ຊາດ​ໂລກ​ປະ­ຈຳ​ລາວ (WWF-Laos) ໄດ້​ກ່າວ​ວ່າ: ອົງ­ການ WWF ພູມ­ໃຈ​ທີ່​ໄດ້​ມີ​ສ່ວນ​ຮ່ວມ​ໃນ​ການ​ສະ­ໜັບ­ສະ­ໜູນ​ຕໍ່​ການ­ຈັດ­ຕັ້ງ​ປະ­ຕິ­ບັດ​ຄຳ​ສັ່ງ​ເລກ​ທີ 05/ນຍ ແລະ ດີ­ໃຈ​ກັບ​ເຈົ້າ​ໜ້າ­ທີ່​ຕໍ່​ການ​ປະ­ຕິ­ບັດ​ໜ້າ­ທີ່ ສາ­ມາດ​ປິດ​ຕະ­ຫຼາດ​ຄ້າ-ຂາຍ​ສັດ­ປ່າ​ທີ່​ຜິດ​ກົດ­ໝາຍ ທີ່​ຕະ­ຫຼາດ​ດອນ​ຊາວ​ຄັ້ງ​ນີ້ ເຊິ່ງ​ສິ່ງ​ທີ່​ຢຶດ​ມາ​ໄດ້​ເກືອບ 400 ອັນ ສ່ວນ​ໃຫຍ່​ເປັນ​ຂອງ​ປອມ ຂອງ​ລອກ​ຮຽນ​ແບບ ແລະ ຄ້າຍ­ຄື) ແຕ່​ທາງ​ກົມ​ກວດ­ກາ​ປ່າ­ໄມ້​ຈະ​ໄດ້​ສົ່ງ­ຕໍ່​ໄປ​ທີ່​ເຈົ້າ​ໜ້າ­ທີ່​ສົນ­ທິ­ສັນ­ຍາ​ສາ­ກົນ ວ່າ​ດ້ວຍ​ການ​ຄ້າ­ຂາຍ​ຊະ­ນິດ​ພັນ​ສັດ­ປ່າ ແລະ ພືດ​ປ່າ​ທີ່​ໃກ້​ຈະ​ສູນ­ພັນ​ລະ­ຫວ່າງ​ຊາດ ເພື່ອ​ລະ­ບຸ​ຊະ­ນິດ​ພັນ​ທາງ​ດ້ານ​ວິ­ທະ­ຍາ­ສາດ (CITES Scientific Authority).

ຂ່າວທີ່ກ່ຽວຂ້ອງ